UN ຂັດຂວາງ ສ.ອາເມຣິກາ ບໍ່ໃຫ້ຂະຫຍາຍເວລາເກືອດຫ້າມດຳເນີນການດ້ານອາວຸດກັບອີຣານ

ລາຍງານ 15 ສິງຫາ 2020, ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ປະຊຸມກັນເມື່ອວັນສຸກ (14 ສິງຫາ) ທີ່ຜ່ານມາ ເພື່ອພິຈາລະນາຍັດຕິທີ່ສະເໜີໂດຍ ສ.ອາເມຣິກາ ວ່າດ້ວຍການໃຫ້ຂະຫຍາຍເວລາມາດຕະການເກືອດຫ້າມດຳເນີນການໃດໆດ້ານອາວຸດກັບອີຣານ ຫຼື ເອີ້ນວ່າມາດຕະການປິດລ້ອມການອາວຸດຕໍ່ອີຣານ ໃຫ້ມີຜົນຕໍ່ໄປໂດຍບໍ່ມີກຳນົດ ຈາກການທີ່ເງື່ອນໄຂດັ່ງກ່າວກໍ່ເປັນສ່ວນໜຶ່ງຂອງຂໍ້ຕົກລົງນິວເຄຼຍ ສະບັບປີ 2015 ກຳລັງຈະໝົດອາຍຸໃນວັນທີ 18 ຕຸລານີ້, ໂດຍ UNSC ໄດ້ກຳນົດມາດຕະການປິດລ້ອມດ້ານອາວຸດຕໍ່ລັດຖະບານອີຣານ ຄັ້ງທຳອິດເມື່ອປີ 2007 ແລ້ວຕໍ່ມາມີການລວມເປັນສ່ວນໜຶ່ງຂອງຂໍ້ຕົກລົງນິວເຄຼຍ.

ເຖິງຢ່າງໃດກໍ່ຕາມ, ມີພຽງ ສ.ອາເມຮິກາ ທີ່ເປັນຜູ້ສະເໜີຍັດຕິ ແລະ ສາທາລະນະລັດໂດມິນິກັນເທົ່ານັ້ນທີ່ອອກສຽງສະໜັບສະໜູນ, ຂະນະທີ່ລັດເຊຍ ແລະ ຈີນ ໃຊ້ສິດຢຸດຢັ້ງໃນຖານະສະມາຊິກຖາວອນສະພາຄວາມໝັ້ນຄົງແຫ່ງສະຫະປະຊາຊາດ, ສ່ວນທີ່ເຫຼືອອີກ 11 ປະເທດ ລວມເຖິງສະມາຊິກຖາວອນອີກ 2 ປະເທດຄືຝຣັ່ງ ແລະ ອັງກິດ ຕະຫຼອດຮອດສະມາຊິກບໍ່ຖາວອນສຳຄັນຄືເຢຍລະມັນ ພ້ອມໃຈກັນງົດອອກສຽງ.

ໃນດ້ານຂອງທ່ານ ຈາງ ຈຸນ ເອກອັກຄະລັດຖະທູດຈີນ ປະຈຳ UN ກ່າວພາຍຫຼັງສຳເລັດການລົງມະຕິ ວ່າເປັນອີກຄັ້ງໜຶ່ງທີ່ UNSC ມີຈຸດຢືນຮ່ວມກັນວ່າ ຄວາມພະຍາຍາມກົດດັນພຽງຝ່າຍດຽວບໍ່ມີທາງສຳເລັດຜົນ, ຂະນະທີ່ລັດຖະບານ ສ.ອາເມຣິກາ ເຜີຍແຜ່ຖະແຫຼງການຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ວ່າ UNSC ລົ້ມແຫຼວໃນການປົກປ້ອງສັນຕິພາບ ແລະ ຄວາມໝັ້ນຄົງຂອງໂລກ ເຖິງຈະບໍ່ໄດ້ລະບຸວ່າ ສ.ອາເມຣິກາຈະດຳເນີນການແບບໃດຕໍ່ໄປ ແຕ່ມີຄວາມເປັນໄປໄດ້ສູງຫຼາຍ ວ່າ ສ.ອາເມຣິກາຈະມີມາດຕະການຂອງຕົນເອງທັງຕໍ່ສະຫະປະຊາຊາດ ແລະ ອີຣານ.

ຕໍ່ມາທຳນຽບປະທານປະເທດລັດເຊຍ ໄດ້ເຜີຍແຜ່ຖະແຫຼງການຂອງທ່ານ ວະລາດິເມຍ ປູຕິນ ປະທານປະເທດລັດເຊຍ ສະເໜີໃຫ້ຈັດກອງປະຊຸມລະຫວ່າງພາຄີຂໍ້ຕົກລົງນິວເຄຼຍອີຣານຄື: ລັດເຊຍ, ຈີນ, ອັງກິດ, ຝຣັ່ງ ແລະ ເຢຍລະມັນ ຕະຫຼອດຮອດອະດີດສະມາຊິກຄື ສ.ອາເມຣິກາ ເພື່ອຫຼີກລ້ຽງການເກີດຄວາມສ່ຽງຄັ້ງໃໝ່ຂອງການຍຸແຍ່ ແລະ ປະເຊີນໜ້າ.

ເຊິ່ງການລົງມະຕິດັ່ງກ່າວຂອງ UNSC ເກີດຂຶ້ນພຽງບໍ່ພໍເທົ່າໃດຊົ່ວໂມງ ພາຍຫຼັງທີ່ກະຊວງຍຸຕິທຳ ສ.ອາເມຣິກາ ຢືນຢັນການຍຶດນ້ຳມັນຫຼາຍກວ່າ 1 ລ້ານຖັງ ຈາກເຮືອບັນທຸກນ້ຳມັນ 4 ລຳຂອງອີຣານ ລະຫວ່າງເດີນທາງຜ່ານນ່ານນ້ຳຂອງ ສ.ອາເມຣິກາ ນອກຝັ່ງເມືອງຮິວສະຕັນ ລັດເທັກຊັສ ເພື່ອເດີນທາງໄປຍັງເວເນຊູເອລາ ຕາມໝາຍຈັບທີ່ສານລັດຖະບານກາງ ໃນນະຄອນຫຼວງວໍຊິງຕັນອະນຸມັດ ເມື່ອເດືອນທີ່ຜ່ານມາ ເນື່ອງຈາກເຮືອທັງ 4 ລຳເປັນຂອງທ່ານ ມາມູດ ມາດານິປູ ນັກທຸລະກິດອີຣານທີ່ມີສາຍພົວພັນທາງທຸລະກິດກັບກອງທັບປະຕິວັດອີຣານ ທີ່ ສ.ອາເມຣິກາ ຂຶ້ນບັນຊີດຳເປັນກຸ່ມກໍ່ການຮ້າຍ.

HTML tutorial