ຕວັກກີຄົ້ນພົບບໍ່ແກັດທຳມະຊາດທີ່ໃຫຍ່ທີ່ສຸດ ເທົ່າທີ່ເຄີຍຄົ້ນພົບໃນທະເລດຳ 320 ຕື້ແມັດກ້ອນ

ລາຍງານ 22​ ສິງຫາ 2020, ທ່ານ ເຣເຊບ ເທຢິບ ເອີໂດກັນ ປະທານປະເທດຕວັກກີ ຖະແຫຼງທີ່ທຳນຽບປະທານປະເທດ ໃນນະຄອນຫຼວງອິດສະຕັນບູ ເມື່ອວັນສຸກ (21​ ສິງຫາ) ທີ່ຜ່ານມາ ວ່າຕວັກກີຄົ້ນພົບບໍ່ແກັດທຳມະຊາດຂະໜາດໃຫຍ່ທີ່ສຸດເທົ່າທີ່ເຄີຍຄົ້ນພົບໃນທະເລດຳ ມີປະລິມານແກັດສຳຮອງປະມານ 320 ຕື້ແມັດກ້ອນ (328 billion cubic meters) ຖືເປັນການຄົ້ບພົບແກັດຄັ້ງໃຫຍ່ທີ່ສຸດໃນປະເທດຫວັດສາດຂອງປະເທດ ພຽງພໍຕໍ່ການນຳໃຊ້ໄດ້ດົນເຖິງ 20 ປີ ແລະ ລັດຖະບານຄາດຫວັງວ່າຈະສາມາດຂຸດຂຶ້ນມາໃຊ້ໄດ້ໃນປີ 2023 ເຊິ່ງຈະກົງກັບວັນຄົບຮອບ 100 ປີ ການສ້າງຕັ້ງສາທາລະນະລັດຕວັກກີຍຸກໃໝ່.

ພາບ: ທ່ານ ເຣເຊບ ເທຢິບ ເອີໂດກັນ ປະທານປະເທດຕວັກກີ ຖະແຫຼງຂ່າວ, 21 ສິງຫາ 2020.

ທ່ານ ເຣເຊບ ເທຢິບ ເອີໂດກັນ ກ່າວອີກວ່າການຄົ້ບພົບຈະຊ່ວຍໃຫ້ຕວັກກີ ຫຼຸດຜ່ອນການເພິ່ງພາການນຳເຂົ້າແກັດຈາກຫຼາຍປະເທດເຊັ່ນ: ລັດເຊຍ, ອີຣານ ແລະ ອາແຊກໄບຊານ ໄດ້ຫຼາຍ, ໂດຍມູນຄ່າການນຳເຂົ້າພະລັງງານຂອງຕວັກກີ ໃນປີທີ່ຜ່ານມາ ສູງເຖິງ 41 ຕື້ໂດລາສະຫະລັດ.

ການຄົ້ນພົບເກີດຂຶ້ນຫຼັງຈາກທີ່ຕວັກກີສົ່ງເຮືອຂຸດເຈາະສຳຫຼວດ ຟາຕີ (Fatih) ອອກສຳຫຼວດໃນເຂດທູນາ-1 (Tuna-1 Zone) ທາງເບື້ອງຕາເວັນຕົກຂອງທະເລດຳ ຕັ້ງແຕ່ວັນທີ 20 ກໍລະກົດ ທີ່ຜ່ານມມາ, ຈຸດທີ່ພົບແກັດຢູ່ນອກຝັ່ງເມືອງອີເຣກລີ ທາງພາກເໜືອຂອງຕວັກກີ ແລະ ຢູ່ບໍ່ໄກຈາກຈຸດທີ່ຣູມານີຄົ້ນພົບແກັດທຳມະຊາດອີກບໍ່ໜຶ່ງ.

ການຄົ້ບພົບພະລັງງານໃນທະເລດຳຂອງຕວັກກີ ຍັງເກີດຂຶ້ນຂະນະທີ່ກຳລັງເກີດຄວາມເຄັ່ງຕຶງໃນລະດັບສູງ ລະຫວ່າງຕວັກກີ ກັບ ເກຣັກ ທີ່ຕ່າງກໍ່ເປັນສະມາຊິກອົງການສົນທິສັນຍາອາກລັງຕິກເໜືອ (NATO) ຕໍ່ກັບການສຳຫຼວດແຫຼ່ງນ້ຳມັນ ແລະ ແກັດທຳມະຊາດ ໃນນ່ານນ້ຳທີ່ມີຄວາມຂັດແຍ່ງ ທາງຝັ່ງຕາເວັນອອກຂອງທະເລເມດິເຕີເຣນຽນ ໂດຍກອງທັບເກຣັກສົ່ງເຮືອຮົບຕິດຕາມ ແລະ ລອຍຄຽງໄປກັບເຮືອຮົບຕວັກກີ ທີ່ຕິດຕາມຄຸ້ມກັນເຮືອສຳຫຼວດຫາແຫຼ່ງນ້ຳມັນ ແລະ ແກັດໃຕ້ພື້ນທະເລ ເຊິ່ງຈະທຳການສຳຫຼວດຈົນເຖິງວັນທີ 23 ສິງຫານີ້.

HTML tutorial