ຈີນກວດພົບຮ່ອງຮອຍເຊື້ອພະຍາດໂຄວິດ ໃນອາຫານແຊ່ແຂງນຳເຂົ້າ

ລາຍງານ 13 ສິງຫາ 2020, ທາງການທ້ອງຖິ່ນຂອງຈີນ ແຈ້ງວ່າໄດ້ນຳເອົາຕົວຢ່າງຈາກສ່ວນໜັງຂອງປີກໄກ່ອາຫານແຊ່ແຂງ ນຳເຂົ້າຈາກປະເທດບຣາຊິນ ເພື່ອຈຳໜ່າຍໃນເມືອງເສິນເຈິ້ນ ທາງພາກໃຕ້ຂອງຈີນ ແລະ ຍັງມີບັນຈຸພັນອາຫານກຸ້ງແຊ່ແຂງນຳເຂົ້າຈາກປະເທດເອກວາດໍ ເພື່ອຈຳໜ່າຍໃນເມືອງຊີອານ ທາງພາກຕາເວັນຕົກສຽງເໜືອຂອງຈີນ ນຳມາກວດພົບວ່າມີຮ່ອງຮອຍຂອງພະຍາດໂຄວິດ-19.

ກ່ອນໜ້ານີ້ໜຶ່ງວັນ ເຄີຍມີການກວດພົບມາແລ້ວສຳລັບຮ່ອງຮອຍຂອງພະຍາດໂຄວິດ-19 ໃນບັນຈຸພັນຂອງກຸ້ງແຊ່ແຂງນຳເຂົ້າຈາກເອກວາດໍ ໃນມົນທົນອັນຮຸຍ ທາງພາກຕາເວັນອອກຂອງຈີນ ເຮັດໃຫ້ທາງການຈີນເລັ່ງກວດສອບຢ່າງລະອຽດຕາມທ່າເຮືອ ທ່າມກາງຄວາມຕື່ນຢ້ານອາຫານແຊ່ແຂງນຳເຂົ້າຈາກຕ່າງປະເທດ.

ສາທາລະນະສຸກເມືອງເສິນເຈິ້ນຢືນຢັນວ່າ ໄດ້ມີການກວດທຸກຄົນທີ່ອາດມີການສຳຜັດກັບອາຫານທີ່ອາດປົນເປື້ອນພະຍາດໂຄວິດ-19 ຈາກການນຳເຂົ້າ ເຊິ່ງຜົນການກວດພົບວ່າເປັນລົບ ນັ້ນກໍ່ຄືບໍ່ມີເຊື້ອ.

ສ່ວນສະຖານທູດບຣາຊິນໃນນະຄອນຫຼວງປັກກິ່ງ ຍັງບໍ່ສະແດງຄວາມຄິດເຫັນໃດໆຕໍ່ບັນຫາດັ່ງກ່າວ ເຊັ່ນດຽວກັບສະຖານທູດເອກວາດໍ.

HTML tutorial