ປ.ປູຕິນ ຢືນຢັນພ້ອມໃຫ້ການຊ່ວຍເຫຼືອດ້ານຄວາມໝັ້ນຄົງແກ່ເບລາຣຸດຊີ

ລາຍງານ 27 ສິງຫາ 2020, ທ່ານ ວະລາດິເມຍ ປູຕິນ ປະທານປະເທດລັດເຊຍ ໃຫ້ສຳພາດກັບສະຖານີໂທລະພາບແຫ່ງຊາດລັດເຊຍ (ROSSIYA-1) ທີ່ອອກອາກາດໃນວັນພະຫັດນີ້ ມີເນື້ອໃນຕອນໜຶ່ງກ່ຽວກັບສະຖານະການການເມືອງໃນເບລາຣຸດຊີ ທີ່ມີການປະທ້ວງແກ່ຍາວມາຕັ້ງແຕ່ວັນທີ 9 ສິງຫາ ທີ່ຜ່ານມາ ວ່າລັດຖະບານເບລາຣຸດຊີ ແລະ ຝ່າຍຄ້ານຕ້ອງເຈລະຈາຮ່ວມກັນໃນຖານະປະຊາຊົນເບລາຣຸດຊີ.

ຂະນະດຽວກັນ ທ່ານ ປູຕິນ ກ່າວເຖິງການຮ່ວມມືສອງຝ່າຍໃນຖານະສະຫະພາບລັດເຊຍ ແລະ ເບລາຣຸດຊີ ທີ່ຄວບຄຸມທັງໃນດ້ານການເມືອງ, ເສດຖະກິດ ແລະ ຄວາມໝັ້ນຄົງ ວ່າທ່ານ ອະເລັກຊານເດີ ລູຄາເຊນໂກ ປະທານປະເທດເບເລຣຸດຊີຂໍໃຫ້ຕົນຈັດຕັ້ງໜ່ວຍປະຕິບັດການພິເສດດ້ານຄວາມໝັ້ນຄົງ ໃນຮູບແບບດຽວກັບຕຳຫຼວດ ແລະ ສາມາດເຄື່ອນທີ່ໄວຂ້າມເຂດແດນ.

ເຊິ່ງຜູ້ນຳລັດເຊຍກ່າວວ່າ ຕອນນີ້ຍັງບໍ່ມີຄວາມຈຳເປັນ, ເຖິງຢ່າງໃດກໍ່ຕາມ ລັດເຊຍຢືນຢັນພ້ອມໃຫ້ການຊ່ວຍເຫຼືອດ້ານຄວາມໝັ້ນຄົງແກ່ລັດຖະບານເບລາຣຸດຊີ ຫາກສະຖານະການບານປາຍຈົນບໍ່ສາມາດຄວບຄຸມໄດ້ ແລະ ກອງກຳລັງຫົວຮຸນແຮງພະຍາຍາມກໍ່ຄວາມວຸ້ນວາຍເຊັ່ນການບຸກເຂົ້າສະຖານທີ່ທາງລັດຖະການ.

ນອກຈາກນີ້, ທ່ານ ປູຕິນ ຍັງກ່າວເຖິງກຸ່ມທະຫານຮັບຈ້າງຊາວລັດເຊຍ 33 ຄົນໃນນາມກຸ່ມວາກເນີ (Wagner) ເຊິ່ງເຈົ້າໜ້າທີ່ຝ່າຍຄວາມໝັ້ນຄົງເບລາຣຸດຊີຄວບຄຸມຕົວໄດ້ພຽງບໍ່ພໍເທົ່າໃດວັນກ່ອນນເຖິງວັນລົງຄະແນນເລືອກຕັ້ງ ຈົນມີການວິເຄາະວ່າເປັນສະຖານະການທີ່ບໍ່ປົກກະຕິສຳລັບທັງສອງປະເທດ ໂດຍທ່ານ ປູຕິນ ກ່າວວ່າບຸກຄົນກຸ່ມນັ້ນກຳລັງເດີນທາງໄປຍັງປະເທດທີ່ສາມ ແຕ່ຜັດຫຼົງກົນອັນເປັນພາລະກິດຮ່ວມລະຫວ່າງໜ່ວຍຂ່າວກອງຂອງ ສ.ອາເມຣິກາ ກັບ ອູແກຣນຈົນໄປປາກົດຕົວທີ່ເບລາຣຸດຊີແທນ.

ເຊິ່ງຜູ້ນຳລັດເຊຍບໍ່ໄດ້ກ່າວວ່າທະຫານຮັບຈ້າງກຸ່ມດັ່ງກ່າວກຳລັງຈະເດີນທາງໄປປະເທດໃດ ແລະ ເພາະເຫດໃດຈຶ່ງພາດພິງໂດຍກົງໄປທີ່ ສ.ອາເມຣິກາ ແລະ ອູແກຣນ, ຂະນະທີ່ລັດຖະບານ ສ.ອາເມຣິກາ ແລະ ອູແກຣນຍັງບໍ່ສະແດງຈຸດຢືນຢ່າງເປັນທາງການກັບບັນຫາດັ່ງກ່າວນີ້.

HTML tutorial