ປ.ທຣຳ ຕໍ່ເວລາໃຫ້ TikTok ເປັນ 90 ວັນ ຕ້ອງໂອນກຳມະສິດທັງໝົດໃນ ສ.ອາເມຣິກາ ໃຫ້ສຳເລັດ

ລາຍງານ 16 ສິງຫາ 2020, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວເມື່ອວັນສຸກ (14​ ສິງຫາ) ທີ່ຜ່ານມາ ວ່າຕົນໄດ້ລົງລາຍເຊັນໃນຄຳສັ່ງພິເສດຂອງຝ່າຍບໍລິຫານ ກຳນົດໄລຍະເວລາພາຍໃນ 90 ນັບຈາກມື້ລົງລາຍເຊັນຄືວັນທີ 14 ສິງຫາ ວ່າບໍລິສັດ ByteDance ທີ່ມີສຳນັກງານໃຫຍ່ຢູ່ນະຄອນຫຼວງປັກກິ່ງ ສປ.ຈີນ ເຊິ່ງເປັນບໍລິສັດແມ່ຂອງ TikTok ຕ້ອງໂອນກຳມະສິດຊັບສິນທັງໝົດໃນ ສ.ອາເມຣິກາ ທີ່ກ່ຽວຂ້ອງກັບການດຳເນີນງານຂອງ TikTok.

ເຊິ່ງທ່ານ ໂດໂນ ທຣຳ ຢືນຢັນວ່າມີເຫດຜົນ ແລະ ຫຼັກຖານທີ່ມີນ້ຳໜັກຈົນສາມາດເຊື້ອຖືໄດ້ວ່າ ByteDance ກຳລັງຈະດຳເນີນການບາງຢ່າງ ເພື່ອສ້າງຄວາມເສຍຫາຍໃຫ້ກັບຄວາມໝັ້ນຄົງຂອງ ສ.ອາເມຣິກາ ພ້ອມທັງເນັ້ນໜັກວ່າ ຊັບສິນທີ່ ByteDace ຕ້ອງໂອນກຳມະສິດ ແມ່ນລວມເຖິງຂໍ້ມູນທັງໝົດຂອງຜູ້ໃຊ້ບໍລິການ TikTok ໃນ ສ.ອາເມຣິກາ ທີ່ມີຫຼາຍກວ່າ 100 ລ້ານຄົນ.

ເຖິງແມ່ນວ່າບໍລິສັດ Microsoft ກຳລັງຍື່ນເຈລະຈາກັບ  ByteDance ເພື່ອຂໍຊື້ກິດຈະການທັງໝົດຂອງ TikTok ບໍ່ພຽງແຕ່ສະເພາະໃນ ສ.ອາເມຣິກາເທົ່ານັ້ນ ແຕ່ໃນໄລຍະຫຼັງມານີ້ ByteDance ຍັງບໍ່ສະແດງທ່າທີ່ຕໍ່ກັບການເຈລະຈາກັບ Mocrosotf.

ເຖິງຢ່າງໃດກໍ່ຕາມ ByteDance ກ່າວເມື່ອຕົ້ນເດືອນນີ້ ວ່າໄດ້ກຽມນຳລັດຖະບານ ສ.ອາເມຣິກາເຂົ້າສູ່ຂະບວນການໃນຊັ້ນສານ ພາຍຫຼັງທີ່ທ່ານ ໂດໂນ ທຣຳ ອອກຄຳສັ່ງຄັ້ງທຳອິດວ່າ TikTok ເປັນໄພຕໍ່ຄວາມໝັ້ນຄົງ ແລະ ຕ້ອງຍຸດຕິກິດຈະການທັງໝົດໃນ ສ.ອາເມຣິກາ ຫາກພາຍໃນໄລຍະເວລາ 45 ວັນ ນັບຕັ້ງແຕ່ວັນທີ 8 ສິງຫາ ເຊິ່ງເປັນມື້ລົງລາຍເຊັນຄຳສັ່ງ ByteDance ຍັງບໍ່ບັນລຸຂໍ້ຕົກລົງຂາຍກິດຈະການທັງໝົດໃນ ສ.ອາເມຣິກາ.

HTML tutorial