ລັດເຊຍພ້ອມໃຫ້ການຊ່ວຍເຫຼືອທາງທະຫານ ແກ່ເບລາຣຸດຊີຫາກຖືກພາຍນອກແຊກແຊງ

ລາຍງານ 17 ສິງຫາ 2020, ທຳນຽບປະທານປະເທດລັດເຊຍ ຖະແຫຼງເມື່ອວັນອາທິດ (16 ສິງຫາ) ທີ່ຜ່ານມາ ກ່ຽວກັບການສົນທະນາທາງໂທລະສັບລະຫວ່າງທ່ານ ວະລາດິເມຍ ປູຕິນ ປະທານປະເທດລັດເຊຍ ກັບ ທ່ານ ອະເລັກຊານເດີ ລູຄາເຊນໂກ ປະທານປະເທດເບລາຣຸດຊີ ເຊິ່ງເປັນການໂອ້ລົມກັນຄັ້ງທີ 2 ພາຍໃນ 24 ຊົ່ວໂມງ ແຕ່ມີເນື້ອໃນສັ້ນໆພຽງວ່າ ລັດເຊຍພ້ອມໃຫ້ການຊ່ວຍເຫຼືອເບລາຣຸດຊີ ຕາມກອບຂອງຂໍ້ຕົກລົງທາງທະຫານສອງຝ່າຍ ຫາກມີຄວາມຈຳເປັນ ແລະ ຕອນນີ້ເບລາຣຸດຊີກຳລັງປະເຊີນກັບແຮງກົດດັນຈາກພາຍນອກ.

ເຖິງຢ່າງໃດກໍ່ຕາມ, ຖະແຫຼງການຂອງທຳນຽບປະທານປະເທດລັດເຊຍ ບໍ່ໄດ້ລະບຸຊື່ຂອງປະເທດ ຫຼື ບຸກຄົນທີ່ສາມ ຕະຫຼອດຮອດການບໍ່ໄດ້ກ່າວເຖິງການເລືອກຕັ້ງຂອງເບລາຣຸດຊີ ເມື່ອວັນທີ 9 ສິງຫາ ທີ່ຜ່ານມາ ທີ່ເປັນຕົ້ນເຫດຂອງການປະທ້ວງຕໍ່ຕ້ານລັດຖະບານຄັ້ງໃຫຍ່ທີ່ສຸດໃນຮອບ 26 ປີ ຫຼື ນັບຕັ້ງແຕ່ທ່ານ ອະເລັກຊານເດີ ລູຄາເຊນໂກ ຂຶ້ນສູ້ອຳນາດໃນຖານະປະທານປະເທດຄົນທຳອິດ ແລະ ຄົນດຽວຂອງເບລາຣຸດຊີຈົນເຖິງປັດຈຸບັນ.

ໃນດ້ານຂອງສຳນັກຂ່າວແຫ່ງຊາດຂອງເບລາຣຸດຊີລາຍງານວ່າ ທ່ານ ອະເລັກຊານເດີ ລູຄາເຊນໂກ ໄດ້ສັ່ງເຄື່ອນກຳລັງພົນ ພ້ອມອາວຸດໂຈມຕີທາງອາກາດໄປປະຈຳການຕາມແນວຊາຍແດນທາງຕາເວັນຕົກ ເຊິ່ງຕິດກັບລັດເວຍ, ລິດຕົວນີ ແລະ ໂປໂລຍ ພາຍຫຼັງທີ່ອົງການສົນທິສັນຍາອາກລັງຕິກເໜືອ (NATO) ເລີ່ມຊ້ອມຮົບ ແລະ ເສີມກຳລັງອາວຸດຕາມເຂດຊາຍແດນທີ່ຕິດກັບເບລາຣຸດຊີ.

ເຊິ່ງສະຖານະການການປະທ້ວງທີ່ແກ່ຍາວ ແລະ ຮຸນແຮງຕໍ່ເນື່ອງນັບຕັ້ງແຕ່ວັນເລືອກຕັ້ງ ສົ່ງຜົນໃຫ້ມີຜູ້ເສຍຊີວິດແລ້ວ 2 ຄົນ, ໄດ້ຮັບບາດເຈັບອີກຫຼາຍຮ້ອຍຄົນ ແລະ ມີຜູ້ຖືກຈັບກຸມຫຼາຍກວ່າ 7,000 ຄົນ ແຕ່ເມື່ອທ້າຍອາທິດທີ່ຜ່ານມາ ມີຜູ້ໄດ້ຮັບການປ່ອຍຕົວປະມານ 2,000 ຄົນ.

ຂະນະທີ່ບັນດາປະເທດເພື່ອນບ້ານຂອງເບລາຣຸດຊີ ໂດຍສະເພາະລັດເວຍ, ລິດຕົວນີ ແລະ ໂປໂລຍ ຮຽກຮ້ອງໃຫ້ທ່ານ ອະເລັກຊານເດີ ລູຄາເຊນໂກ ຈັດການເລືອກຕັ້ງໃໝ່, ສ່ວນສະຫະພາບເອີຣົບ (EU) ຂົ່ມຂູ່ວ່າຈະຂວ້ຳບາດເຈົ້າໜ້າທີ່ລະດັບສູງຂອງລັດຖະບານເບລາຣຸດຊີເປັນລາຍບຸກຄົນ, ນອກຈາກນີ້ ທ່ານ ໄຣມຸນດາສ ຄາໂຣບລິສ ລັດຖະມົນຕີກະຊວງປ້ອງກັນປະເທດລິດຕົວນີ ຍັງສະແດງຄວາມບໍ່ພໍໃຈ ທີ່ລັດເຊຍສະແດງຈຸດຢືນພ້ອມຊ່ວຍເຫຼືອທາງການທະຫານແກ່ເບລາຣຸດຊີ ແລະ ກ່າວວ່າໄດ້ຕິດຕາມການຊ້ອມຮົບຂອງກອງທັບເບລາຣຸດຊີຕາມເຂດຊາຍແດນທີ່ຕິດກັນຢ່າງໃກ້ຊິດອີກດ້ວຍ.

ໃນດ້ານຂອງທ່ານ ອະເລັກຊານເດີ ລູຄາເຊນໂກ ໄດ້ກ່າວໃນວັນຈັນນີ້ ລະຫວ່າງລົງຢ້ຽມຢາມໂຮງງານຜະລິດລົດແທັກເຕີແຫ່ງໜຶ່ງໃນນະຄອນຫຼວງມິນ ວ່າການເລືອກຕັ້ງຜູ້ນຳເບລາຣຸດຊີຄັ້ງຕໍ່ໄປ ຈະເກີດຂຶ້ນໃນອີກ 5 ປີຕໍ່ໜ້າເທົ່ານັ້ນ ຫາກໃຜຢາກເລືອກຕັ້ງໃໝ່ຕອນນີ້ໃຫ້ຂ້າມສົບຕົນໄປກ່ອນ, ຜູ້ນຳເບລາຣຸດຊີກ່າວອີກວ່າ ພ້ອມແບ່ງປັນອຳນາດ ເພື່ອຄວາມຕໍ່ເນື່ອງຂອງການບໍລິຫານປະເທດໃນອະນາຄົດ ແຕ່ຈະບໍ່ດຳເນີນການພາຍໃຕ້ແຮງກົດດັນ.

HTML tutorial