ແນວຮ່ວມປະຊາຊົນປົດແອກປະເທດໄທ ລຸກຮື້ປະທ້ວງໃຫຍ່ຕັ້ງຂໍ້ຮຽກຮ້ອງ 3 ຂໍ້ຕໍ່ລັດ

ລາຍງານ 16 ສິງຫາ 2020, ມີການໂຮມຊຸມນຸມປະທ້ວງໃນຊື່ ແນວຮ່ວມປະຊາຊົນປົດແອກ ພາຍໃຕ້ຄຳຂວັນ ຂີດເສັ້ນຕາຍໄລ່ຜະເດັດການ ເພື່ອຮຽກຮ້ອງປະຊາທິປະໄຕ ທີ່ບໍລິເວນອະນຸສາວະລີປະຊາທິປະໄຕ  ນະຄອນຫຼວງບາງກອກ ໃນວັນອາທິດນີ້.

ການໂຮມຊຸມນຸມຄັ້ງນີ້ ນຳໂດຍຄະນະປະຊາຊົນປົດແອກ ມີຂໍ້ຮຽກຮ້ອງ 3 ຂໍ້ຄື: (1) ລັດຕ້ອງຢຸດຄຸກຄາມປະຊາຊົນ ທີ່ອອກມາໃຊ້ສິດທິ ແລະ ເສລີພາບຕາມຫຼັກການປະຊາທິປະໄຕ, (2) ລັດຕ້ອງຮ່າງລັດຖະທຳມະນູນສະບັບໃໝ່ ໂດຍປະຊາຊົນ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ,​ (3) ລັດຖະບານຕ້ອງຍຸບສະພາ ເພື່ອໃຫ້ປະຊາຊົນເລືອກຜູ້ແທນຂອງຕົນຕາມຄວາມຕ້ອງການທີ່ແທ້ຈິງ ບົນຫຼັກການ 2 ຈຸດຢືນຄື: ຕ້ອງບໍ່ມີການກໍ່ລັດຖະປະຫານ ແລະ ຕ້ອງບໍ່ມີການສ້າງຕັ້ງລັດຖະບານແຫ່ງຊາດ.

ນອກຈາກນີ້, ຄະນະປະຊາຊົນປົດແອກຫຍັງຮຽກຮ້ອງເຖິງຄວາມຫວັງທີ່ຕ້ອງການໃຫ້ ການມີລະບອບປະຊາທິປະໄຕ ທີ່ມີພະມະຫາກະສັດຢູ່ພາຍໃຕ້ລັດຖະທຳມະນູນຢ່າງແທ້ຈິງ ພ້ອມທັງລະບຸວ່າ ເຖິງນັ້ນຈະເປັນພຽງຄວາມຝັນ ແຕ່ກໍ່ເປັນຝັນທີ່ສາມາດເກີດຂຶ້ນຈິງໄດ້ ຕາມຂະບວນການຂອງລັດຖະທຳມະນູນ ໃນລະບອບປະຊາທິປະໄຕ ທີ່ປະຊາຊົນເປັນເຈົ້າຂອງອຳນາດອະທິປະໄຕຢ່າງແທ້ຈິງ.

ເຊິ່ງນັ້ບຕັ້ງແຕ່ວັນທີ 18 ກໍລະກົດ ທີ່ຜ່ານມາ ແມ່ນໄດ້ມີກຸ່ມເຍົາວະຊົນປົດແອກ (Free Youth) ລູກຮືເປີດສາກໂຮມຊຸມນຸມປະທ້ວງຮຽກຮ້ອງການປ່ຽນແປງທາງການເມືອງຄັ້ງໃໝ່ຂອງປະເທດຫຼາຍຄັ້ງ ພາຍໃຕ້ຂໍ້ຮຽກຮ້ອງ 3 ຂໍ້ເຊັ່ນດຽວກັນ ໃນ 49 ຈັງຫວັດຂອງທົ່ວປະເທດໄທ, ຫຼາຍທີ່ສຸດແມ່ນພາກອີຣານ ມີການປະທ້ວງໃນ 17 ຈັງຫວັດ, ພາກເໜືອ 9 ຈັງຫວັດ, ພາກກາງ 9 ຈັງຫວັດ, ພາກໃຕ້ 7 ຈັງຫວັດ, ພາກຕາເວັນອອກ 5 ຈັງຫວັດ ແລະ ພາກຕາເວັນຕົກ 2 ຈັງຫວັດ.

ເຖິງຢ່າງໃດກໍ່ຕາມ, ກໍ່ຍັງມີຝ່າຍທີ່ປະກາດຕົວເປັນຜູ້ປົກປ້ອງສະຖາບັນພະມະຫາກະສັດໃນນາມ ເຍົາວະຊົນຊ່ວຍຊາດປົກປ້ອງສະຖາບັນ ແລະ ອະຊີວະຊ່ວຍຊາດ ທີ່ເລືອກໂຮມຊຸມນຸມທີ່ສ່ວນລຸມພິນີ ຢູ່ຫ່າງອອກໄປຈາກອະນຸສາວະລີປະຊາທິປະໄຕ 8 ກິໂລແມັດ, ນອກຈາກນີ້ ຜ່ານມາຍັງເກີດຂຶ້ນຢູ່ໃນ 11 ຈັງຫວັດທົ່ວປະເທດໄທ.

ໃນດ້ານຂອງທ່ານພົນເອກ ປຣະຍຸດ ຈັນໂອຊາ ນາຍົກລັດຖະມົນຕີ ແລະ ລັດຖະມົນຕີກະຊວງປ້ອງກັນປະເທດຂອງໄທ ໃນກ່າວໃນລາຍການພິເສດທີ່ອອກອາກາດ ຜ່ານໂທລະພາບທາງແຫ່ງ ເມື່ອວັນທີ 13 ສິງຫາ ທີ່ຜ່ານມາ ຮຽກຮ້ອງໃຫ້ຍຸຕິການແບ່ງພັກແບ່ງພວກທາງການເມືອງ ເຊິ່ງເປັນສິ່ງກີດຂວງການຮ່ວມແຮງຮ່ວມໃຈກັນເປັນອັນໜຶ່ງອັນດຽວຂອງຄົນໄທ ໃນການແກ້ໄຂບັນຫາຕ່າງໆ ພ້ອມລະບຸວ່າ ແນວຄິດພວກເຈົ້າ-ພວກຂ້ອຍ ບໍ່ຄວນມີຈຸດຢືນອີກຕໍ່ໄປໃນໂລກປັດຈຸບັນ ຄວນມີແຕ່ຄຳວ່າ ຄົນໄທນຳກັນ.

ນອກຈາກນີ້, ນາຍົກລັດຖະມົນຕີຂອງໄທຍັງກ່າວວ່າ ປະຊາຊົນຊົນໄທທຸກຄົນຄວນປະຕິເສດຄວາມກຽດຊັງ ແລະ ການແບ່ງແຍກທາງການເມືອງ ຂໍໃຫ້ປະຕິເສດການເມືອງແບບເກົ່າ ທີ່ແຜ່ກະຈາຍເຊື້ອໂລກຂອງຄວາມແຕກແຍກລະຫວ່າງຄວາມເຊື່ອທີ່ແຕກຕ່າງ ຄົນຮຸ້ນໃໝ່-ຄົນຮຸ້ນເກົ່າ, ຄົນຮັ່ງມີ-ຄົນທຸກຍາກ ຫຼື ຄວາມແຕກຕ່າງອັນໃດກໍ່ຕາມ ທີ່ຖືກໃສ່ເຂົ້າມາໃນສັງຄົມຂອງພວກເຮົາ.

ເຊິ່ງມີນັກວິເຄາະລະບຸວ່າ ຈຸດຊະນວນຂອງຄວາມບໍ່ພໍໃຈ ຂອງຜູ້ໂຮມຊຸມນຸມປະທ້ວງ ແມ່ນມາຈາກຂະບວນການຍຸຕິທຳໃນປະເທດ ທີ່ເຮັດໃຫ້ເຊື້ອວ່າໂອນອຽງ ແລະ ເລືອກຊ່ວຍເຫຼືອແຕ່ຜູ້ຮັ່ງມີ ແລະ ມີອຳນາດ ແລະ ການທີ່ລັດຖະທຳມູນຂອງໄທຖືກຂຽນໂດຍສະມາຊິກສະພາສູງທີ່ມາຈາກການແຕ່ງຕັ້ງ ໂດຍບໍ່ໄດ້ມາຈາກການເລືອກຕັ້ງຕາມຫຼັກປະຊາທິປະໄຕ.

HTML tutorial