ຫວຽດນາມບໍ່ພໍໃຈຈີນ ທີ່ສົ່ງຍົນຖິ້ມລະເບີດມາສະແດງອຳນາດເໜືອເຂດຂັດແຍ່ງໃນທະເລຈີນໃຕ້

ລາຍງານ 22​ ສິງຫາ 2020, ຈີນເຊິ່ງເກີດຄວາມຂັດແຍ່ງເໜືອດິນແດນທາງທະເລມາຫຼາຍປີ ກັບກຸ່ມປະເທດເພື່ອນບ້ານທີ່ຕິດກັບທະເລຈີນໃຕ້ ໃນໄລຍະຫຼາຍເດືອນທີ່ຜ່ານມາຈີນໄດ້ເພີ່ມກິດຈະກຳທາງທະຫານໃນເຂດຄວາມຂັດແຍ່ງຫຼາຍສ່ວນໃນທະເລຈີນໃຕ້ ໜຶ່ງໃນເສັ້ນທາງການເດີນເຮືອສຳຄັນຂອງໂລກ, ຂະນະກຸ່ມປະເທດຄູ່ຂັດແຍ່ງກຳລັງຕໍ່ສູ້ກັບການແຜ່ລະບາດຂອງພະຍາດໂຄວິດ-19.

ພາບ: ທ່ານ ນາງ ເລີ ທິ ຖຸ ຮັງ ໂຄສົກກະຊວງການຕ່າງປະເທດຫວຽດນາມ

ທ່ານ ນາງ ເລີ ທິ ຖຸ ຮັງ ໂຄສົກກະຊວງການຕ່າງປະເທດຫວຽດນາມກ່າວໃນລະຫວ່າງການຖະແຫຼງຂ່າວ ໃນນະຄອນຫຼວງຮ່າໂນ້ຍ ເມື່ອວັນພະຫັດ (20 ສິງຫາ) ທີ່ຜ່ານມາ ວ່າການທີ່ຝ່າຍກ່ຽວຂ້ອງສົ່ງອາວຸດ ແລະ ຍົນຖິ້ມລະເບີດເຂົ້າສູ່ດິນແດນທີ່ມີຄວາມຂັດແຍ່ງ ນອກຈາກຈະເປັນການລະເມີດອະທິປະໄຕຂອງຫວຽດນາມແລ້ວ ຍັງເປັນໄພຮຸກຮານຕໍ່ສະຖານະການໃນພື້ນທີ່ອີກດ້ວຍ.

ເຊິ່ງສື່ຫວຽດນາມ ແລະ ສື່ຈີນລາຍງານວ່າ ເມື່ອບໍ່ດົນມານີ້ ກອງທັບປົດປ່ອຍປະຊາຊົນຈີນ ໄດ້ສົ່ງຍົນຮົບຫຼາຍລຳ ແລະ ຍົນຖິ້ມລະເບີດທາງຍຸດທະສາດ H-6J ຢ່າງໜ້ອຍ 1 ລຳ ໄປຈອດທີ່ໝູ່ເກາະພາຣາເຊວ ເຊິ່ງເປັນ 1 ໃນ 2 ໝູ່ເກາະໃນທະເລຈີນໃຕ້ ທີ່ຈີນອ້າງປະຫວັດສາດຄວາມເປັນເຈົ້າຂອງ.

HTML tutorial