ລັດເຊຍວ່າ ສ.ອາເມຣິກາກຳລັງປະສົບກັບຄວາມຜິດຫວັງຕໍ່ບັນຫາການເມືອງພາຍໃນເບລາຣຸດຊີ

ລາຍງານ 24 ສິງຫາ 2020, ທ່ານ ເຊີເກີ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍ ກ່າວເມື່ອວັນອາທິດ (23 ສິງຫາ) ທີ່ຜ່ານມາ ກ່ຽວກັບການໂຮມນຸມຊຸມປະທ້ວງຂັບໄລ່ລັດຖະບານເບລາຣຸດຊີ ພາຍໃຕ້ການນຳຂອງທ່ານປະທານປະເທດ ອະເລັກຊານເດີ ລູຄາເຊນໂກ ທີ່ມີຕົ້ນເຫດມາຈາກຜົນການເລືອກຕັ້ງເມື່ອວັນທີ 9 ສິງຫາ ທີ່ຜ່ານມາ ວ່າເປັນເລື່ອງທີ່ປະຊາຊົນເບລາຣຸດຊີທຸກຝ່າຍຕ້ອງຮ່ວມກັນຫາທາງອອກ ແລະ ເລືອກເອງວ່າຕ້ອງການແກ້ໄຂສະຖານະການໃນແບບໃດ ທີ່ສຳຄັນຄືຕ້ອງພະຍາຍາມປ້ອງກັນການປຸກລະດົມຈາກພາຍນອກ.

ທ່ານ ເຊີເກ ລາວາຣົບກ່າວຕໍ່ວ່າ ໂດຍສ່ວນຕົວຕົນເຫັນວ່າ ສະຖານະການໃນເບລາຣຸດຊີຕອນນີ້ມີຄວາມຄົງທີ່ຫຼາຍ ເຊິ່ງພາວະດັ່ງກ່າວເປັນສິ່ງຈຳເປັນ ເຖິງແມ່ນວ່າການໂຮມນຸມຊຸມ ແລະ ເດີນຂະບວນປະທ້ວງຍັງຄົງເກີດຂຶ້ນທັງຂອງຝ່າຍສະໜັບສະໜູນ ແລະ ຝ່າຍຕໍ່ຕ້ານລັດຖະບານ ແຕ່ເປັນການເຄື່ອນໄຫວໂດຍສະຫງົບ ບໍ່ມີຄວາມຮຸນແຮງເກີດຂຶ້ນອີກ ມີຄວາມເປັນລະບຽບຮຽບຮ້ອຍຫຼາຍຂຶ້ນ ສະຖານະການແບບນີ້ຄົງບໍ່ຖືກໃຈ “ຄົນບາງກຸ່ມ” ທີ່ຫວັງຢາກໃຫ້ຄວາມຂັດແຍ່ງທາງການເມືອງຂອງເບລາຣຸດຊີບານປາຍກາຍເປັນການນອງເລືອດ ແບບດຽວກັບທີ່ເຄີຍເກີດຂຶ້ນມາແລ້ວໃນອູແກຣນ.

ພາບ: ທ່ານ ເຊີເກ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍ ໃຫ້ສຳພາດ, 23 ສິງຫາ 2020.

ເມື່ອນັກຂ່າວຂໍໃຫ້ຂະຫຍາຍຄຳວ່າ “ຄົນກຸ່ມນັ້ນ” ໝາຍເຖິງໃຜ ທ່ານ ເຊີເກ ລາວາຣົບກ່າວກົງໄປກົງມາ ວ່ານັກການເມືອງເບລາຣຸດຊີ ແລະ ນັກເຄື່ອນໄຫວຕໍ່ຕ້ານລັດຖະບານຈຳນວນໜຶ່ງ ທີ່ລວມຕົວກັນໃນນາມ “ຄະນະມົນຕີປະສານງານ” ໂດຍມີ ສ.ອາເມຣິກາເປັນຫົວໜ້າໃຫຍ່ຝ່າຍຕາເວັນຕົກທີ່ພະຍາຍາມຊັກນຳບຸກຄົນກຸ່ມນີ້ວ່າເປັນຜູ້ມີຄວາມຊອບທຳໃນການເຈລະຈາກັບທ່ານ ອະເລັກຊານເດີ ລູຄາເຊນໂກ ກຳລັງຜິດຫວັງ ທີ່ການປະທ້ວງຂັບໄລ່ລັດຖະບານບໍ່ຂະຫຍາຍວົງກວ້າງໄປກວ່ານີ້.

ໃນດ້ານຂອງລັດຖະບານ ສ.ອາເມຣິກາ ຍັງບໍ່ສະແດງຈຸດຢືນຢ່າງເປັນທາງການຕໍ່ຄວາມຄິດເຫັນຂອງທ່ານ ເຊີເກ ລາວາຣົບ ແຕ່ທ່ານ ສະຕີເຟນ ບີກັນ ຮອງລັດຖະມົນຕີກະຊວງການຕ່າງປະເທດ ສ.ອາເມຣິກາ ມີກຳນົດຢ້ຽມຢາມລິດຕົວນີ, ລັດເຊຍ ແລະ ອູແກຣນໃນອາທິດນີ້.

HTML tutorial