ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນລາອອກ ຍ້ອນບັນຫາດ້ານສຸຂະພາບ

ລາຍງານ 28 ສິງຫາ 2020, ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ຖະແຫຼງຜ່ານສະຖານີໂທລະພາບແຫ່ງຊາດ ເມື່ອຕອນຫົວຄ່ຳວັນສຸກນີ້ ຕາມເວລາທ້ອງຖິ່ນ ລາອອກຈາກຕຳແໜ່ງຜູ້ນຳລັດຖະບານຍີ່ປຸ່ນ ແລະ ຫົວໜ້າພັກເສລີປະຊາທິປະໄຕ (LDP) ເນື່ອງຈາກສຸຂະພາບເປັນອຸປະສັກຕໍ່ການຕັດສິນໃຈໃນບັນຫາສຳຄັນ, ໂດຍທ່ານ ຊິນໂຊ ອາເບະກ່າວວ່າຕົນເປັນລຳໄສ້ອັກເສບ ເຊິ່ງກໍ່ເຄີຍເຮັດໃຫ້ຈຳເປັນຕ້ອງລາອອກຈາກຕຳແໜ່ງນາຍົກລັດຖະມົນຕີແລ້ວມາເມື່ອປີ 2007 ພາຍຫຼັງດຳລົງຕຳແໜ່ງໄດ້ພຽງ 1 ປີ.

ທ່ານ ຊິນໂຊ ອາເບະ ອາຍຸ 65 ປີຢູ່ໃນຕຳແໜ່ງຕໍ່ເນື່ອງມາຕັ້ງແຕ່ເດືອນທັນວາ 2012 ຍາວນານທີ່ສຸດໃນປະຫວັດສາດການເມືອງຂອງຍີ່ປຸ່ນ ປະຕິເສດແຕ່ງຕັ້ງບຸກຄົນໃຫ້ດຳລົງຕຳແໜ່ງຮັກສາການນາຍົກລັດຖະມົນຕີ ໂດຍກ່າວພຽງວ່າຕົນຈະຮັກສາການເອງ ຈົນກວ່າທຸກຝ່າຍທີ່ກ່ຽວຂ້ອງຈະຮ່ວມກັນຄັດເລືອກຜູ້ທີ່ເໝາະສົມໄດ້ ໝາຍຄວາມວ່າຕ້ອງມີການຢັ່ງສຽງພາຍໃນພັກ LDP ເພື່ອເລືອກຕັ້ງຫົວໜ້າພັກຄົນໃໝ່ ເຊິ່ງແຫຼ່ງຂ່າວໃນພັກ LDP ເປີດເຜີຍວ່າ ຈະມີການລົງຄະແນນໃນວັນທີ 1 ກັນຍານີ້.

ເຊິ່ງການທີ່ທ່ານ ຊິນໂຊ ອາເບະ ເຂົ້າໂຮງໝໍເຖິງ 2 ຄັ້ງພາຍໃນເວລາຫ່າງກັນພຽງ 1 ອາທິດຄື: ວັນທີ 17 ແລະ 24 ສິງຫາ ທີ່ຜ່ານມາ ເພີ່ມຄວາມເປັນຫ່ວງໃຫ້ກັບທຸກຝ່າຍທັນທີ ວ່າບັນຫາດ້ານສຸຂະພາບກຳລັງກັບມາຮາວີທ່ານ ຊິນໂຊ ອະເບະອີກຄັ້ງຫຼືບໍ່.

HTML tutorial