ອີຣານວ່າ ສ.ອາເມຣິກາ ພົບກັບຄວາມອັບອາຍ ທີ່ UN ປະຕິເສດຂະຫຍາຍເວລາຂວ້ຳບາດອາວຸດອີຣານ

ລາຍງານ 16 ສິງຫາ 2020, ທ່ານ ຮັສຊັນ ໂຣຮານີ ປະທານປະເທດອີຣານ ກ່າວເມື່ອວັນເສົາ (15 ສິງຫາ) ທີ່ຜ່ານມາ ວ່າຈາກການທີ່ ສ.ອາເມຣິກາ ກຽມການລົງມະຕິເປັນເວລາຫຼາຍເດືອນ ເພື່ອໂຈມຕີອີຣານ ແຕ່ສຳພັດໄດ້ຮັບຄະນະສຽງພຽງໜຶ່ງດຽວ ນັ້ນຖືເປັນຄວາມສຳເລັດຄັ້ງຍິ່ງໃຫຍ່ ທີ່ ສ.ອາເມຣິກາ ປະສົບກັບຄວາມປະລາໄຊອັນໜ້າອັບອາຍ ຕໍ່ການທີ່ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ປະຕິເສດຍັດຕິທີ່ສະເໜີໂດຍ ສ.ອາເມຣິກາ ໃນການຂະຫຍາຍເວລາມາດຕະການເກືອດຫ້າມດຳເນີນການໃດໆດ້ານອາວຸດກັບອີຣານ ຫຼື ເອີ້ນວ່າມາດຕະການປິດລ້ອມດ້ານອາວຸດຕໍ່ອີຣານ.

ເຊິ່ງສະພາຄວາມໝັ້ນຄົງແຫ່ງສະຫະປະຊາຊາດ ໄດ້ລົງມະຕິຕໍ່ບັນຫາດັ່ງກ່າວເມື່ອວັນສຸກ (14 ສິງຫາ) ທີ່ຜ່ານມາ, ໂດຍລັດເຊຍ ແລະ ຈີນ ໃນຖານະສະມາຊິກຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ ໄດ້ຮ່ວມກັນໃຊ້ສິດຢຸດຢັ້ງຍັດຕິດັ່ງກ່າວ ນອກນັ້ນແລ້ວສະມາຊິກອີກ 11 ປະເທດລວມເຖິງສະມາຊິກຖາວອນອີກ 2 ປະເທດຄື: ຝຣັ່ງ ແລະ ອັງກິດ ຕະຫຼອດຮອດສະມາຊິກບໍ່ຖາວອນສຳຄັນຄື ເຢຍລະມັນ ຕ່າງກໍ່ພ້ອມໃຈກັນງົດອອກສຽງ, ມີພຽງສາທາລະນະລັດໂດມິນິກັນເທົ່ານັ້ນທີ່ອອກສຽງສະໜັບສະໜູນ ສ.ອາເມຣິກາ.

ມາດຕະການຂວ້ຳບາດດ້ານອາວຸດຂອງປະຫະປະຊາຊາດຕໍ່ອີຣານ ຈະສິ້ນສຸດພາຍໃຕ້ກອບຂໍ້ຕົກລົງນິວເຄຼຍ ສະບັບປີ 2015 ໃນວັນທີ 18 ຕຸລາທີ່ຈະມາເຖິງນີ້, ເຊິ່ງເປັນຂໍ້ຕົກລົງລະຫວ່າງອີຣານ ກັບ ມະຫາອຳນາດໂລກ ທີ່ກຳນົດໃຫ້ມີການຍົກເລີກມາດຕະການຂວ້ຳບາດລະຫວ່າງປະເທດຕໍ່ອີຣານ ແລກກັບການຄຸ້ມຄອງໂຄງການນິວເຄຼຍຂອງອີຣານ ທີ່ທ່ານ ໂດໂນ ທຣຳ ນຳພາ ສ.ອາເມຣິກາ ຖອນຕົວອອກຈາກຂໍ້ຕົກລົງດັ່ງກ່າວໃນປີ 2018.

ໃນດ້ານຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວໃນລະຫວ່າງການເດີນທາງຢ້ຽມຢາມໂປໂລຍ ເມື່ອວັນເສົາ ທີ່ຜ່ານມາ ວ່ານັ້ນຖືເປັນຄວາມຜິດພາດຢ່າງຮ້າຍແຮງ.

ສ່ວນທ່ານ ວະລາດິເມຍ ປູຕິນ ປະທານປະເທດລັດເຊຍ ໄດ້ສະເໜີໃຫ້ມີການຈັດກອງປະຊຸມສຸດຍອດຜູ້ນຳມະຫາອຳນາດໂລກ ທີ່ເປັນພາຄີຂໍ້ຕົກລົງນິວເຄຼຍອີຣານຄື: ລັດເຊຍ, ຈີນ, ອັງກິດ, ຝຣັ່ງ ແລະ ເຢຍລະມັນ ລວມເຖິງອະດີດສະມາຊິກຄື ສ.ອາເມຣິກາ ເພື່ອຫຼີກລ້ຽງການປະເຊີນໜ້າ ຈາກໄພຄຸກຄາມຂອງ ສ.ອາເມຣິກາ ທີ່ກະຕຸ້ນໃຫ້ເກີດການຫັນກັບມາຂວ້ຳບາດອີຣານ.

HTML tutorial