ສ.ອາເມຣິກາ ວ່າຈະບໍ່ຍອມສູນເສຍອຳນາດໃນປາຊີຟິກພຽງແຕ່ນິ້ວດຽວໃຫ້ກັບໃຜ ໂດຍສະເພາະຈີນ

ລາຍງານ 27 ສິງຫາ 2020, ທ່ານ ມາກ ເອສເປີ ລັດຖະມົນຕີກະຊວງປ້ອງກັນປະເທດ ສ.ອາເມຣິກາ ກ່າວໃນລະຫວ່າງການຢ້ຽມຢາມເມືອງໂຮໂນລູລູ ລັດຮາວາຍ ເມື່ອວັນພຸດ (26 ສິງຫາ) ທີ່ຜ່ານມາ ຕໍ່ກັບການຮ່ວມມືກັບລັດຖະບານຈີນ ວ່າລັດຖະບານ ສ.ອາເມຣິກາຍັງມີຄວາມມຸ່ງໝັ້ນປະຕິບັດງານຮ່ວມກັບອີກຝ່າຍ ເພື່ອນຳຈີນສູ່ການເຄົາລົບກົດເກນ ແລະ ແນວທາງປະຕິບັດລະຫວ່າງປະເທດ, ເຖິງແມ່ນວ່າລັດຖະບານຈີນ ຜິດສັນຍາຊ້ຳແລ້ວຊ້ຳອີກ ແລະ ເດີນໜ້າຍົກລະດັບເສີມກຳລັງທະຫານໃນເຂດຄວາມຂັດແຍ່ງ.

ເຊິ່ງທ່ານ ມາກ ເອສເປີກ່າວຢ່າງເຈາະຈົງໄປທີ່ທະເລຈີນຕາເວັນອອກ ແລະ ທະເລຈີນໃຕ້ ເຊິ່ງເປັນບໍລິເວນທີ່ລັດຖະບານຈີນ ໃຫ້ຄວາມສຳຄັນດ້ານຜົນປະໂຫຍດ ຈຶ່ງເປັນນ່ານນ້ຳທີ່ກອງທັບປົດປ່ອຍປະຊາຊົນນຈີນ ອອກມາລາດຕະເວນ ແລະ ເຝິກຊ້ອມຮົບຢ່າງສະໝ່ຳສະເໝີ.

ຂະນະດຽວກັນ, ລັດຖະມົນຕີກະຊວງປ້ອງກັນປະເທດ ສ.ອາເມຣິກາ ກ່າວເຖິງຄວາມສຳຄັນຂອງພູມມິພາກອິນໂດ-ປາຊີຟິກ ໃນທາງພູມສາດການເມືອງລະຫວ່າງປະເທດ ວ່າຄືສູນກາງຂອງສະໜາມແຂ່ງຂັນອຳນາດກັບລັດຖະບານຈີນ ຕະຫຼອດຮອດລັດເຊຍ, ແຕ່ລັດຖະບານ ສ.ອາເມຣິກາຕີລາຄາວ່າ ບົດບາດຂອງຈີນໃນພູມມິພາກແຫ່ງນີ້ໄດ້ແຜ່ຂະຫຍາຍອິດທິພົນຈົນຄວບຄຸມບໍ່ພຽງແຕ່ສະເພາະໃນພູມມິພາກ ແຕ່ໄປໄກທົ່ວໂລກແລ້ວ ຈຶ່ງເປັນສິ່ງສຳຄັນຢ່າງຍິ່ງທີ່ ສ.ອາເມຣິກາ ຕ້ອງມີບົດບາດໃນລະດັບທີ່ເທົ່າທຽມກັນ.

ທ່ານ ມາກ ເອສເປີກ່າວປິດທ້າຍວ່າ ສ.ອາເມຣິກາເປັນປະເທດທີ່ຢູ່ໃນພູມມິພາກປາຊີຟິກ ແລະ ເປັນສ່ວນໜຶ່ງຂອງພູມມິພາກອິນໂດ-ຟາຊີຟິກມາເປັນເວລາຍາວນານແລ້ວ ຮຽກໄດ້ວ່າເປັນເຂດຄວາມຮັບຜິດຊອບ ລັດຖະບານ ສ.ອາເມຣິກາບໍ່ມີທາງຍອມສູນເສຍທຸກຢ່າງທີ່ນີ້ແມ່ນແຕ່ພຽງນິ້ວດຽວໃຫ້ກັບປະເທດໃດກໍ່ຕາມ ທີ່ຄິດວ່າຕົນເອງເໜືອກວ່າ.

ສ່ວນໃນດ້ານຂອງລັດຖະບານຈີນ ຍັງບໍ່ມີຄວາມຄິດເຫັນຢ່າງເປັນທາງການຕໍ່ຄຳກ່າວຂອງທ່ານ ມາກ ເອສເປີ ແຕ່ສະແດງຄວາມບໍ່ພໍໃຈການທີ່ລັດຖະບານ ສ.ອາເມຣິກາ ຂວ້ຳບາດລັດວິສາຫະກິດຂອງຈີນ ທີ່ກ່ຽວຂ້ອງກັບໂຄງການກໍ່ສ້າງໃນທະເລຈີນໃຕ້.

HTML tutorial