ລັດເຊຍໄດ້ຫຼຸດຜ່ອນການຮັບເງິນໂດລາ ຈາກການສົ່ງອອກໄປຍັງປະເທດຈີນ

ລາຍງານ 14 ສິງຫາ 2020, ອີງຕາມການລາຍງານຂອງສຳນັກຂ່າວ Bloomberg ລາຍງານວ່າ ຂະນະນີ້ລັດເຊຍໄດ້ຮັບເງິນເອີໂຣຫຼາຍກວ່າເງິນໂດລາສະຫະລັດ ໃນການເຮັດທຸລະກຳການສົ່ງອອກໄປຍັງປະເທດຈີນ ສອດຄ່ອງກັບການທີ່ທ່ານ ວະລາດິເມຍ ປູຕິນ ປະທານປະເທດ ລັດເຊຍທີ່ປະຕິບັດຕາມສັນຍາທີ່ຈະຫຼຸດຜ່ອນການເພິ່ງພາສະກຸນເງິນໂດລາສະຫະລັດ.

ສິນຄ້າກວ່າ 50% ທີ່ຈີນຊື້ຈາກລັດເຊຍໄຕມາດທຳອິດ ແມ່ນມີການກຳນົດລາຄາກັນດ້ວຍສະກຸນເງິນເອີໂຣ ຕາມຂໍ້ມູນຂອງທະນາຄານແຫ່ງລັດເຊຍທີ່ເຜີຍແຜ່ໃນເດືອນນີ້ ສ່ວນແບ່ງຂອງສະກຸນເງິນເອີໂຣໃນການຊຳລະສຳລັບການສົ່ງອອກໄປຍັງສະຫະພາບເອີຣົບເພີ່ມຂຶ້ນເປັນ 43% ຈາກ 38% ໃນໄລຍະທ້າຍປີທີ່ຜ່ານມາ.

ການປ່ຽນແປງດັ່ງກ່າວເປັນສ່ວນໜຶ່ງຂອງຍຸດທະສາດ ການຫຼຸດຜ່ອນການຜູກຂາດສະກຸນເງິນໂດລາສະຫະລັດ (de-dollarize) ໃຫ້ກັບເສດຖະກິດລັດເຊຍ ແລະ ຫຼຸດຜ່ອນຄວາມອ່ອນໄຫວຕໍ່ໄພຄຸກຄາມຈາກມາດຕະການຂວ້ຳບາດຂອງ ສ.ອາເມຣິກາ, ເຊິ່ງມາດຕະການດັ່ງກ່າວມີທ່າອ່ຽງໄປໃນທາງທີ່ດີຂຶ້ນ ຈາກການເຄື່ອນໄຫວຂອງ Rosnft PJSC ຍັກໃຫຍ່ດ້ານນ້ຳມັນຂອງລັດເຊຍ ທີ່ໂອນສັນຍາການສົ່ງອອກທັງໝົດເປັນສະກຸນເງິນເອີໂຣໃນປີທີ່ຜ່ານມາ ເຊິ່ງນ້ຳມັນເຊື້ອໄຟ ກັບ ໄມ້ເປັນສິນຄ້າສົ່ງອອກຫຼັກໄປຍັງປະເທດຈີນ.

ເຖິງຢ່າງໃດກໍ່ຕາມ, ການເຄື່ອນໄຫວດັ່ງກ່າວຂອງລັດເຊຍ ກໍ່ຍັງບໍ່ສາມາດຫຼຸດບົດບາດທີ່ພົ້ນເດັ່ນຂອງສະກຸນເງິນໂດລາສະຫະລັດໃນລະບົບການເງິນໂລກ ເນື່ອງຈາກສ່ວນແບ່ງຂອງການຊື້-ຂາຍສະກຸນເງິນໂດລາສະຫະລັດ ເພີ່ມຂຶ້ນເປັນ 88.3% ໃນປີ 2019 ຈາກ 87.6% ໃນປີ 2016 ຕາມລາຍງານຂອງທະນາຄານເພື່ອການຊຳລະເໜີລະຫວ່າງປະເທດ ອັດຕາສ່ວນຂອງທຶນສຳຮອງລະຫວ່າງປະເທດທີ່ຖືຄອງເປັນສະກຸນເງິນໂດລາຍັງກວມເອົາ 60% ໃນໄລຍະທົດສະວັດທີ່ຜ່ານມາ.

HTML tutorial