ອົງການອະນາໄມໂລກກ່າວວ່າເພື່ອຄວບຄຸມໂຄວິດ-19 ທີ່ແຜ່ລາມທົ່ວໂລກ ອາດໃຊ້ເວລາ 2 ປີ

ລາຍງານ 22 ສິງຫາ 2020, ທ່ານ ເທດຼອສ ແອດນາຮອມ ເກເບຼເຢຊຸສ ຜູ້ອຳນວຍການອົງການອະນາໄມໂລກ (WHO) ຖະແຫຼງເມື່ອວັນສຸກ (21​ ສິງຫາ) ທີ່ຜ່ານມາ ວ່າໃນຮອບ 24 ຊົ່ວໂມງທີ່ຜ່ານມາ WHO ຢືນຢັນມີຜູ້ຕິດເຊື້ອພະຍາດໂຄວິດ-19 ລາຍໃໝ່ 277,617 ຄົນ ເພີ່ມສະຖິຕິຜູ້ຕິດເຊື້ອສະສົມໃນທົ່ວໂລກເປັນ 22,536,278 ຄົນ ແລະ ເສຍຊີວິດແລ້ວ 789,197 ຄົນ.

ຜູ້ອຳນວຍການ WHO ກ່າວວ່າພະຍາດໂຄວິດ-19 ຖືເປັນວິກິດດ້ານສາທາລະນະສຸກຄັ້ງໃຫຍ່ໃນຮອບສະຕະວັດ ແລະ ມີຫຼາຍຝ່າຍປຽບທຽບວິກິດທີ່ກຳລັງເກີດຂຶ້ນ ກັບວິກິດການແຜ່ລະບາດຂອງໂລກໄຂ້ຫວັດໃຫຍ່ ເມື່ອປີ 1918 ທີ່ມີຜູ້ເສຍຊີວິດປະມານ 50 ລ້ານຄົນ ຈາກຈຳນວນຜູ້ຕິດເຊື້ອສະສົມປະມານ 500 ລ້ານຄົນ ໂດຍມີການແຜ່ລະບາດໃຫຍ່ 2 ຮອບ ແລະ ໃຊ້ເວລາກວ່າ 2 ປີ ຈຶ່ງສາມາດຄວບຄຸມສະຖານະການໄດ້.

ເຖິງຢ່າງໃດກໍ່ຕາມ ທ່ານ ເທດຼອສ ແອດນາຮອມ ເກເບຼເຢຊຸສ ເຊື່ອໝັ້ນວ່າວິກິດການລະບາດຂອງໂຄວິດ-19 ເຊິ່ງເລີ່ມຕົ້ນຈາກການພົບຜູ້ຕິດເຊື້ອຄົນທຳອິດທີ່ເມືອງອູຫັ້ນ ສປ.ຈີນ ເມື່ອທ້າຍເດືອນທັນວາ 2019 ແລະ WHO ປະກາດໃຫ້ເປັນພາວະໂລກລະບາດໃຫຍ່ເມື່ອເດືອນມີນາ ທີ່ຜ່ານມາ ກໍ່ອາດຈະໃຊ້ເວລາໜ້ອຍກວ່ານັ້ນ ເນື່ອງຈາກຄວາມຈະເລີນທີ່ເກີດຂຶ້ນຕາມຍຸກສະໄໝ ສົ່ງຜົນໃຫ້ເຕັກໂນໂລຊີ ແລະ ວິທະຍາສາດມີຄວາມກ້າວໜ້າຢ່າງໄວວາ ແຕ່ທີ່ສຳຄັນບໍ່ໜ້ອຍໄປກວ່າກັນ ຄືການເປັນນ້ຳໜຶ່ງໃຈດຽວກັນຂອງຊາວໂລກ.

ຜູ້ນຳອວຍການ WHO ໃຊ້ຄຳຮຽກໂລກລະບາດເມື່ອ 102 ປີກ່ອນຕາມທີ່ຫຼາຍຝ່າຍຄຸ້ນເຄີຍວ່າ “ໄຂ້ຫວັດໃຫຍ່ແອັດສະປາຍ” ເນື່ອງຈາກຈົນເຖິງຕອນນີ້ຍັງບໍ່ມີຫຼັກຖານຢືນຢັນຊັດເຈນກ່ຽວກັບແຫຼ່ງກຳເນີດຂອງໂລກລະບາດນັ້ນ ຍົກເວັ້ນພຽງວ່າແອັດສະປາຍເປັນປະເທດທີ່ໄດ້ຮັບຜົນກະທົບຢ່າງໜັກກໍ່ເທົ່ານັ້ນ.

ຂະນະດຽວກັນ ທ່ານ ເທດຼອສ ແອດນາຮອມ ເກເບຼເຢຊຸສ ກ່າວເຖິງການຮ່ວມມືລະຫວ່າງ WHO ກັບກອງທຶນເພື່ອເດັກນ້ອຍແຫ່ງສະຫະປະຊາຊາດ (UNICEF) ໃນການເຜີຍແຜ່ແນວທາງປະຕິບັດເພື່ອປ້ອງກັນພະຍາດໂຄວິດ-19 ໃນເດັກນ້ອຍ ເຊິ່ວລວມເຖິງການຂໍການຮ່ວມມືໃຫ້ຜູ້ທີ່ມີອາຍຸຕັ້ງແຕ່ 12 ປີ ຄວນໃສ່ຜ້າອັດປາກອະນາໄມ, ສ່ວນຜູ້ມີອາຍຸນ້ອຍກວ່ານັ້ນໃຫ້ຢູ່ພາຍໃຕ້ການຄຸ້ມຄອງຢ່າງໃກ້ຊິດຂອງຜູ້ປົກຄອງ ແຕ່ມີໝາຍເຫດອີກວ່າ ຂໍ້ສົມມຸດທີ່ວ່າ ເດັກນ້ອຍມີພູມຕ້ານທານຈາກເຊື້ອພະຍາດໂຄວິດ-19 ຫຼາຍກວ່າຜູ້ໃຫຍ່ນັ້ນຍັງບໍ່ມີຂໍ້ສະຫຼຸບ.

HTML tutorial