ຈີນກ່າວວ່າ ຈະຕອບໂຕ້ພຶດຕິກຳກະວອກກະແວກຂອງ ສ.ອາເມຣິກາ ດ້ວຍເຫດດ້ວຍຜົນ

ລາຍງານ 8 ສິງຫາ 2020, ທ່ານ ຫວັງອີ້ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດຂອງຈີນ ກ່າວວ່າຝ່າຍຈີນພ້ອມທີ່ຈະຕອບໂຕ້ພຶດຕິກຳກະວອກກະແວກ ແລະ ຮ້ອນຮົນຂອງ ສ.ອາເມຣິກາ ຢ່າງສຸຂຸມ ແລະ ດ້ວຍເຫດດ້ວຍຜົນ ໃນລະຫວ່າງການໃຫ້ສຳພາດກັບສຳນັກຂ່າວສິນຊົວ ສື່ຂອງທາງການຈີນ ວ່າດ້ວຍສາຍພົວພັນຈີນ-ສ.ອາເມຣິກາ ເມື່ອວັນທີ 5 ສິງຫາ ທີ່ຜ່ານມາ.

ທ່ານ ຫວັງອີ້ ກ່າວວ່າ ສປ.ຈີນ ຕ້ອງການຫັນຫາເຂົ້າຫາກັນ ຫຼາຍກວ່າການແຕກແຍກ, ການພັດທະນາຂອງຈີນ ແລະ ສ.ອາເມຣິກາ ບໍ່ແມ່ນການແຂ່ງຂັນທີ່ຈະຕ້ອງມີຝ່າຍໃດຝ່າຍໜຶ່ງຊະນະ ດັ່ງນັ້ນ, ຈຶ່ງບໍ່ຄວນທີ່ຈະມາຍູ້ຢັນກັນໄປມາ ແຕ່ຄວນທີ່ຈະນຳຈຸດແຂງຂອງກັນ ແລະ ກັນມາຊ່ວຍກັນຊຸກດັນໃຫ້ເກີດການພັດທະນາຮ່ວມກັນ. ການຮ່ວມມືລະຫວ່າງຈີນ-ສ.ອາເມຣິກາ ບໍ່ເຄີຍມີກໍລະນີທີ່ຝ່າຍໃດຝ່າຍໜຶ່ງຮ້ອງຂໍຜົນປະໂຫຍດ ຫຼື ເອົາລັດເອົາປຽບອີກຝ່າຍໜຶ່ງ ເຊິ່ງທັງສອງປະເທດຕ່າງໄດ້ຮັບຜົນປະໂຫຍດມະຫາສານຈາກການຮ່ວມມືກັນ.

ຂະນະນີ້, ຈີນ ແລະ ສ.ອາເມຣິກາ ມີອັດຕາສ່ວນຫຼາຍກວ່າ 1 ໃນ 3 ຂອງຜົນຜະລິດທາງເສດຖະກິດທົ່ວໂລກ ແລະ ກວ່າ 50% ຂອງການເຕີບໃຫຍ່ຂະຫຍາຍຕົວທົ່ວໂລກ, ປະລິມານການຄ້າສອງຝ່າຍເພີ່ມຂຶ້ນ 250 ເທົ່າ ນັບຕັ້ງແຕ່ໄລຍະທຳອິດຂອງສາຍພົວພັນທາງການທູດ ແລະ ກວມເອົາ 1 ໃນ 5 ຂອງປະລິມານການຄ້າທົ່ວໂລກ, ການລົງທຶນແບບສອງທາງເພີ່ມຂຶ້ນຈາກເກືອບ 0 ໄປສູ່ເກືອບ 2.4 ແສນລ້ານໂດລາສະຫະລັດ, ຂະນະທີ່ການເດີນທາງໄປມາຫາສູ່ລະຫວ່າງປະຊາຊົນສອງປະເທດຕໍ່ປີສູງເຖິງ 5 ລ້ານຄັ້ງ.

ທ່ານ ຫວັງອີ້ ກ່າວວ່າເຖິງແມ່ນວ່າທັງສອງປະເທດຈະມີຄວາມແຕກຕ່າງກັນຢ່າງຍິ່ງໃນລະບົບສັງຄົມ ແລະ ດ້ານອື່ນໆ ແຕ່ຄວາມແຕກຕ່າງດັ່ງກ່າວບໍ່ໄດ້ສົ່ງຜົນກະທົບຕໍ່ການຢູ່ຮ່ວມກັນ ແລະ ການຮ່ວມມືຢ່າງສັນຕິຂອງສອງຝ່າຍ ດັ່ງນັ້ນ, ບໍ່ມີຄວາມຈຳປັນ ທີ່ທັງສອງຝ່າຍຈະປ່ຽນແປງເຊິ່ງກັນ ແລະ ກັນ ແຕ່ຄວນເຄົາລົບການຕັດສິນໃຈຂອງປະຊາຊົນອີກຝ່າຍທີ່ເປັນໄປຢ່າງອິດສະຫຼະ.

ໃນຍາມທີ່ໂລກໂຄວິດ-19 ໄດ້ສົ່ງຜົນກະທົບຕໍ່ເສດຖະກິດໂລກຄືແນວນີ້ ຈີນ ແລະ ສ.ອາເມຣິກາຄວນຢຸດຕິຄວາມພະຍາຍາມໃນການແບ່ງແຍກ ແລະ ຫັນກັບມາພັດທະນາສາຍພົວພັນຜ່ານການຮ່ວມມື ແລະ ການດຳເນີນການດ້ວຍການຮັບຜິດຊອບຕໍ່ໂລກ.

ໃນການສຳພາດ ທ່ານ ຫວັງອີ້ ໄດ້ສະແດງຄວາມບໍ່ເຫັນດີຕໍ່ການກະທຳຫຼ້າສຸດຂອງ ສ.ອາເມຣິກາ ທີ່ທຳລາຍສາຍພົວພັນສອງຝ່າຍ ອັນລວມເຖິງການທີ່ ສ.ອາເມຣິກາສັ່ງປິດສະຖານກົງສູນໃຫຍ່ຂອງ ສປ.ຈີນ ທີ່ເມືອງຮິວສະຕັນ, ການປຸກລະດົມຕໍ່ຕ້ານບໍລິສັດຈີນໃນທົ່ວໂລກ, ການໂຈມຕີພັກຄອມມູນິດຈີນຢ່າງດຸເດືອດ ແລະ ການແຊກແຊງວຽກງານພາຍໃນຂອງຈີນ.

ທ່ານ ຫວັງອີ້ ກ່າວວ່າສາຍພົວພັນຈີນ-ສ.ອາເມຣິກາ ກຳລັງປະເຊີນກັບສິ່ງທ້າທ້າຍອັນໃຫຍ່ຫຼວງ ນັບຕັ້ງແຕ່ການສ້າງສາຍພົວພັນທາງການທູດຮ່ວມກັນມາ, ຂະນະທີ່ການແລກປ່ຽນ ແລະ ການຮ່ວມມືໃນຫຼາຍດ້ານກໍ່ກຳລັງຕິດຂັດໄປນຳ.

ທ່ານ ຫວັງອີ້ ກ່າວວ່າ ສາເຫດສຳຄັນຄືນັການເມືອງ ສ.ອາເມຣິກາບາງຄົນມີອະຄະຕິ ແລະ ບໍ່ເປັນມິດກັບຈີນ ໃຊ້ອຳນາດໃນການສ້າງເລື່ອງໃສ່ຮ້າຍປ້າຍສີຈີນ ແລະ ໃຊ້ຄຳກ່າວອ້າງຕ່າງໆຂັດຂວາງສາຍພົວພັນປົກກະຕິກັບຈີນ ເຊິ່ງນັກການເມືອງເຫຼົ່ານັ້ນມີຈຸດໝາຍຄືຈ່ອງດຶງຈີນ ແລະ ສ.ອາເມຣິກາເຂົ້າສູ່ຄວາມຂັດແຍ່ງ ແລະ ການປະເຊີນໜ້າຄັ້ງໃໝ່ ອັນຈະນຳພາໂລກເຂົ້າສູ່ຄວາມສັບສົນວຸ້ນວາຍ ແລະ ແຕກແຍກອີກຄັ້ງ.

ທ່ານ ຫວັງອີ ກ່າວວ່າຈີນບໍ່ມີເຫດຕະນາໃດໆທີ່ຈະສ້າງສິ່ງທີ່ຮຽກວ່າ ສົງຄາມເຢັນຄັ້ງໃໝ່ ເນື່ອງຈາກສິ່ງນັ້ນຂັດຕໍ່ຜົນປະໂຫຍດຂັ້ນພື້ນຖານຂອງປະຊາຊົນຈີນ ແລະ ອາເມຣິກາ ແລະ ເສັ້ນທາງການພັດທະນາ ແລະ ຄວາມກ້າວໜ້າຂອງໂລກ.

HTML tutorial