ຫວຽດນາມມີຜູ້ຕິດໂຄວິດແລ້ວເກືອບແປດຮ້ອຍຄົນ ແລະ ເສຍຊີວິດແລ້ວ 10 ຄົນ

ລາຍງານ 8 ສິງຫາ 2020, ກະຊວງສາທາລະນະສຸກຫວຽດນາມອອກຖະແຫຼງການ ກ່ຽວກັບສະຖານະການການແຜ່ລະບາດຂອງພະຍາດໂຄວິດ-19 ພາຍໃນປະເທດ ວ່າມີຜູ້ຕິດເຊື້ອສະສົມ 789 ຄົນແລ້ວ ໃນຈຳນວນດັ່ງກ່າວ ມີ 5 ຄົນໄດ້ຮັບການຢືນຢັນວ່າຕິດເຊື້ອເມື່ອຕອນເຊົ້າຂອງວັນເສົານີ້ ໂດຍຜູ້ຕິດເຊື້ອກຸ່ມຫຼ້າສຸດຍັງຖືວ່າມີການເຊື່ອມໂຍງກັບດານັງຢູ່ ເຊິ່ງເປັນສູນກາງຂອງການແຜ່ລະບາດຄັ້ງໃໝ່ ພາຍຫຼັງພົບຜູ້ຕິດເຊື້ອຈາກພາຍໃນປະເທດເປັນຄົນທຳອິດໃນຮອບ 99 ວັນ ເມື່ອວັນທີ 25 ກໍລະກົດ ທີ່ຜ່ານມາ.

ໃນຈຳນວນຜູ້ຕິດເຊື້ອສະສົມ 789 ຄົນ ນັບຕັ້ງແຕ່ມີການຢືນຢັນພົບຜູ້ຕິດເຊື້ອຄົນທຳອິດເມື່ອທ້າຍເດືອນມັງກອນ ທີ່ຜ່ານມາ ໃນຈຳນວນນີ້ 316 ຄົນເປັນຜູ້ທີ່ເດີນທາງມາຈາກຕ່າງປະເທດ ແລະ ໃນຈຳນວນຜູ້ຕິດເຊື້ອພາຍໃນປະເທດ 473 ຄົນ ເປັນການຕິດເຊື້ອແບບເປັນກຸ່ມກ້ອນຂະໜາດໃຫຍ່ຈາກເມືອງດານັງ 333 ຄົນ.

ຂະນະທີ່ຈຳນວນຜູ້ທີ່ໄດ້ຮັບການປິ່ນປົວດີແລ້ວມີ 395 ຄົນ ແຕ່ຜູ້ເສຍຊີວິດໄດ້ເພີ່ມຂຶ້ນເປັນ 10 ຄົນແລ້ວ ເຊິ່ງສ່ວນໃຫຍ່ເປັນຜູ້ສູງອາຍຸ ແລະ ມີໂລກປະຈຳຕົວ ເຊິ່ງຜູ້ເສຍຊີວິດຄົນທຳອິດແມ່ນເມື່ອວັນທີ 31 ກໍລະກົດ ທີ່ຜ່ານມາ, ນອກຈາກນີ້ ລັດຖະບານຫວຽດນາມ ຍັງໄດ້ເພີ່ມມາດຕະການກຽມພ້ອມຮັບມືກັບສະຖານະການອັນໜັກໜ່ວງທີ່ສຸດ ດ້ວຍການກຽມສະໜາມກິລາໃນຮົ່ມທີ່ດານັງ ໃຫ້ເປັນໂຮງໝໍສະໜາມຂະໜາດ 800 ຕຽງອີກດ້ວຍ.

HTML tutorial