ຈີນບໍ່ພໍໃຈ ສ.ອາເມຣິກາ ທີ່ສົ່ງຍົນສອດແນມເຂົ້າເຂດຫ້າມບິນ ທີ່ກອງທັບຈີນກຳລັງຊ້ອມຮົບ

ລາຍງານ 26 ສິງຫາ 2020, ກະຊວງປ້ອງກັນປະເທດຈີນ ອອກຖະແຫຼງການ ເລື່ອງການດຳເນີນການຕາມຊ່ອງທາງການທູດຢ່າງເປັນທາງການ ຕໍ່ກໍລະນີທີ່ ສ.ອາເມຣິກາ ສົ່ງຍົນສອດແນມເພດານບິນສູງ Lockheed U-2 ເຂົ້າມາໃນເຂດມົນທົນທະຫານພາກເໜືອ ເຊິ່ງກຳລັງມີການຊ້ອມຮົບໂດຍໃຊ້ອາວຸດແທ້ຕາມກຳນົດການ ແລະ ມີການປະກາດເປັນເຂດຫ້າມບິນເພື່ອຄວາມປອດໄພ ເມື່ອວັນອັງຄານ (25 ສິງຫາ) ທີ່ຜ່ານມາ.

ຖະແຫຼງການຂອງຈີນລະບຸຕໍ່ອີກວ່າ ການເຄື່ອນໄຫວດັ່ງກ່າວບໍ່ພຽງແຕ່ເປັນການລ່ວງລ້ຳຢ່າງເປີດເຜີຍ ແລະ ຮ້າຍແຮງ ແລ້ວຍັງກໍ່ໃຫ້ເກີດຄວາມສ່ຽງຕໍ່ການເຂົ້າໃຈຜິດ ແລະ ເຮັດໃຫ້ການປະເມີນສະຖານະການຄາດເຄື່ອນ, ເຖິງແມ່ນວ່າບໍ່ແມ່ນຄັ້ງທຳອິດທີ່ເກີດເຫດການໃນລັກສະນະນີ້ ແຕ່ເກືອບວ່າບໍ່ມີຄັ້ງໃດທີ່ລັດຖະບານຈີນຈະບໍ່ສະແດງຄວາມບໍ່ພໍໃຈຢ່າງເປີດເຜີຍ.

ໃນດ້ານກອງທັບ ສ.ອາເມຣິກາ ມີຖະແຫຼງການຕອບໂຕ້ຈີນ ວ່າຍົນ Lockheed U-2 ພາຍໃຕ້ການຄຸ້ມຄອງຂອງກອງບິນປາຊີຟິກ ປະຕິບັດພາລະກິດພາຍໃຕ້ກົດໝາຍການບິນ ເຊິ່ງເປັນທີ່ຍອມຮັບລະຫວ່າງປະເທດ ແລະ ລະບຽບຂໍ້ບັງຄັບດ້ານການບິນທີ່ກ່ຽວຂ້ອງ ບຸກຄະລາກອນຂອງກອງບິນປາຊີຟິກຈະປະຕິບັດພາລະກິດຕໍ່ໄປໃນເຂດນ່ານຟ້າສາກົນທີ່ລະບຸໂດຍກົດໝາຍລະຫວ່າງປະເທດ ແລະ ຕາມກຳນົດການທີ່ວາງແຜນໄວ້.

ເຊິ່ງກະຊວງປ້ອງກັນປະເທດຂອງຈີນບໍ່ໄດ້ໃຫ້ຂໍ້ມູນຊັດເຈນວ່າເຫດການທີ່ເກີດຂຶ້ນນັ້ນຢູ່ໃສ ແຕ່ການຊ້ອມຮົບຂອງກອງທັບປົດປ່ອຍປະຊາຊົນຈີນ ກຳລັງເກີດຂຶ້ນຢູ່ບໍລິເວນທະເລປົວະໄຫ່ ທາງພາກຕາເວັນອອກສຽງເໜືອຂອງປະເທດ ເຊິ່ງເປັນພື້ນທີ່ສ່ວນໃນສຸດຂອງທະເລເຫຼືອງ ນອກຈາກນີ້ຍັງມີພື້ນທີ່ບາງສ່ວນຂອງທະເລຈີນໃຕ້ອີກດ້ວຍ.

HTML tutorial