ສະພາຄວາມໝັ້ນຄົງ UN ປະຕິເສດຂໍ້ສະເໜີ ສ.ອາເມຣິກາ ທີ່ຕ້ອງການຟື້ນຟູການຂວ້ຳບາດອີຣານ

ລາຍງານ 26 ສິງຫາ 2020, ຕໍ່ກັບການທີ່ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ຍື່ນໜັງສືລົງວັນທີ 20 ສິງຫາ 2020 ຕໍ່ທ່ານ ອັນໂຕນິໂອ ກູເຕເຣສ ເລຂາທິການໃຫຍ່ອົງການສະຫະປະຊາຊາດ (UN) ແລະ ສຳນັກງານຄະນະຜູ້ແທນຖາວອນອິນໂດເນເຊຍ ປະຈຳ UN ເຊິ່ງເຮັດໜ້າທີ່ເປັນປະທານສະພາຄວາມໝັ້ນຄົງແຫ່ງສະຫະປະຊາຊາດ (UNSC) ສະແດງຄວາມຕ້ອງການໃຫ້ມີການໃຊ້ກົນໄກທີ່ຮຽກວ່າ Snapback ເພື່ອຟື້ນຟູມາດຕະການຂວ້ຳບາດຕໍ່ອີຣານ.

ພາບ: ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ (ຊ້າຍ) ແລະ ທ່ານ ດີອັນ ຕຣີອັນສະຢາ ດິຈານີ ເອກອັກຄະລັດຖະທູດອິນໂດເນເຊຍ ປະຈຳ UN, 20 ສິງຫາ 2020.

ທ່ານ ດີອັນ ຕຣີອັນສະຢາ ດິຈານີ ເອກອັກຄະລັດຖະທູດອິນໂດເນເຊຍ ປະຈຳ UN ໃນຖານະປະທານກອງປະຊຸມ UNSC ຖະແຫຼງເມື່ອວັນອັງຄານ (25 ສິງຫາ) ທີ່ຜ່ານມາ ວ່າຂໍ້ຮຽກຮ້ອງຂອງ ສ.ອາເມຣິກາ ບໍ່ສາມາດເດີນໜ້າຕໍ່ໄປໄດ້ ເນື່ອງຈາກສະມາຊິກອີກ 13 ປະເທດສົ່ງໜັງສືຕອບກັບມາຍັງອິນໂດເນເຊຍວ່າ ບໍ່ເຫັນດີນຳ ໝາຍຄວາມວ່າການຈັດກອງປະຊຸມຕໍ່ບັນຫາດັ່ງກ່າວບໍ່ສາມາດເກີດຂຶ້ນໄດ້ເຊັ່ນກັນ.

ຂະນະທີ່ທ່ານ ນາງ ເຄລີ ຄຣາບ ເອກອັກຄະລັດຖະທູດ ສ.ອາເມຣິກາ ປະນາມສະມາຊິກ UNSC ທີ່ເຫຼືອວ່າສະໜັບສະໜູນກຸ່ມກໍ່ການຮ້າຍ ແລະ ຢືນຢັນວ່າ ລັດຖະບານ ສ.ອາເມຣິກາ ຈະດຳເນີນການທຸກວິດຖີທາງ ຕາມກອບຂອງມະຕິ ເລກທີ 2231 ເພື່ອບໍ່ໃຫ້ອີຣານສາມາດມີອາວຸດນິວເຄຼຍໄວ້ໃນຄອບຄອງ ແລະ ຊື້ຂາຍອາວຸດໄດ້ຢ່າງເສລີ, ເຊິ່ງນີເຊຈະເຮັດໜ້າທີ່ເປັນປະທານ UNSC ໃນເດືອນກັນຍາ ທີ່ຈະມາເຖິງນີ້, ແຕ່ການທີ່ເອກອັກຄະລັດຖະທູດນີເຊປະຕິເສດສະໜັບສະໜູນບັນຫາດັ່ງກ່າວຂອງ ສ.ອາເມຣິກາເຊັ່ນກັນ ຈຶ່ງມີທິດທາງວ່າ ສ.ອາເມຣິກາຕ້ອງໄດ້ຖ້າໄປອີກກ່ອນ.

ທ່ານ ໄມ ພອມແພວ ເດີນທາງໄປຍັງສຳນັກງານໃຫຍ່ຂອງ UN ດ້ວຍຕົນເອງ ເມື່ອວັນທີ 20 ສິງຫາ ທີ່ຜ່ານມາ ປະກາດວ່າ ສ.ອາເມຣິກາ ມີຄວາມຊອບທຳທີ່ຈະຊຸກດັນໃຫ້ UNSC ກັບມາຂວ້ຳບາດອີຣານ ຈາກການທີ່ລັດຖະບານອີຣານບໍ່ປະຕິບັດຕາມຂໍ້ຕົກລົງນິວເຄຼຍ ສະບັບປີ 2015 ເຖິງແມ່ນວ່າລັດຖະບານ ສ.ອາເມຣິກາຈະຖອນຕົວຈາກການເປັນພາຄີຂອງຂໍ້ຕົກລົງດັ່ງກ່າວ ເມື່ອປີ 2018 ແລ້ວກໍ່ຕາມ, ພ້ອມທັງຢືນຢັນວ່າກົນໄກການຂວ້ຳບາດຈະກັບມາມີຜົນພາຍໃນອີກ 30 ວັນຂ້າງໜ້ານັບຈາກມື້ທີ່ຍື່ນເອກະສານ ຫາກ UNSC ບໍ່ດຳເນີນການໃດ.

ນອກນີ້, UNSC ມີມະຕິເມື່ອວັນທີ 14 ສິງຫາ ທີ່ຜ່ານມາ ບໍ່ຮັບຍັດຕິທີ່ສະເໜີໂດຍ ສ.ອາເມຣິກາ ວ່າດ້ວຍການໃຫ້ຂະຫຍາຍເວລາມາດຕະການເກືອດຫ້າມດຳເນີນການໃດໆດ້ານອາວຸດກັບອີຣານ ຫຼື ເອີ້ນວ່າມາດຕະການປິດລ້ອມດ້ານອາວຸດຕໍ່ອີຣານ ໃຫ້ມີຜົນຕໍ່ໄປຢ່າງບໍ່ມີກຳນົດ ຈາກການທີ່ເງື່ອນໄຂດັ່ງກ່າວເປັນສ່ວນໜຶ່ງຂອງຂໍ້ຕົກລົງນິວເຄຼຍ ສະບັບປີ 2015 ທີ່ກຳລັງຈະໝົດອາວຸໃນວັນທີ 18 ຕຸລາ ທີ່ຈະມາເຖິງນີ້.

HTML tutorial