ອິດສະຣາແອນໂຈມຕີເຂດກາຊາ ຕອບໂຕ້ກຸ່ມຮາມາສສົ່ງປູມເປົ້າລອຍຫ້ອຍລະເບີດຂ້າມຟາກ

ລາຍງານ 13 ສິງຫາ 2020, ກອງກຳລັງປ້ອງກັນຕົນເອງອິດສະຣາແອນ (IDF) ອອກຖະແຫຼງການໃນວັນພະຫັດນີ້ ວ່າກອງກຳລັງທາງບົກ ແລະ ທາງອາກາດໄດ້ປະຕິບັດການໂຈມຕີຕໍ່ເປົ້າໝາຍທີ່ສະເພາະເຈາະຈົງໃນເຂດກາຊາ ເປັນຄືນທີ່ສອງຕິດຕໍ່ກັນ ເພື່ອທຳລາຍເຂດທີ່ໝັ້ນຂອງກຸ່ມຮາມາສ ທີ່ປົກຄອງດິນແດນດັ່ງກ່າວ ໂດຍັງບໍ່ມີລາຍງານຄວາມເສຍຫາຍຢ່າງເປັນທາງການ.

ປະຕິບັດການທາງທະຫານດັ່ງກ່າວຂອງ IDF ເກີດຂຶ້ນເພື່ອຕອບໂຕ້ທີ່ອີກຝ່າຍຍັງບໍ່ຢຸດສົ່ງປູມເປົ້າລອຍທີ່ຫ້ອຍວັດຖຸລະເບີດ ໃຫ້ລອຍຂ້າມເຂດແດນໄປຍັງອິດສະຣາແອນແລ້ວກວ່າ 20 ລູກ ນັບຕັ້ງແຕ່ຕົ້ນອາທິດນີ້ ໂດຍປູມເປົ້າສ່ວນໃຫຍ່ລະເບີດ ແລະ ກໍ່ໃຫ້ເກີດໄຟໄໝ້ພື້ນທີ່ໃນອິດສະຣາແອນ, ດ້ານກຸ່ມຮາມາສບໍ່ໄດ້ຍອມຮັບ ຫຼື ປະຕິເສດການເປັນຜູ້ສົ່ງປູມເປົ້າຄັ້ງນີ້ ທີ່ອິດສະຣາແອນກ່າວຫາມາຕະຫຼອດວ່າ ເປັນຍຸດທະສາດໃໝ່.

ເຊິ່ງອິດສະຣາແອນ ກັບກຸ່ມຮາມາສຮູ້ຮົບກັນມາແລ້ວນັບຄັ້ງບໍ່ຖ້ວນໃນຮອບ 1 ທົດສະວັດທີ່ຜ່ານມາ ເຖິງແມ່ນວ່າສະຫະປະຊາຊາດ, ເອຢິບ, ກາຕາ ຮ່ວມກັນເຈລະຈາໃຫ້ທັງສອງຝ່າຍບັນລຸຂໍ້ຕົກລົງຢຸດຍິງຄັ້ງໃໝ່ ເມື່ອປີທີ່ຜ່ານມາ ແຕ່ໃນທາງປະຕິບັດຖືໄດ້ວ່າບໍ່ມີຜົນຫຍັງ.

ພາບ: ພື້ນທີ່ໄຟໄໝ້ ຈາກລະເບີດທີ່ຫ້ອຍມາກັບປູມເປົ້າ ອີງຕາມການເຜີຍແຜ່ຂອງ IDF

ພາບ: ປູມເປົ້າລອຍທີ່ຫ້ອຍລະເບີດ ເຜີຍແຜ່ໂດຍ IDF

HTML tutorial