ທະຫານມາລີກໍ່ລັດຖະປະຫານຈັບຕົວປະທານປະເທດ ແລະ ນາຍົກບີບບັງຄັບໃຫ້ລາອອກ-ຍຸບສະພາ

ລາຍງານ 19 ສິງຫາ 2020, ທ່ານ ອິບຣາຮິບ ເຄຕາ ປະທານປະເທດມາລີຖະແຫຼງຜ່ານໂທລະພາບແຫ່ງຊາດ ເມື່ອຕອນເຊົ້າວັນພຸດນີ້ ຕາມເວລາທ້ອງຖິ່ນ ມີເນື້ອໃນພຽງວ່າ ຕົນລາອອກຈາກຕຳແໜ່ງຜູ້ນຳມາລີ ແລະ ປະກາດຍຸບສະພາແຫ່ງຊາດທັນທີ ເພື່ອຫຼີກລ້ຽງເຫດການນອງເລືອດ.

ການເຄື່ອນໄຫວດັ່ງກ່າວເກີດຂຶ້ນພາຍຫຼັງທີ່ທະຫານກຸ່ມໜຶ່ງປະກາດສູ້ ແລະ ຄວບຄຸມຕົວທ່ານ ອິບຣາຮິບ ເຄຕາ ອາຍຸ 75 ປີ ແລະ ທ່ານ ບູບູ ຊິສເຊ ນາຍົກລັດຖະມົນຕີ ອາຍຸ 46 ປີ ຕັ້ງແຕ່ວັນອັງຄານທີ່ຜ່ານມາ ໃນຖານທັບເມືອງກາຕີ ທີ່ຢູ່ບໍ່ໄກຈາກນະຄອນຫຼວງບາມາໂກ.

ເຊິ່ງທ່ານ ອິບຣາຮິບ ເຄຕາ ຂຶ້ນສູ່ຕຳແໜ່ງຜູ້ນຳມາລີສະໄໝທຳອິດໃນປີ 2013, ຊະນະການເລືອກຕັ້ງສະໄໝທີສອງ ເມື່ອປີ 2018 ທ່າມກາງຄວາມຂັດແຍ່ງ ແລະ ຂໍ້ກ່າວຫາກ່ຽວກັບການສໍ້ລາດບັງຫຼວງ, ມາດຕະການການບໍລິຫານເສດຖະກິດທີ່ບໍ່ມີປະສິດທິພາບ ແລະ ເຫດການຄວາມບໍ່ສະຫງົບທີ່ຍັງເກີດຂຶ້ນເປັນໄລຍະໆຈາກກອງກຳລັງຫຼາຍຝ່າຍ ໂດຍເປັນຜົນມາຈາກການກໍ່ລັດຖະປະຫານ ເມື່ອປີ 2012.

ຂະນະທີ່ປະຊາຊົນມາລີຈຳນວນຫຼາຍປະທ້ວງຕັ້ງແຕ່ເດືອນເມສາ ທີ່ຜ່ານມາ ພາຍຫຼັງການເລືອກຕັ້ງສະມາຊິກສະພາແຫ່ງຊາດ ແຕ່ຜົນການເລືອກຕັ້ງໃນຫຼາຍເຂດມີຄວາມໜ້າສົງໄສ ໂດຍມີສະຖານະການປະທະຮຸນແຮງທີ່ສຸດເມື່ອເດືອນທີ່ຜ່ານມາ ມີຜູ້ເສຍຊີວິດ 11 ຄົນ ແລະ ໄດ້ຮັບບາດເຈັບກວ່າ 100 ຄົນ, ເຖິງແມ່ນວ່າທ່ານ ອິບຣາຮິບ ເຄຕາ ພະຍາຍາມເຈລະຈາກັບແກນນຳຂອງຜູ້ປະທ້ວງ ແລະ ຕັ້ງຄະນະປະຕິບັດງານຖ່າຍໂອນອຳນາດຕາມການກົດດັນຂອງປະຊາຄົມເສດຖະກິດອາຟຣິກາຕາເວັນຕົກ.

ຕໍ່ມາທະຫານກຸ່ມທີ່ຄວບຄຸມຕົວປະທານປະເທດ ແລະ ນາຍົກລັດຖະມົນຕີມາລີ ອອກຖະແຫຼງການວ່າ ເລື່ອງການສ້າງຕັ້ງຄະນະກຳມາທິການແຫ່ງຊາດເພື່ອປົດປ່ອຍປະຊາຊົນ ເພື່ອຖ່າຍໂອນອຳນາດ ແລະ ກຽມຈັດການເລືອກຕັ້ງທົ່ວໄປຄັ້ງໃໝ່.

ໃນດ້ານຂອງທ່ານ ອັນໂຕນິໂອ ກູເຕເຣສ ເລຂາທິການສະຫະປະຊາຊາດ ຮຽກຮ້ອງໃຫ້ຄືນອຳນາດແກ່ປະຊາຊົນມາລີ ແລະ ປ່ອຍຕົວຜູ້ຖືກຄວບຄຸມຢ່າງບໍ່ເປັນທຳທັງໝົດທັນທີ, ໃນເວລາດຽວກັນປະຊາຄົມເສດຖະກິດອາຟຣິກາຕາເວັນຕົກ ປະກາດຢຸດຕິສະຖານະສາມາຊິກຂອງມາລີ ແລະ ເຕືອນເລື່ອງການຂວ້ຳບາດ, ສ່ວນຝຣັ່ງ ເຊິ່ງເປັນອະດີດເຈົ້າອະນານິຄົມຂອງມາລີ ປະນາມສະຖານະການທີ່ເກີດຂຶ້ນ ແລະ ຮຽກຮ້ອງໃຫ້ທະຫານທີ່ອອກມາຮ່ວມທຳການລັດຖະປະຫານກັບຖານທີ່ຕັ້ງ.

HTML tutorial