ສ.ອາເມຣິກາຂຶ້ນບັນຊີດຳຄະນະຜູ້ບໍລິຫານຮົງກົງ, ດ້ານຮົງກົງປະນາມວ່າໜ້າບໍ່ອາຍ ແລະ ຈອງຫອງ

ລາຍງານ 8 ສິງຫາ 2020, ກະຊວງການເງິນ ແລະ ກະຊວງການຕ່າງປະເທດ ສ.ອາເມຣິກາ ອອກຖະແຫຼງການເມື່ອວັນສຸກ (7 ສິງຫາ) ທີ່ຜ່ານມາ ເລື່ອງການຂຶ້ນບັນຊີດຳເຈົ້າໜ້າທີ່ລະດັບສູງຂອງຄະນະຜູ້ບໍລິການເຂດປົກຄອງພິເສດຮົງກົງຊຸດປັດຈຸບັນ 11 ຄົນ ເຊິ່ງເປັນໜຶ່ງໃນມາດຕະການຕາມທີ່ລະບຸຢູ່ໃນກົດໝາຍ ວ່າດ້ວຍສິດທິມະນຸດ ແລະ ປະຊາທິປະໄຕຮົງກົງ ທີ່ທ່ານ ໂດໂນ ທຣຳ ໄດ້ລົງລາຍເຊັນເມື່ອເດືອນພະຈິກ 2019 ແລະ ອີກສະບັບໜຶ່ງເມື່ອເດືອນກໍລະກົດປີນີ້ ວ່າລັດຖະບານ ສ.ອາເມຣິກາ ອາດໃຊ້ມາດຕະການຂວໍ້າບາດຕໍ່ເຈົ້າໜ້າທີ່ຄົນໃດກໍ່ຕາມຂອງລັດຖະບານຈີນ ທີ່ມີພຶດຕິກຳກົດຂີ່ຂົ່ມເຫງປະຊາຊົນຮົງກົງ.

ສຳລັບບຸກຄົນທີ່ມີຊື່ຢູ່ໃນບັນຊີດຳຄັ້ງນີ້ ແມ່ນລວມເຖິງທ່ານ ນາງ ແຄຣີ ແລມ ຫົວໜ້າຄະນະຜູ້ບໍລິຫານຮົງກົງ, ທ່ານ ນາງ ເທເຣຊາ ເສິງ ລັດຖະມົນຕີຍຸຕິທຳ, ທ່ານ ຄຣິສ ຖັງ ຜູ້ບັນຊາການຫ້ອງການຕຳຫຼວດຮົງກົງ, ທ່ານ ອີຣິກ ເສິນ ເລຂາທິການຄະນະກຳມາທິການຄວາມໝັ້ນຄົງແຫ່ງຊາດ ແລະ ເຈົ້າໜາ້ທີ່ລະດັບສູງຂອງ ສປ.ຈີນອີກ 2 ຄົນ ທີ່ກ່ຽວຂ້ອງໂດຍກົງກັບວຽກງານດ້ານຄວາມໝັ້ນຄົງໃນຮົງກົງຄື: ທ່ານ ເຈິ້ງ ຢານສົງ ຜູ້ອຳນວຍການສຳນັກງານຄວາມໝັ້ນຄົງແຫ່ງຊາດ ແລະ ທ່ານ ໂລວ ຮຸ້ຍໜິງ ຜູ້ອຳນວຍການຫ້ອງການປະສານງານຂອງລັດຖະບານຈີນປະຈຳຮົງກົງ.

ໂດຍ ລັດຖະບານ ສ.ອາເມຣິກາກ່າວເຖິງທ່ານ ນາງ ແຄຣີ ແລມວ່າ ຄືຜູ້ຮັບຜິດຊອບໂດຍກົງຕໍ່ການບັງຄັບໃຊ້ນະໂຍບາຍພາຍໃນຮົງກົງ ໃຫ້ເປັນໄປຕາມແນວທາງຂອລັດຖະບານຈີນ ທີ່ກົດຂີ່ຂົ່ມເຫງເສລີພາບ ແລະ ຂະບວນການປະຊາທິປະໄຕຂອງຮົງກົງ ໃຫ້ຢູ່ພາຍໃຕ້ກົດໝາຍການຮັກສາຄວາມໝັ້ນແຫ່ງຊາດທີ່ອອກໂດຍ ສປ.ຈີນ ເຊິ່ງບໍ່ພຽງແຕ່ເປັນການທຳລາຍພື້ນຖານການປົກຄອງຕົນເອງຂອງຮົງກົງ ແຕ່ຍັງເປັນການລ່ວງລ້ຳສິດທິຂັ້ນພື້ນຖານຂອງປະຊາຊົນອີກດ້ວຍ.

ຕໍ່ມາທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວວ່າການດຳເນີນການຄັ້ງນີ້ ຄືການສົ່ງສັນຍານທີ່ຊັດເຈນໄປເຖິງເຈົ້າໜ້າທີ່ລະດັບສູງໃນຮົງກົງ ວ່າສິ່ງທີ່ກຳລັງດຳເນີນການຢູ່ນັ້ນເປັນເລື່ອງທີ່ບໍ່ສາມາດຍອມຮັບໄດ້ ແລະ ເປັນການຢ້ຳຄືນຈຸດຢືນຂອງ ສ.ອາເມຣິກາ ວ່າຈະຢູ່ຄຽງຂ້າງປະຊາຊົນຮົງກົງ ທີ່ເຈັບປວດຈາກການຕ້ອງຢູ່ພາຍໃຕ້ການກົດຂີ່ຂົ່ມເຫງຂອງພັກຄອມມູນິດຈີນມາເປັນເວລາຍາວນານ.

ໃນດ້ານຂອງສຳນັກງານເລຂາທິການຄະນະຜູ້ບໍລິຫານຮົງກົງ ໄດ້ອອກຖະແຫຼງການໃນວັນເສົານີ້ ວ່າມາດຕະການດັ່ງກ່າວຂອງລັດຖະບານ ສ.ອາເມຣິກາ ບໍ່ມີຄວາມລະອາຍ, ໜ້າລັງກຽດ, ຈອງຫອງ ແລະ ປ່າເຖື່ອນ ໂດຍທ່ານ ເອັດເວິດ ເຢົາ ລັດຖະມົນຕີການຄ້າຮົງກົງ ກ່າວວ່າກົດໝາຍຄວາມໝັ້ນຄົງແຫ່ງຊາດ ທີ່ມີຜົນບັງຄັບໃຊ້ມາຕັ້ງແຕ່ວັນທີ 30 ມິຖຸນາ ທີ່ຜ່ານມານັ້ນ ເປັນເລື່ອງພາຍໃນຂອງຮົງກົງ ແລະ ສປ.ຈີນຢ່າງຊັດເຈນ, ຂະນະທີ່ມາດຕະການຂວ້ຳບາດຄັ້ງນີ້ບໍ່ພຽງແຕ່ເປັນການດຳເນີນການຝ່າຍດຽວຕາມລຳພັງໃຈ ຍັງສະແດງເຖິງຄວາມໄຮ້ອະລິຍະທຳຂອງລັດຖະບານ ສ.ອາເມຣິກາ ໃນການເຜີຍແຜ່ຂໍ້ມູນສ່ວນບຸກຄົນທີ່ລວມເຖິງເລກບັດປະຊາຊົນ ໂດຍບໍ່ໄດ້ຮັບອະນຸຍາດຈາກເຈົ້າຂອງ.

ເຊິ່ງທ່ານ ເອັດເວິດ ເຢົາ ກ່າວວ່າ ເລື່ອງນີ້ຈະສົ່ງຜົນກະທົບຕໍ່ສາຍພົວພັນລະຫວ່າງ ສ.ອາເມຣິກາ ແລະ ຮົງກົງຢ່າງແນ່ນອນ ແລະ ເປັນລາງບໍ່ດີຫຼາຍຕໍ່ການລົງທຶນຂອງ ສ.ອາເມຣິກາໃນຮົງກົງ ແຕ່ບໍ່ໄດ້ຂະຫຍາຍຄວາມໝາຍເພີ່ມເຕີມ.

ໃນດ້ານຂອງທ່ານ ໂລວ ຮຸ້ຍໜິງ ຜູ້ອຳນວຍການຫ້ອງການປະສານງານຂອງລັດຖະບານຈີນ ປະຈຳຮົງກົງ ກ່າວວ່າການມີຊື່ຢູ່ໃນບັນຊີດຳຂອງ ສ.ອາເມຣິກາຄັ້ງນີ້ ໝາຍຄວາມວ່າຕົນໄດ້ລົງມືກະທຳໃນສິ່ງທີ່ເໝາະສົມແລ້ວສຳລັບຮົງກົງ ແລະ ຢືນຢັນບໍ່ມີຊັບສິນຢູ່ໃນ ສ.ອາເມຣິກາ ແຕ່ກ່າວສຽດສີວ່າ ຖ້າລັດຖະບານ ສ.ອາເມຣິກາຕ້ອງການ ຕົນຈະໂອນເງິນໄປໃຫ້ອາຍັດລ້າໆ 100 ໂດລາສະຫະລັດ ແລະ ປິດທ້າຍວ່າ ຫາກ ສ.ອາເມຣິກາໝັ້ນໃຈວ່າມາດຕະການນີ້ຈະກົດດັນໃຫ້ຈີນປະນີປະນອມ ຖືເປັນການຄິດຜິດພາດ.

HTML tutorial