ຝຣັ່ງ-ອິຕາລີ 2 ມະຫາອຳນາດເອີຣົບຮ່ວມຊ້ອມຮົບກັບເກຣັກທ່າມກາງຄວາມຂັດແຍ່ງກັບຕວັກກີ

ລາຍງານ 27 ສິງຫາ 2020, ກະຊວງປ້ອງກັນປະເທດເກຣັກຖະແຫຼງ ເມື່ອວັນພຸດ (26 ສິງຫາ) ທີ່ຜ່ານມາ ລະບຸວ່າການຊ້ອມຮົບຮ່ວມຂອງກອງທັບເກຣັກ, ໄຊປຣັດ, ຝຣັ່ງ ແລະ ອິຕາລີ ຈະຈັດຂຶ້ນໃນທະເລນອກຝັ່ງທາງທິດໃຕ້ຂອງໄຊປຣັດ ແລະ ເກາະຄຣິດຂອງເກຣັກ ລະຫວ່າງວັນທີ 26-28 ສິງຫານີ້; ສ່ວນຖະແຫຼງການທາງ Twitter ໃນວັນດຽວກັນຂອງທ່ານ ນາງ ຟລໍເຣນ ປາລີ ລັດຖະມົນຕີກະຊວງປ້ອງກັນປະເທດຝຣັ່ງ ກ່າວວວ່າທະເລເມດິເຕີເຣນຽນຝັ່ງຕາເວັນອອກ ໄດ້ກາຍເປັນເຂດທີ່ມີຄວາມເຄັ່ງຕຶງ ຄູ່ກໍລະນີທຸກຝ່າຍຄວນເຄົາລົບກົດໝາຍລະຫວ່າງປະເທດ ໂດຍບໍ່ມີຂໍ້ຍົກເວັ້ນ.

ທ່ານ ນາງ ຟລໍເຣນ ປາລີ ກ່າວອີກວ່າ ກອງທັບຝຣັ່ງສົ່ງຍົນຮົບ Rafale 3 ລຳ ແລະ ເຮືອບັນທຸກເຮລິຄັອບແຕ 1 ລຳເຂົ້າຮ່ວມການຊ້ອມຮົບໃນຄັ້ງນີ້.

ການຄົ້ນພົບແຫຼ່ງແກັດທຳມະຊາດຂະໜາດໃຫຍ່ຫຼາຍຈຸດ ໃນທະເລຮອບເກາະຄຣິດ ແລະ ປະເທດໄຊປຣັດ ເຮັດໃຫ້ເກີດການແຂ່ງຂັນກັນຄົ້ນຫາພະລັງງານໃນເຂດນັ້ນ ແລະ ເຮັດໃຫ້ຄວາມເປັນປໍລະປັກທະວີຄວາມຮຸນແຮງຂຶ້ນລະຫວ່າງເກຣັກ ກັບ ຕວັກກີ ທີ່ຕ່າງກໍ່ເປັນສະມາຊິກອົງການສົນທິສັນຍາອາກລັງຕິກເໜືອ (NATO) ທັງສອງ, ຄວາມເຄັ່ງຕຶງເພີ່ມຂຶ້ນອີກລະດັບ ເມື່ອຕວັກກີສົ່ງເຮືອສຳຫຼວດຫາແຫຼ່ງແກັດທຳມະຊາດ ແລະ ນ້ຳມັນ ພ້ອມດ້ວຍເຮືອຮົບຄຸ້ມກັນເຂົ້າສູ່ເຂດນ່ານນ້ຳທີ່ຍັງມີຄວາມຂັດແຍ່ງ ທີ່ຕວັກກີ ແລະ ເກຣັກຕ່າງກໍ່ອ້າງກຳມະສິດທັບຊ້ອນ ເມື່ອວັນທີ 10 ສິງຫາ ທີ່ຜ່ານມາ.

ເມື່ອວັນອັງຄານ (25 ສິງຫາ) ທີ່ຜ່ານມາ ລັດຖະມົນຕີກະຊວງການຕ່າງປະເທດເກຣັກ ແລະ ຕວັກກີ ກ່າວພາຍຫຼັງການພົບປະຫາລືກັບທ່ານ ໄຮໂກ ມາສ ລັດຖະມົນຕີກະຊວງການຕ່າງປະເທດເຢຍລະມັນ ວ່າທັງສອງຝ່າຍຕ້ອງການແກ້ໄຂຄວາມຂັດແຍ່ງດ້ວຍການເຈລະຈາ ແຕ່ກໍ່ພ້ອມທີ່ຈະປົກປ້ອງສິດທິໃນເຂດນ່ານນ້ຳ ຫາກຖືກຝ່າຍໃດຝ່າຍໜຶ່ງລະເມີດ.

HTML tutorial