ສະຖານະການໂຄວິດໃນທົ່ວໂລກຍັງເພີ່ມທະວີ, ຂະນະທີ່ ສປປ.ລາວ ພົບຜູ້ຕິດເຊື້ອເພີ່ມອີກ 2 ຄົນ

ລາຍງານ 14 ສິງຫາ 2020, ອີງຕາມການລາຍງານຂອງຄະນະສະເພາະກິດຄວບຄຸມໂຄວິດ-19 ລະບຸວ່າ: ສປປ.ລາວ ພົບຜູ້ຕິດເຊື້ອພະຍາດໂຄວິດ-19 ເພີ່ມອີກ 2 ຄົນ ເຮັດໃຫ້ຈຳນວນຜູ້ຕິດເຊື້ອສະສົມໃນປະເທດເພີ່ມເປັນ 22 ຄົນ ແລະ ຍັງປິ່ນປົວຢູ່ 3 ຄົນ ທີ່ໂຮງໝໍມິດຕະພາບ, ນະຄອນຫຼວງວຽງຈັນ.

ເຊິ່ງ 2 ຄົນທີ່ຕິດເຊື້ອໃໝ່ນີ້ ແມ່ນບຸກຄົນທີ່ເດີນທາງກັບຈາກຕ່າງປະເທດທັງສອງ, ຜູ້ທີ່ໜຶ່ງເປັນເພດຊາຍ ອາຍຸ 30 ປີ ສັນຊາດລາວ ອາຊີບພະນັກກງານ ເດີນທາງມາຈາກໄຕ້ຫວັນ ຜ່ານທາງເກົາຫຼີໃຕ້, ຄົນທີສອງເປັນເພດຍິງ ອາຍຸ 25 ປີ ສັນຊາດລາວ ອາຊີບນັກສຶກສາ ເດີນທາງມາຈາກ ສ.ອາເມຣິກາ ຜ່ານທາງເກົາຫຼີໃຕ້ ໂດຍທັງສອງໂດຍສານຈາກເກົາຫຼີໃຕ້ກັບເຖິງປະເທດເມື່ອວັນທີ 12 ສິງຫາ ທີ່ຜ່ານມາ ດ້ວຍຖ້ຽວບິນດຽວກັນ QV922A ທີ່ມີຜູ້ໂດຍສານທັງໝົດ 115 ຄົນ ແລະ ໄດ້ເຂົ້າກັກຕົວທີ່ໂຮງແຮມ ຕາມມາດຕະການປ້ອງກັນການແຜ່ລະບາດຂອງພະຍາດໂຄວິດ-19 ທີ່ທາງການກຳນົດ.

ໃນດ້ານຂອງສະຖານະການການແຜ່ລະບາດໃນທົ່ວໂລກ ມີຜູ້ຕິດເຊື້ອສະສົມແລ້ວ 20,924,603 ຄົນ, ເສຍຊີວິດແລ້ວ 759,582 ຄົນ ນັບຕັ້ງແຕ່ພົບການລະບາດຄັ້ງທຳອິດໃນປະເທດຈີນ ເມື່ອເດືອນທັນວາ ປີທີ່ຜ່ານມາ, ໂດຍປະເທດທີ່ພົບຜູ້ຕິດເຊື້ອຫຼາຍທີ່ສຸດຄື ສ.ອາເມຣິກາ (5,249,155 ຄົນ), ບຣາຊິນ (3,224,876 ຄົນ), ອິນເດຍ (2,461,190 ຄົນ).

ພູມມິພາກອາເມຣິກາລາຕິນ ແລະ ຄາຣິບບຽນເປັນພູມມິພາກທີ່ໄດ້ຮັບຜົນກະທົບຮຸນແຮງທີ່ສຸດ ມີຜູ້ເສຍຊີວິດລວມກວ່າ 2 ແສນຄົນ, ຂະນະທີ່ຜູ້ເສຍຊີວິດເກືອບເຄິ່ງໜຶ່ງຂອງທົ່ວໂລກຢູ່ໃນ 4 ປະເທດໄດ້ແກ່: ສ.ອາເມຣິກາ (167,253 ຄົນ), ບຣາຊິນ (105,463 ຄົນ), ເມັກຊິກ (55,193 ຄົນ) ແລະ ອິນເດຍ (48.040 ຄົນ).

ນອກຈາກນີ້, ຕົວເລກຜູ້ເສຍຊີວິດຍັງເພີ່ມຂຶ້ນເປັນສອງເທົ່າ ນັບຕັ້ງແຕ່ວັນທີ 2 ມິຖຸນາ ທີ່ຜ່ານມາ ແລະ ພົບຜູ້ເສຍຊີວິດຫຼາຍກວ່າ 100,000​ ຄົນ ໃນໄລຍະ 17 ວັນທີ່ຜ່ານມາ.

HTML tutorial