ຈີນຂຶ້ນບັນຊີດຳພົນລະເມືອງ ສ.ອາເມຣິກາ 11 ຄົນ ທີ່ມີພຶດຕິກຳແຊກແຊງວຽກງານພາຍໃນ

ລາຍງານ 10 ສິງຫາ 2020, ທ່ານ ຈ້າວ ລີຈ້ຽນ ໂຄສົກກະຊວງການຕ່າງປະເທດຈີນ ກ່າວໃນຕອນໜຶ່ງຂອງການຖະແຫຼງປະຈຳວັນຈັນນີ້ ວ່າລັດຖະບານຈີນມີມະຕິໃຫ້ຂຶ້ນບັນຊີດຳບຸກຄົນສັນຊາດ ສ.ອາເມຣິກາ 11 ຄົນ ທີ່ມີພຶດຕິກຳກົດຂີ່ຂົ່ມເຫງ ແລະ ແຊກແຊງຢ່າງຮ້າຍແຮງຕໍ່ວຽກງານພາຍໃນຂອງຮົງກົງ ເຊິ່ງເປັນສ່ວນໜຶ່ງຂອງ ສປ.ຈີນ.

ເຊິ່ງບຸກຄົນທີ່ຢູ່ໃນລາຍຊື່ລວມມີສະມາຊິກສະພາສູງລະດັບແກນນຳຂອງພັກຣີພົບລິກັນຄື ທ່ານ ມາໂກ ຣູບີໂອ ແລະ ທ່ານ ເທັດ ຄຼູສ ເຊິ່ງທັງສອງຢູ່ໃນບັນຊີດຳບຸກຄົນແຊກແຊງວຽງງານພາຍໃນຂອງເຂດປົກຄອງຕົນເອງຊິນຈຽງອຸຍກູ ທີ່ຈີນປະກາດເມື່ອເດືອນກໍລະກົດ ທີ່ຜ່ານມາ ເທົ່າກັບວ່າ ທ່ານ ມາໂກ ຣູບິໂອ ແລະ ທ່ານ ເທັດ ຄຼູສຖືກຂວ້ຳບາດເພີ່ມອີກ.

ນອກຈາກນີ້, ຍັງມີທ່ານ ເຄນເນັດ ຣອດ ຜູ້ອຳນຍການອົງການສິດມະນຸດ (Human Rights Watch) ແລະ ທ່ານ ໄມເຄິນ ອັບຣາໂມວິດ ປະທານຂອງ Freedom House ໜຶ່ງໃນອົງກອນອິດສະຫຼະດ້ານວິຊາການທີ່ໄດ້ຮັບງົບປະມານສະໜັບສະໜູນຈາກລັດຖະບານ ສ.ອາເມຣິກາ, ໂດຍທ່ານ ຈ້າວ ລີຈ້ຽນກ່າວແບບກົງໄປກົງມາວ່າ ການຂຶ້ນບັນຊີດຳພົນລະເມືອງ ສ.ອາເມຣິກາ 11 ຄົນໃນຄັ້ງນີ້ ຄືການຕອບໂຕ້ທີ່ລັດຖະບານ ສ.ອາເມຣິກາຂຶ້ນບັນຊີດຳເຈົ້າໜ້າທີ່ລະດັບສູງຂອງຮົງກົງ ແລະ ເຈົ້າໜ້າທີ່ລະດັບສູງຂອງ ສປ.ຈີນ ໃນຮົງກົງຈຳນວນເທົ່ານັ້ນ ເຊິ່ງໜຶ່ງໃນນັ້ນຄືທ່ານ ນາງ ແຄຣີ ແລມ ຫົວໜ້າຄະນະຜູ້ບໍລິຫານຮົງກົງຄົນປັດຈຸບັນ.

ໃນເວລາດຽວກັນ ຫ້ອງການຕຳຫຼວດຮົງກົງຍັງບໍ່ສະແດງຈຸດຢືນຕໍ່ກັບການຈັບກຸມທ່ານ ຈິມມີ ໄຫຼ່ ນັກທຸລະກິດສື່ສານມວນຊົນຊື່ດັງ ເຊິ່ງເປັນຜູ້ສ້າງຕັ້ງ ແລະ ເປັນເຈົ້າຂອງ Apple Daily ທີ່ເນັ້ນນຳສະເໜີຂ່າວວິຈານທັງຄະນະຜູ້ບໍລິຫານຮົງກົງ ແລະ ລັດຖະບານຈີນ ແຕ່ກ່າວພຽງວ່າມີການຈັບກຸມຜູ້ຊາຍ 9 ຄົນ ອາຍຸລະຫວ່າງ 23-72 ປີ ຂໍ້ຫາສົມຮູ້ຮ່ວມຄິດກັບກອງກຳລັງຕ່າງປະເທດ ເຊິ່ງຖືເປັນການລະເມີດກົດໝາຍຄວາມໝັ້ນຄົງແຫ່ງຊາດ ແລະ ຫຼັງຈາກນັ້ນກໍ່ມີການກວດຄົ້ນສຳນັກງານຂອງ Apple Daily.

HTML tutorial