ລັດເຊຍເລີ່ມຜະລິດວັກແຊັງ Sputnik V ວັກແຊັງປ້ອງກັນໂຄວິດທີ່ຂຶ້ນທະບຽນອັນທຳອິດຂອງໂລກ

ລາຍງານ 15 ສິງຫາ 2020, ກະຊວງສາທາລະນະສຸກລັດເຊຍ ຖະແຫຼງໃນວັນເສົານີ້ ວ່າການຜະລິດວັກແຊັງປ້ອງກັນໂຄວິດ-19 ອັນທຳອິດຂອງໂລກໄດ້ເລີ່ມຂຶ້ນແລ້ວ ທີ່ໄດ້ຮັບການຕັ້ງຊື້ວ່າ Sputnik V ຕາມຊື່ດາວທຽມດວງອຳທິດຂອງໂລກ ທີ່ຜະລິດໂດຍລັດເຊຍ.

ວັກແຊັງດັ່ງກ່າວມີຊື່ຢ່າງເປັນທາງການວ່າ Gam-COVID-Vak ໄດ້ຮັບການພັດທະນາໂດຍສູນວິໄຈແຫ່ງຊາດກາມາລີຢາ (Gamaleya National Research Center) ໃນນະຄອນຫຼວງມົດສະກູ,​ ໂດຍມີສ່ວນປະກອບສອງຢ່າງ ທີ່ຕ້ອງສັກຫ່າງກັນສາມອາທິດ ເພື່ອກະຕຸ້ນການຕອບສະໜອງຂອງລະບົບພູມຄຸ້ມກັນຕໍ່ໂຄວິດ-19.

ໃນດ້ານຂອງທ່ານ ຄິຣິວ ເດິມິດທຣີບ (Kirill Dmitrev) ຜູ້ອຳນວຍການກອງທຶນຄວາມໝັ້ນຄົງແຫ່ງຊາດລັດເຊຍ ເຊິ່ງເປັນຜູ້ຄຸ້ມຄອງໂຄງການນີ້ເປີດເຜີຍວ່າ ລັດເຊຍໄດ້ຮັບການຍື່ນຂໍສັ່ງຊື້ວັກແຊັງດັ່ງກ່າວຫຼາຍກວ່າ 1 ພັນລ້ານຫຼອດຈາກ 20 ປະເທດ.

ກະຊວງສາທາະລະສຸກລັດເຊຍໄດ້ຂຶ້ນທະບຽນວັກແຊັງດັ່ງກ່າວ ພາຍຫຼັງຜ່ານການທົດລອງໄລຍະທີ 2 ໃນເດືອນມິຖຸນາ ແລະ ເດືອນກໍລະກົດມີການຕັດສິນໃຈວ່າການດຳເນີນການທົດລອງໄລຍະທີ 3 ບໍ່ຈຳເປັນ ເນື່ອງຈາກທຸກຢ່າງເປັນໄປຕາມຕ້ອງການແລ້ວ, ເຖິງຢ່າງໃດກໍ່ຕາມ ສິ່ງທີ່ສຳຄັນຄືຕ້ອງເຂົ້າໃຈວ່າ Sputnik V ຈະບໍ່ຖືກນຳໃຊ້ໂດຍທົ່ວໄປ ຈົນກວ່າຈະເຖິງເດືອນມັງກອນ 2021 ໂດຍຈະໃຊ້ເວລາທີ່ເຫຼືອອີກ 4-5 ເດືອນໃນການສັງເກດປະສິດທິພາບເພີ່ມເຕີມອີກຕໍ່ໄປ.

ການຕັດສິນໃຈເປີດໂຕ Sputnik V ດັ່ງກ່າວຂອງທາງການລັດເຊຍ ໄດ້ເຮັດໃຫ້ເກີດກະແສວິພາກວິຈານຈາກຕາເວັນຕົກ ແລະ ຜູ້ຊ່ຽວຊານດ້ານສຸຂະພາບບາງຄົນ ທີ່ລະບຸວ່ານັ້ນເປັນການເລັ່ງດ່ວນເກີນໄປ ແລະ ອາດເປັນອັນຕະລາຍ ເຊິ່ງນັ້ນລັດເຊຍກ່າວວ່າຖືເປັນການເຂົ້າໃຈຜິດສຳລັບບາງຄົນ ທີ່ຄິດວ່າວັກແຊັງນີ້ຈະນຳໃຊ້ໂດຍທົ່ວໄປທັນທີ ໃນຄວາມຈິງແລ້ວ ເບື່ອງຕົ້ນຈະໃຊ້ສະເພາະກັບຜູ້ທີ່ມີຄວາມສ່ຽງສູງທີ່ຈະຕິດໂຄວິດ-19 ເທົ່ານັ້ນເຊັ່ນ: ບຸກຄະລາກອນທາງການແພດ, ຄູອາຈານ ແລະ ກຸ່ມສ່ຽງທີ່ເປັນແນວໜ້າຮັບມືກັບສະຖານະການ ໂດຍຈະເປັນໄປດ້ວຍຄວາມສະໝັກໃຈຂອງຜູ້ກ່ຽວ ແລະ ຈະບໍ່ມີການບັງຄັບໃຫ້ເຂົ້າຮ່ວມສັກວັກແຊັງ.

ໃນດ້ານຂອງທ່ານ ອາເລັກຊານເດີ ກິນເບີກ ຫົວໜ້າສູນວິໄຈແຫ່ງຊາດກາມາລີຢາ ໃຫ້ສຳພາດກັບສຳນັກຂ່າວ TASS ວ່າ: ມີບໍລິສັດສາມແຫ່ງກຳລັງກຽມຜະລິດວັກແຊັງດັ່ງກ່າວ ໂດຍຈະສົ່ງໄປຍັງ 10-15 ພູມມິພາກຂອງປະເທດກ່ອນ ແຕ່ບໍ່ໄດ້ບອກຈະແຈ້ງວ່າຢູ່ໃສ ແລະ ອາດໃຊ້ເວລາອີກເຖິງ 9-12 ເດືອນ ທີ່ປະຊາຊົນລັດເຊຍທຸກຄົນຈະເຂົ້າເຖິງວັກແຊັງດັ່ງກ່າວຢ່າງເຕັມທີ່  ພ້ອມທັງລະບຸວ່າ ອີກປະມານ 1 ເດືອນຈະຜະລິດວັກແຊັງໃຫ້ໄດ້ 1 ລ້ານຫຼອດທີ່ໂຮງງານທັງສາມແຫ່ງ ແລະ ພາຍໃນເດືອນທັນວາປິນີ້ ຫຼື ເດືອນມັງກອນປີໜ້າ ຈະເລີ່ມຜະລິດຢ່າງເຕັມກຳລັງໃຫ້ໄດ້ເດືອນລະ 5 ລ້ານຫຼອດ.

HTML tutorial