ຜູ້ນຳເບລາຣຸດຊີປຶກສາບັນຫາພາຍໃນກັບ ປ.ປູຕິນ ທີ່ພາຍນອກຳລັງພະຍາຍາມແຊກແຊງ

ລາຍງານ 15 ສິງຫາ 2020, ທຳນຽບປະທານປະເທດລັດເຊຍອອກຖະແຫຼງການໃນວັນເສົານີ້ ວ່າທ່ານ ວະລາດິເມຍ ປູຕິນ ປະທານປະເທດລັດເຊຍ ໄດ້ສົນທະນາທາງໂທລະສັບກັບທ່ານ ອະເລັກຊານເດີ ລູຄາເຊນໂກ ປະທານປະເທດເບລາຣຸດຊີ ກ່ຽວກັບສະຖານະການທັງໃນ ແລະ ນອກເບລາຣຸດຊີ ໂດຍເນັ້ນບັນຫາພາຍໃນຂອງເບລາຣຸດຊີ ທີ່ເຄັ່ງຕຶງ ແລະ ຮຸນແຮງຂຶ້ນຢ່າງຕໍ່ເນື່ອງ ນັບຕັ້ງແຕ່ວັນເລືອກຕັ້ງປະທານປະເທດ ເມື່ອວັນທີ 9 ສິງຫາ ທີ່ຜ່ານມາ ທີ່ທ່ານ ອະເລັກຊານເດີ ລູຄາເຊນໂກ ຊະນະການເລືອກຕັ້ງຢ່າງຂາດລອຍ ຄອງອຳນາດເປັນສະໄໝທີ່ 6 ຕິດຕໍ່ກັນ ນັບຕັ້ງແຕ່ປີ 1994.

ເຊິ່ງຜູ້ນຳລັດເຊຍກ່າວໃນຕອນໜຶ່ງ ສະແດງຄວາມເຊື່ອໝັ້ນວ່າ ບັນຫາທັງໝົດທີ່ກຳລັງເກີດຂຶ້ນຈະຍຸຕິພາຍໃນອີກບໍ່ດົນນີ້ ແລະ ສິ່ງທີ່ເກີດຂຶ້ນທັງໝົດບໍ່ຄວນກາຍເປັນເຄື່ອງມື ເພື່ອສະແຫວງຫາຜົນປະໂຫຍດຂອງກອງກຳລັງທີ່ຫວັງທຳລາຍການຮ່ວມມືເພື່ອຜົນປະໂຫຍດລະຫວ່າງເບລາຣຸດຊີກັບລັດເຊຍ ຕາມກອບການຮ່ວມມືລັດສະຫະພາບລັດເຊຍ-ເບລາຣຸດຊີ.

ເຖິງແມ່ນວ່າສາຍພົວພັນສອງຝ່າຍມີບັນຫາມາໄລຍະໜຶ່ງ ເນື່ອງຈາກຂໍ້ຕົກລົງພະລັງງານສະບັບໃໝ່ ທີ່ຍັງຕົກລົງກັນບໍ່ໄດ້ ແຕ່ໃນທາງຍຸດທະສາດທັງທາງດ້ານການເມືອງ ແລະ ການທະຫານເບລາຣຸດຊີມີຄວາມສຳຄັນກັບລັດເຊຍເປັນຢ່າງຍິ່ງ ໃນຖານະທີ່ເປັນປະເທດດ່ານໜ້າກັບກຸ່ມປະເທດເອີຣົບຕາເວັນອອກ ທີ່ຕອນນີ້ເປັນສະມາຊິກອົງການສົນທິສັນຍາອາກລັງຕິກເໜືອ (NATO).

ການເຄື່ອນໄຫວດັ່ງກ່າວ ເກີດຂຶ້ນພຽງບໍ່ພໍເທົ່າໃດຊົ່ວໂມງ ພາຍຫຼັງທີ່ສະຖານີໂທລະພາບແຫ່ງຊາດຂອງເບລາຣຸດຊີລາຍງານເລື່ອງການປະຊຸມສຸກເສີນດ້ານຄວາມໝັ້ນຄົງຂອງຄະນະລັດຖະມົນຕີ ເຊິ່ງທ່ານ ອາເລັກຊານເດີ ລູຄາເຊນໂກ ກ່າວໃນຕອນໜຶ່ງວ່າ ສະຖານະການປະທ້ວງຕອນນີ້ເຄື່ອນໄຫວຢ່າງວ່ອງໄວ ແລະ ບໍ່ແມ່ນໄພຮຸກຮານສະເພາະເບລາຣຸດຊີ ຕົນຈຳເປັນຕ້ອງຕິດຕໍ່ໂດຍກົງກັບຜູ້ນຳລັດເຊຍໃຫ້ໄວທີ່ສຸດ.

ໃນເວລາດຽວກັນ, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ຍັງຄົງຢູ່ໃນລະຫວ່າງການເດີນທາງຢ້ຽມຢາມຫຼາຍປະເທດໃນເອີຣົບຕາເວັນອອກ ແລະ ໃນເວລາດຽວກັນກັບທ່ານ ປູຕິນ ສົນທະນາທາງໂທລະສັບກັບຜູ້ນຳເບລາຣຸດດຊີນັ້ນ ທ່ານ ໄມ ພອມແພວ ກໍ່ໄດ້ປຶກສາຫາລືກັບທ່ານ ຈາເຊັດ ຊາປູໂຕວິສ ລັດຖະມົນຕີກະຊວງການຕ່າງປະເທດໂປໂລຍ ແລະ ມີການເປີດເຜີຍຢ່າງກົງໄປກົງມາ ວ່າສະຖານະການໃນເບລາຣຸດຊີ ເຊິ່ງເມື່ອບໍ່ພໍເທົ່າໃດວັນກ່ອນໜ້ານີ້ ທ່ານ ໄມ ພອມແພວ ກໍ່ໄດ້ຮຽກຮ້ອງໃຫ້ສະຫະພາບເອີຣົບຕ້ອງມີການດຳເນີນການ.

ເຊິ່ງກ່ອນໜ້ານີ້, ລັດຖະມົນຕີກະຊວງການຕ່າງປະເທດ ສ.ອາເມຣິກາ ກໍ່ໄດ້ຮຽກຮ້ອງໃຫ້ຜູ້ນຳເບລາຣຸດຊີ ປົກປ້ອງສິດທິຂອງປະຊາຊົນທີ່ເຄື່ອນໄຫວຢ່າງສັນຕິ ແລະ ສ.ອາເມຣິກາ ເຫັນດີກັບປະຊາຊົນເບລາຣຸດຊີທີ່ສະແຫວງຫາເສລີພາບ ເຊິ່ງຖືເປັນຜົນປະໂຫຍດອັນສູງສຸດ.

ໃນດ້ານຂອງທ່ານ ນາງ ມາເຣຍ ຊາຄາໂຣວາ ໂຄສົກກະຊວງການຕ່າງປະເທດລັດເຊຍ ຖະແຫຼງເມື່ອວັນທີ 14 ສິງຫາ ທີ່ຜ່ານມາ ມີເນື້ອໃນຕອນໜຶ່ງລະບຸວ່າ ມີຄວາມພະຍາຍາມຈາກພາຍນອກ ເພື່ອແຊກແຊງ ແລະ ດັກຊຸ້ມທຳລາຍສະຖຽນລະພາບຂອງເບລາຣຸດຊີ ໃຫ້ເກີດຄວາມແຕກແຍກທາງສັງຄົມ ແລະ ທຳລາຍອະທິປະໄຕ.

ໂຄສົກກະຊວງການຕ່າງປະເທດລັດເຊຍກ່າວຕໍ່ວ່າ ກຸ່ມຜູ້ແຊກແຊງຈາກພາຍນອກ ຍັງຄົງໃຊ້ຍຸດທະສາດແບບເກົ່າ ກັບທີ່ເຄີຍສ້າງຄວາມວຸ້ນວາຍໃຫ້ກັບຫຼາຍປະເທດ, ສ່ວນຈຸດຢືນຂອງລັດເຊຍນັ້ນ ຂໍໃຫ້ຄູ່ກໍລະນີອົດທົນ ແລະ ຫັນໜ້າເຂົ້າຫາກັນດ້ວຍເຫດຜົນ, ລັດເຊຍຫວັງເປັນຢ່າງຍິ່ງວ່າ ສະຖານະການການເມືອງພາຍໃນເບລາຣຸດຊີ ຈະກັບຄືນສູ່ສະຖຽນລະພາບອີກຄັ້ງ ແລະ ລັດຖະບານລັດເຊຍ ຍັງຖືເປັນພັນທະມິດທີ່ໄວ້ໃຈໄດ້ ແລະ ເປັນບ້ານພີ່ເມືອງນ້ອງກັບເບລາຣຸດຊີ ຄວາມພະຍາຍາມໃດກໍ່ຕາມ ເພື່ອທຳລາຍສາຍພົວພັນນີ້ ບໍ່ມີທາງປະສົບຜົນສຳເລັດ.

ຂະນະທີ່ທ່ານ ອາເລັກຊານເດີ ລູຄາເຊນໂກ ໄດ້ປະນາມກຸ່ມຜູ້ປະທ້ວງ ວ່າເປັນກຸ່ມອາຊະຍາກຳ ແລະ ປະຕິເສດຂໍ້ກ່າວຫາຂອງກຸ່ມປະເທດຕາເວັນຕົກວ່າມີການໃຊ້ລູກປືນແທ້ ໂດຍກ່າວວ່າຜູ້ປະທ້ວງຈຳນວນໜຶ່ງມີອາວຸດໜັກ ແລະ ຂັດຂືນຄຳສັ່ງຂອງເຈົ້າໜ້າທີ່ດ້ານຄວາມໝັ້ນຄົງ, ນອກຈາກນີ້ ຜູ້ນຳເບລາບຸດຊີຍັງເປີດເຜີຍວ່າ ໃນບັນດາຜູ້ກໍ່ຄວາມບໍ່ສະຫງົນທີ່ຖືກຈັບກຸມ ມີຫຼາຍຄົນຖືໜັງສືຜ່ານແດນ ສ.ອາເມຣິກາ.

ໃນດ້ານຂອງສຳນັກງານສິດທິມະນຸດແຫ່ງສະຫະປະຊາຊາດ (OHCHR) ອອກຖະແຫຼງການປະນາມຝ່າຍຄວາມໝັ້ນຄົງຂອງເບລາຣຸດຊີ ວ່າໃຊ້ກຳລັງເກີນກວ່າເຫດ ເຮັດໃຫ້ມີຜູ້ປະທ້ວງເສຍຊີວິດຢ່າງໜ້ອຍ 2 ຄົນ, ມີຜູ້ໄດ້ຮັບບາດເຈັບຢ່າງໜ້ອຍ 200 ຄົນ ແລະ ຖືກຈັບກຸມຫຼາຍກວ່າ 6,000 ຄົນ.

HTML tutorial