ເກີດເຫດລະເບີດ 2 ຄັ້ງ ຢູ່ເກາະຊູລູ ປະເທດຟິລິບປິນ ເຈັບ-ຕາຍຈຳນວນຫຼາຍ

ລາຍງານ 24 ສິງຫາ 2020, ທ່ານພົນໂທ ໂຣໂນໂດ ມັດເຕໂອ ໂຄສົກອງພົນທະຫານຮາບທີ 11 ກອງທັບຟິລິບປິນ ຖະແຫຼງໃນວັນຈັນນີ້ ເລື່ອງການເກີດເຫດລະເບີດ 2 ຄັ້ງພາຍໃນເວລາໄລ່ເລ່ຍກັນ ຢູ່ເກາະຊູລູ ໃນພູມມິພາກບັງຊາໂມໂຣ ເຊິ່ງເປັນສ່ວນໜຶ່ງຂອງເກາະມິນດາເນົາ ທາງພາກໃຕ້ຂອງຟິລິບປິນ ໃນຕອນທ່ຽງຕາມເວລາທ້ອງຖິ່ນ.

ເຊິ່ງການລະເບີດທັງສອງຄັ້ງເກີດຂຶ້ນໃນເຂດຊຸມຊົນ ເຮັດໃຫ້ມີຜູ້ເສຍຊີວິດແລ້ວ 10 ຄົນ ແລະ ໄດ້ຮັບບາດອີກປະມານ 40 ຄົນ ໂດຍຜູ້ເສຍຊີວິດມີທັງທະຫານ, ຕຳຫຼວດ ແລະ ປະຊາຊົນ ເບື້ອງຕົ້ນພົບວ່າຈຸດເກີດເຫດຄັ້ງທຳອິດ ຄົນຮ້າຍຊຸກເຊືອງລະເບີດໄວ້ໃນລົດຈັກ ທີ່ຈອດໃກ້ກັບສູນການຄ້າ ແລະ ການລະເບີດເກີດຂຶ້ນໃນເວລາທີ່ເຈົ້າໜ້າທີ່ຝ່າຍຄວາມໝັ້ນຄົງກຸ່ມໜຶ່ງກຳລັງຍ່າງເລາະລາດຕະເວນ, ຂະນະທີ່ການລະເບີດຄັ້ງທີ 2 ເກີດຂຶ້ນຈາກມືລະເບີດເຊິ່ງເປັນຜູ້ຍິງ.

ພາຍຫຼັງເກີດເຫດຍັງບໍ່ມີໃຜອອກມາຮັບເປັນຜູ້ລົງມືກໍ່ເຫດ ແຕ່ເກາະຊູລູເປັນເຂດທີ່ໝັ້ນຂອງກຸ່ມອາບູ ໄຊຢາບ ແລະ ເຫດຄວາມຮຸນແຮງເກີດຂຶ້ນຂະນະທີ່ຝ່າຍຄວາມໝັ້ນຄົງຕິດຕາມລະວັງໄພຂັ້ນສູງສຸດ ທ່າມກາງການຄາດການວ່າ ຈະມີການເອົາຄືນຈາກກຸ່ມອາບູ ໄຊຢາບ ເນື່ອງຈາກເມື່ອວັນທີ 14 ສິງຫາ ທີ່ຜ່ານມາ ຝ່າຍຄວາມໝັ້ນຄົງໄດ້ຈັບກຸມທ້າວ ອັບດຸນຈີຮັດ ຊູຊູກັນ ແກນນຳຍ່ອຍຂອງອາບູ ໄຊຢາບ ຜູ້ຄວບຄຸມການລັກພາຕົວຄົນຕ່າງປະເທດໄປເປັນຕົວປະກັນເພື່ອຮຽກຄ່າໄຖ່ ເຊິ່ງເປັນແຫຼ່ງລາຍໄດ້ຫຼັກຂອງກຸ່ມອາບູ ໄຊຢາບ ໃນໄລຍະ 3-4 ປີທີ່ຜ່ານມາ.

HTML tutorial