ຈີນວິຈານ ສ.ອາເມຣິກາ ວ່າປະຖິ້ມຄວາມເຈັບປວດປະຊາຊົນ ມາຫາຜົນປະໂຫຍດຢູ່ໄຕ້ຫວັນ

ລາຍງານ 12​ ສິງຫາ 2020, ຕໍ່ກັບການທີ່ທ່ານ ອາເລັກ ອາຊາ ລັດຖະມົນຕີກະຊວງສາທາລະນະສຸກ ສ.ອາເມຣິກາ ເດີນທາງຢ້ຽມຢາມນະຄອນໄທເປ, ໄຕ້ຫວັນຢ່າງເປັນທາງການເມື່ອຕົ້ນອາທິດນີ້ ເພື່ອປະຕິບັດພາລະກິດໃນຖານະຜູ້ແທນຂອງຜູ້ ໂດໂນ ທຣຳ ປະທານປະເທດ ສ.ອາເມຣິກາ ແລະ ສ້າງປະຫວັດສາດເປັນເຈົ້າໜ້າທີ່ລະດັບລັດຖະມົນຕີຄົນທຳອິດຂອງ ສ.ອາເມຣິກາ ທີ່ຢ້ຽມຢາມໄຕ້ຫວັນຢ່າງເປັນທາງການ ນັບຕັ້ງແຕ່ລັດຖະບານ ສ.ອາເມຣິກາ ສ້າງຕັ້ງສາຍພົວພັນການທູດກັບລັດຖະບານຈີນ ບົນພື້ນຖານຂອງຫຼັກການຈີນດຽວ ເມື່ອປີ 1979.

ທ່ານ ຈ້າວ ລີຈ້ຽນ ໂຄສົກກະຊວງການຕ່າງປະເທດຈີນ ກ່າວເຖິງເລື່ອງນີ້ລະຫວ່າງການຖະແຫຼງປະຈຳວັນພຸດນີ້ວ່າ ວິກິດການລະບາດຂອງໂຄວິດ-19 ໃນ ສ.ອາເມຣິກາ ຍັງຢູ່ໃນລະດັບທີ່ບໍ່ສາມາດຄວບຄຸມໄດ້ ແຕ່ລັດຖະມົນຕີກະຊວງສາທາລະນະສຸກຜັດປະຖິ້ມຄວາມເຈັບປວດຂອງປະຊາຊົນອາເມຣິກາຫຼາຍລ້ານຄົນ ເດີນທາງມາຍັງໄຕ້ຫວັນເພື່ອສະແດງລະຄອນການເມືອງ ແລະ ການຢ້ຽມຢາມໄຕ້ຫວັນຂອງທ່ານ ອາເລັກ ອາຊາ ເປັນອີກຄັ້ງໜຶ່ງທີ່ ສ.ອາເມຣິກາ ສະແດງໃຫ້ປະຊາຄົມໂລກໄດ້ເຫັນແຈ້ງວ່າ ໃນສາຍຕາຂອງນັກການເມືອງ ສ.ອາເມຣິກາຊີວິດປະຊາຊົນອາເມຣິກາບໍ່ມີຄວາມໝາຍຄວາມສຳຄັນ ເມື່ອທຽບກັບການສະແຫວງຫາຜົນປະໂຫຍດທາງການເມືອງຢ່າງເຫັນແກ່ຕົວ.

ຄຳຖະແຫຼງດັ່ງກ່າວຂອງໂຄສົກກະຊວງການຕ່າງປະເທດຈີນ ເກີດຂຶ້ນພາຍຫຼັງທີ່ທ່ານ ອາເລັກ ອາຊາ ກ່າວທີ່ນະຄອນໄທເປ ເມື່ອວັນອັງຄານ ທີ່ຜ່ານມາ ວ່າຫາກໄຕ້ຫວັນເປັນສະຖານທີ່ທຳອິດຂອງໂລກທີ່ພົບຜູ້ຕິດເຊື້ອໂຄວິດ-19 ສ.ອາເມຣິກາຈະສາມາດຄວບຄຸມສະຖານະການໄດ້ງ່າຍ ແລະ ໄວກວ່ານີ້.

HTML tutorial