ສ.ອາເມຣິກາບຸກຍຶດເຮືອນ້ຳມັນອີຣານ 4 ລຳ ທີ່ຈະສົ່ງໄປໃຫ້ເວເນຊູເອລາກາງທະເລ

ລາຍງານ 15 ສິງຫາ 2020, ກະຊວງຍຸຕິທຳ ສ.ອາເມຣິກາ ໃຊ້ອຳນາດອອກໝາຍຈັບ ທີ່ອະນຸມັດເມື່ອເດືອນທີ່ຜ່ານມາ ໃຫ້ຍຶດສິນຄ້າຈາກເຮືອບັນທຸກນ້ຳມັນ 4 ລຳປະກອບດ້ວຍເຮືອ Bella, Bering, Pandi ແລະ Luna ທີ່ມີສ່ວນກ່ຽວຂ້ອງກັບກອງທັບປະຕິວັດອີຣານ ເຊິ່ງເປັນອົງກອນທີ່ລັດຖະບານ ສ.ອາເມຣິກາ ຂຶ້ນບັນຊີດຳເປັນກຸ່ມກໍ່ການຮ້າຍ.

ລາຍງານຂອງ The Wall Street Journal ເມື່ອວັນທີ 13 ສິງຫາ ທີ່ຜ່ານມາ ລະບຸວ່າ ເຮືອທັງ 4 ລຳ ທີ່ຖືກເຈົ້າໜ້າທີ່ ສ.ອາເມຣິກາ ສະກັດຈັບກາງທະເລ ຕອນນີ້ກຳລັງຖືກນຳໄປທີ່ເມືອງຮິວສະຕັນ ລັດເທັກຊັສ ແຄມຝັ່ງອ່າວເມັກຊິກ ທາງພາກໃຕ້ຂອງ ສ.ອາເມຣິກາ.

ໃນເອກະສານຄຳຮ້ອງທີ່ຍື່ນຕໍ່ສານ ສ.ອາເມຣິກາລະບຸວ່າ ທ່ານ ມາ ໝູດ ມາດານິປູ ນັກທຸລະກິດອີຣານ ທີ່ມີສາຍພົວພັນກັບກອງທັບປະຕິວັດອີຣານ ໃຊ້ບໍລິສັດບັງໜ້າໃນຕ່າງປະເທດ ຈັດຈ້າງເຮືອຕ່າງປະເທດບັນທຸກນ້ຳມັນອີຣານໄປສົ່ງໃຫ້ເວເນຊູເອລາ ເພື່ອຫຼີກລ້ຽງມາດຕະການຂວ້ຳບາດອີຣານ.

ທ່ານ ໂຮຈາດ ໂຊຕານີ ເອກອັກຄະລັດຖະທູດອີຣານ ປະຈຳເວເນຊູເອລາ ລົງຂໍ້ຄວາມໃນ Twitter ເປັນພາສາແອັດສະປາຍວ່າ ຈາກລາຍງານທີ່ລະບຸວ່າ ເຮືອບັນທຸກນ້ຳມັນຂອງອີຣານຖືກຍຶດ ຖືເປັນການຫຼອກລວງ ແລະ ເປັນການເຮັດສົງຄາມຈິດຕະສາດຂອງ ສ.ອາເມຣິກາ ເຮືອເຫຼົ່ານັ້ນບໍ່ແມ່ນເຮືອຂອງອີຣານ ລວມທັງຄົນໃນເຮືອ ແລະ ທຸງທີ່ຕິດຢູ່ເຮືອບໍ່ກ່ຽວຂ້ອງຫຍັງກັບອີຣານ.

ເວເນຊູເອລາຕ້ອງເພິ່ງພາລາຍໄດ້ເກືອບທັງໝົດຈາກນ້ຳມັນ ແຕ່ການຜະລິດນ້ຳມັນພາຍໃນປະເທດຫຼຸດລົງປະມານ 1 ໃນ 4 ຈາກລະດັບໃນປີ 2008 ແລະ ເສດຖະກິດຂອງປະເທດລົ້ມລະລາຍ ຈາກພາວະເສດຖະກິດຫົດຕົວຕໍ່ເນື່ອງ 6 ປີ, ມາດຕະການຂວ້ຳບາດຂອງ ສ.ອາເມຣິກາ ຕໍ່ລັດຖະບານເວເນຊູເອລາ ພາຍໃຕ້ການນຳຂອງທ່ານ ປະທານປະເທດ ນິໂຄລັສ ມາດູໂຣ ເຮັດໃຫ້ເວເນຊູເອລາ ທີ່ເຄີຍກັນນ້ຳມັນພຽງພໍຕໍ່ຄວາມຕ້ອງການໃນປະເທດ ຕ້ອງຫັນໄປເພິ່ງພາການຊ່ວຍເຫຼືອຈາກປະເທດພັນທະມິດເຊັ່ນອີຣານ ສັດຕູຂອງ ສ.ອາເມຣິກາ ເພື່ອຫຼຸດຜ່ອນພາວະຂາດແຄນນ້ຳມັນເຊື້ອໄຟໃນປະເທດ, ໂດຍໃນຕົ້ນປີນີ້ ອີຣານໄດ້ສົ່ງເຮືອບັນທຸກນ້ຳມັນໄປໃຫ້ເວເນຊູເອລາຫຼາຍຖ້ຽວ ເພື່ອຊ່ວຍເຫຼືອຕາມສະພາບການດັ່ງກ່າວ.

HTML tutorial