ແນວຄິດການພັດທະນາເສດຖະກິດ ແລະ ສັງຄົມ ຂອງທ່ານ ສີ ຈິ້ນຜິງ ປະທານປະເທດຈີນ

ລາຍງານ 29 ສິງຫາ 2020, ໜັງສືພິມປະຊາຊົນຈີນນຳສະເໜີຄຳປາໄສຂອງທ່ານ ສີ ຈິ້ນຜິງ ປະທານປະເທດຈີນ ຕໍ່ກອງປະຊຸມສຳມະນາກ່ຽວກັບວຽກງານເສດຖະກິດ ແລະ ສັງຄົມ ເມື່ອວັນທີ 24 ສິງຫາ ທີ່ຜ່ານມາວ່າ:

ມື້ນີ້ພວກເຮົາຈັດກອງປະຊຸມສຳມະນາກ່ຽວກັບວຽກງານດ້ານເສດຖະກິດ-ສັງຄົມ ເພື່ອຮັບຟັງຄວາມຄິດເຫັນ ແລະ ຂໍ້ສະເໜີຂອງທຸກທ່ານ ຕໍ່ການວາງແຜນການພັດທະນາເສດຖະກິດ ແລະ ສັງຄົມ 5 ປີ ສະບັບທີ 14  ຜູ້ທີ່ເຂົ້າຮ່ວມການປະຊຸມສຳມະນາໃນມື້ນີ້ ມີທັງນັກເສດຖະກິດ ແລະ ນັກສັງຄົມສາດ, ລຳດັບຕໍ່ໄປ ຂໍຮຽນໃຫ້ຊາບເຖິງແນວຄິດຂອງຂ້າພະເຈົ້າກ່ຽວກັບການສ້າງຄວາມເຂົ້າໃຈ ແລະ ການມີທັດສະນະທີ່ຖືກຕ້ອງຕໍ່ບັນຫາສຳຄັນໃນການພັດທະນາເສດຖະກິດ ແລະ ສັງຄົມໄລຍະກາງ ແລະ ໄລຍະຍາວ.

ພາບ: ບັນຍາກາດກອງປະຊຸມສຳມະນາກ່ຽວກັບວຽກງານເສດຖະກິດ ແລະ ສັງຄົມຈີນ, ວັນທີ 24 ສິງຫາ 2020.

ການສ້າງແຜນໄລຍະກາງ ແລະ ໄລຍະຍາວໃນການຊີ້ນຳການພັດທະນາເສດຖະກິດ ແລະ ສັງຄົມເປັນຮູບແບບສຳຄັນໃນການປົກຄອງບໍລິຫານປະເທດຂອງພັກຄອມມູນິດຈີນ, ນັບຕັ້ງແຕ່ປີ 1953 ເປັນຕົ້ນມາ ຈີນໄດ້ປະຕິບັດຕາມແຜນພັດທະນາເສດຖະກິດ-ສັງຄົມ 5 ປີ ລວມ 13 ສະບັບແລ້ວ ໃນຈຳນວນນີ້ ນັບຕັ້ງແຕ່ດຳເນີນນະໂຍບາຍການປະຕິຮູບ ແລະ ເປີດປະເທດເປັນຕົ້ນມາ ມີການສ້າງ ແລະ ປະຕິບັດຕາມແຜນການພັດທະນາ 8 ສະບັບ ເຊິ່ງໄດ້ຊຸກດັນການພັດທະນາເສດຖະກິດ-ສັງຄົມ, ຍົກລະດັບກຳລັງແຮງແຫ່ງຊາດ ແລະ ປັບປຸງຄຸນນະພາບຊີວິດການເປັນຢູ່ຂອງປະຊາຊົນໃຫ້ນັບມື້ນັບດີຂຶ້ນເລື້ອຍໆ ຈົນໄດ້ສ້າງສິ່ງມະຫັດສະຈັນທາງການພັດທະນາເສດຖະກິດຢ່າງໄວວາ ແລະ ການມີສະຖຽນລະພາບທາງສັງຄົມໃນໄລຍະຍາວ ເຊິ່ງເປັນປາກົດການທີ່ພົບເຫັນໄດ້ໜ້ອຍຫຼາຍໃນໂລກ.

ພາກປະຕິບັດພິສູດໃຫ້ເຫັນວ່າ ແຜນການພັດທະນາໃນໄລຍະກາງ ແລະ ໄລຍະຍາວ ບໍ່ພຽງສາມາດເຮັດໃຫ້ຕະຫຼາດສະແດງບົດບາດໃນລັກສະນະຊີ້ຂາດໃນການຈັດສັນຊັບພະຍາກອນ ມັນຍັງເຮັດໃຫ້ລັດຖະບານສາມາດສະແດງບົດບາດໄດ້ດີຍິ່ງຂຶ້ນອີກດ້ວຍ.

ໄລຍະປະຕິບັດຕາມແຜນການພັດທະນາເສດຖະກິດ-ສັງຄົມ 5 ປີ ສະບັບທີ 14 ເປັນເວລາ 5 ປີທຳອິດທີ່ຈີນເລີ່ມຂະບວນການໃໝ່ແຫ່ງການກໍ່ສ້າງສັງຄົມນິຍົມທີ່ມີຄວາມທັນສະໄໝຢ່າງຮອບດ້ານ ແລະ ກ້າວໄປສູ່ເປົ້າໝາຍສູ້ຊົນ 100 ປີຮອບທີ 2 ພາຍຫຼັງປະເທດເຮົາໄດ້ສ້າງສັງຄົມລະດັບປານກາງຢ່າງຮອບດ້ານ ແລະ ໄດ້ບັນລຸເປົ້າໝາຍສູ້ຊົນ 100 ປີທຳອິດ ບໍ່ວ່າຈະເຮັດສິ່ງໃດກໍ່ຕາມ ຫາກມີການວາງແຜນໄວ້ລ່ວງໜ້າເປັນຢ່າງດີ ກໍ່ຈະມີໂອກາດປະສົບຄວາມສຳເລັດ ຖ້າບໍ່ດັ່ງນັ້ນ ແມ່ນຕ້ອງປະສົບກັບຄວາມລົ້ມແຫຼວ.

ພວກເຮົາຕ້ອງມີວິໄສທັດທີ່ກວ້າງໄກ ເຂົ້າໃຈເຖິງທ່າອ່ຽງທີ່ກ້າວເປັນໄປ, ຮັບຟັງຄວາມຄິດເຫັນຈາກທຸກພາກສ່ວນ, ລະດົມສະຕິປັນຍາຈາກຝ່າຍຕ່າງໆ ແລະ ສຶກສາຄົ້ນຄວ້າວິໄຈສະຖານະການໃໝ່ໆ ເພື່ອວາງແຜນການພັດທະນາສະບັບໃໝ່ໃຫ້ດີທີ່ສຸດ.

ປະການທຳອິດ ຕ້ອງເບິ່ງໂອກາດໃໝ່ ແລະ ຄວາມທ້າທາຍໃໝ່ດ້ວຍການວິເຄາະຢ່າງມີເຫດມີຜົນ ນັບຕັ້ງແຕ່ການຈັດກອງປະຊຸມໃຫຍ່ຜູ້ແທນພັກຄອມມູນິດຈີນ ຄັ້ງທີ 19 ເປັນຕົ້ນມາ ຂ້າພະເຈົ້າຢ້ຳຄືນຫຼາຍຄັ້ງວ່າ ໂລກປັດຈຸບັນກຳລັງເກີດການປ່ຽນແປງຢ່າງໃຫຍ່ຫຼວງໃນແບບທີ່ບໍ່ເຄີຍມີມາກ່ອນໃນຮອບ 100​ ປີທີ່ຜ່ານມາ, ຂະນະນີ້ ການລະບາດຂອງພະຍາດໂຄວິດ-19 ເຮັດໃຫ້ການປ່ຽນແປງດັ່ງກ່າວເກີດຂຶ້ນຢ່າງໄວວາຍິ່ງຂຶ້ນ, ການກີດກັນທາງການຄ້າ ແລະ ແນວຄິດຝ່າຍດຽວມີຄວາມຮຸນແຮງຂຶ້ນ, ເສດຖະກິດຫົດຕົວ, ຕ່ອງໂຊ້ອຸດສາຫະກຳ ແລະ ຕ່ອງໂຊ້ອຸປະທານໂລກໄດ້ຮັບຜົນກະທົບຈາກປັດໄຈນອກເສດຖະກິດ, ສະຖານະການເສດຖະກິດ ວິທະຍາສາດ ເຕັກໂນໂລຊີ ວັດທະນະທຳ ຄວາມໝັ້ນຄົງ ແລະ ການເມືອງລະຫວ່າງປະເທດ ລ້ວນແຕ່ກຳລັງເກີດການປ່ຽນແປງໃນລະດັບທີ່ເລິກເຊິ່ງ, ໂລກກຳລັງເຂົ້າສູ່ໄລຍະເວລາທີ່ເກີດຄວາມຜັນຜວນ ແລະ ການປ່ຽນແປງ, ໃນຕໍ່ໜ້າ ພວກເຮົາຈະປະເຊີນກັບສະພາບແວດລ້ອມພາຍນອກ ທີ່ຂ້ອນຂ້າງຍາກລຳບາກ ຈຶ່ງຕ້ອງກຽມຄວາມພ້ອມໃນການຮັບມືກັບຄວາມສ່ຽງ ແລະ ສິ່ງທ້າທາຍຕ່າງໆ.

ສະພາບແວດລ້ອມພາຍໃນປະເທດກຳລັງເກີດການປ່ຽນແປງໃນລະດັບທີ່ເລິກເຊິ່ງເຊັ່ນກັນ ຈີນໄດ້ເຂົ້າສູ່ໄລຍະຂອງການພັດທະນາທີ່ມີຄຸນນະພາບສູງ, ຄວາມຂັດແຍ່ງຫຼັກທາງສັງຄົມໄດ້ປ່ຽນເປັນຄວາມຂັດແຍ່ງລະຫວ່າງຄວາມຕ້ອງການຄຸນນະພາບຊີວິດທີ່ດີຍິ່ງຂຶ້ນຂອງປະຊາຊົນກັບການພັດທະນາທີ່ບໍ່ດຸ່ນດ່ຽງ ແລະ ບໍ່ເຕັມທີ່, GDP ຂອງປະເທດໂດຍສະເລ່ຍຕໍ່ຫົວຄົນສູງເຖິງ 10,000 ໂດລາສະຫະລັດ, ຊີວິດການເປັນຢູ່ໃນເມືອງມີອັດຕາສ່ວນສູງກວ່າ 60%, ປະຊາກອນມີລາຍໄດ້ລະດັບປານກາງມີຈຳນວນຫຼາຍກວ່າ 400 ລ້ານຄົນ ປະຊາຊົນຕ້ອງການມີຄຸນນະພາບຊີວິດທີ່ດີຂຶ້ນຢ່າງຕໍ່ເນື່ອງ.

ລະບົບການປົກຄອງບໍລິຫານຂອງປະເທດເຮົາມີຄວາມໄດ້ປຽບຢ່າງຊັດເຈນ ການປົກຄອງບໍລິຫານບ້ານເມືອງທີ່ມີປະສິດທິພາບສູງຂຶ້ນ, ເສດຖະກິດໄລຍະຍາວມີທິດທາງທີ່ດີຂຶ້ນ, ພື້ນຖານດ້ານວັດຖຸສິ່ງຂອງມີຄວາມໝັ້ນຄົງ, ຊັບພະຍາກອນມະນຸດມີຈຳນວນມະຫາສານ, ຕະຫຼາດມີອະນາຄົດກວ້າງໄກ, ການພັດທະນາໃນດ້ານຕ່າງໆມີຄວາມຫົດຍືດໄດ້ດີ, ສັງຄົມມີສະຖຽນລະພາບ.

ການພັດທະນາໃນໄລຍະຕໍ່ໜ້າມີຄວາມໄດ້ປຽບ ແລະ ພ້ອມໃນຫຼາຍດ້ານ ແຕ່ໃນຂະນະດຽວກັນ ຈີນກໍ່ປະເຊີນກັບບັນຫາການພັດທະນາທີ່ບໍ່ດຸ່ນດ່ຽງກັນ ແລະ ບໍ່ເຕັມທີ່, ທັກສະດ້ານນະວັດຕະກຳຍັງບໍ່ສອດຄ່ອງກັບຄວາມຕ້ອງການໃນການພັດທະນາທີ່ມີຄຸນນະພາບສູງ, ພື້ນຖານດ້ານການຜະລິດກະສິກຳຍັງບໍ່ໝັ້ນຄົງ, ການພັດທະນາ ແລະ ການກະຈາຍລາຍໄດ້ລະຫວ່າງເມືອງ ແລະ ຊົນນະບົດຍັງມີຄວາມແຕກໂຕນກັນຫຼາຍ, ການອະນຸລັກສິ່ງແວດລ້ອມມີພາລະຢ່າງໜັກໜ່ວງ ແລະ ຕ້ອງກ້າວໜ້າໄປອີກໄກ, ການໃຫ້ຫຼັກປະກັນດ້ານຊີວິດການເປັນຢູ່ຂອງປະຊາຊົນຍັງມີຈຸດອ່ອນ, ການບໍລິຫານທາງສັງຄົມມີຊ່ອງຫວ່າງ.

ສະຫຼຸບໄດ້ວ່າ: ໃນຍຸກໃໝ່ແຫ່ງການພັດທະນາ ທີ່ສະພາບແວດລ້ອມພາຍໃນປະເທດ ແລະ ຕ່າງປະເທດທີ່ເກີດການປ່ຽນແປງຢ່າງເລິກເຊິ່ງ ໄດ້ນຳມາທັງໂອກາດໃໝ່ ແລະ ສິ່ງທ້າທາຍໃໝ່, ວິກິດ ແລະ ໂອກາດຈະມາພ້ອມກັນ ເວົ້າລວມ ທ່າມກາງວິກິດຈະມີໂອກາດ ແລະ ສາມາດປ່ຽນວິກິດໃຫ້ເປັນໂອກາດໄດ້.

ພວກເຮົາຕ້ອງໃຊ້ຄວາມຄິດດ້ວຍເຫດ ແລະ ຜົນສ້າງຄວາມເຂົ້າໃຈ ແລະ ຮັບຮູ້ເຖິງທິດທາງທີ່ຕ້ອງເດີນໄປທັງຂອງພາຍໃນ ແລະ ຕ່າງປະເທດ ຕ້ອງເຮັດໃຫ້ຍຸດທະສາດຟື້ນຟູຄວາມຈະເລີນຮຸ່ງເຮືອງຂອງປະຊາຊົນຈີນຢ່າງຍິ່ງໃຫຍ່ ສອດຄ່ອງກັບສະຖານະການທີ່ເກີດການປ່ຽນແປງທີ່ໃຫຍ່ຫຼວງ ທີ່ບໍ່ເຄີຍເກີດຂຶ້ນມາກ່ອນໃນໂລກໄລຍະ 100 ປີຜ່ານມາ.

ຕ້ອງມີການຮຽນຮູ້ໃນລະດັບທີ່ເລິກເຊິ່ງກ່ຽວກັບລັກສະນະໃໝ່ ແລະ ຄວາມຕ້ອງການໃໝ່ ທີ່ເກີດຈາກຄວາມຂັດແຍ່ງຫຼັກທາງສັງຄົມທີ່ໄດ້ເກີດການປ່ຽນແປງໄປແລ້ວ ແລະ ມີຄວາມເຂົ້າໃຈລະດັບທີ່ເລິກເຊິ່ງເຖິງຄວາມຂັດແຍ່ງ ແລະ ສິ່ງທ້າທາຍໃໝ່ທີ່ເກີດຈາກສະພາບແວດລ້ອມທີ່ມີຄວາມສະຫຼັບຊັບຊ້ອນ, ປູກຈິດສຳນຶກໃນການໂອບເອົາໂອກາດ ແລະ ຮັບມືກັບຄວາມສ່ຽງດ້ານຕ່າງໆ.

ຕ້ອງເຂົ້າໃຈການປ່ຽນແປງຢ່າງຖືກຕ້ອງ ຮັບມືກັບການປ່ຽນແປງຕາມຫຼັກວິທະຍາສາດ ມຸ່ງໝັ້ນໃຫ້ເກີດການປ່ຽນແປງໄປໃນທິດທາງທີ່ດີ ຕ້ອງກ້າພາຍເຮືອທວນກະແສນ້ຳ ຕ້ອງມີຄວາມຊຳນານໃນການປ່ຽນວິກິດໃຫ້ເປັນໂອກາດ ພະຍາຍາມບັນລຸການພັດທະນາທີ່ມີຄຸນນະພາບ, ປະສິດທິພາບ, ຄວາມທ່ຽງທຳ, ຄວາມຖາວອນ ແລະ ຄວາມໝັ້ນຄົງໃຫ້ຫຼາຍຂຶ້ນ.

ປະການທີສອງ ສ້າງສະຖານະໃໝ່ແຫ່ງການພັດທະນາເສດຖະກິດແຫ່ງຊາດທີ່ມີການໝຸນວຽນຢ່າງຄ່ອງຕົວ ນັບຕັ້ງແຕ່ຕົ້ນປີນີ້ເປັນຕົ້ນມາ ຂ້າພະເຈົ້າກ່າວຢ້ຳຫຼາຍຄັ້ງແລ້ວວ່າ ຕ້ອງຊຸກດັນໃຫ້ເກີດສະຖານະໃໝ່ແຫ່ງການພັດທະນາ ທີ່ຖືເອົາການໝຸນວຽກທາງເສດຖະກິດພາຍໃນປະເທດເປັນຫຼັກ ແລະ ໃຫ້ເອົາການໝຸນວຽນທາງເສດຖະກິດພາຍໃນປະເທດ ແລະ ຕ່າງປະເທດສົ່ງເສີມ ແລະ ສະໜັບສະໜູນເຊິ່ງກັນ ແລະ ກັນ.

ສະຖານະໃໝ່ແຫ່ງການພັດທະນາດັ່ງກ່າວນີ້ ກຳນົດຂຶ້ນຕາມຂັ້ນຕອນການພັດທະນາຕາມສະພາບແວດລ້ອມ ແລະ ເງື່ອນໄຂດ້ານຕ່າງໆ ທີ່ເກີດການປ່ຽນແປງ ເປັນທາງເລືອກທາງຍຸດທະສາດ ທີ່ສ້າງຄວາມໄດ້ປຽບໃໝ່ໃນການດຳເນີນການຮ່ວມມື ແລະ ການແຂ່ງຂັນລະຫວ່າງປະເທດ.

ໃນໄລຍະປີຜ່ານໆມານີ້ ບວກກັບປັດໄຈການພັດທະນາດ້ານຕ່າງໆທັງພາຍໃນປະເທດ ແລະ ຕ່າງປະເທດເກີດການປ່ຽນແປງການໝຸນວຽນທາງເສດຖະກິດກັບຕ່າງປະເທດໃນລັກສະນະມີຕະຫຼາດ ແລະ ຊັບພະຍາກອນຢູ່ຕ່າງປະເທດນັ້ນອ່ອນແອລົງຢ່າງຊັດເຈນ, ຂະນະທີ່ຄວາມຕ້ອງການພາຍໃນປະເທດມີຄວາມສາມາດພຽງພໍ ການໝຸນວຽນທາງເສດຖະກິດພາຍໃນປະເທດນັບມື້ນັບມີຄວາມຄຶກຄືນຍິ່ງຂຶ້ນ ຈົນເຮັດໃຫ້ເກີດສະຖານະການດ້ານການໝຸນວຽກລະຫວ່າງປະເທດອ່ອນແອລົງ ແຕ່ດ້ານການໝຸນວຽກພາຍໃນປະເທດເຂັ້ມແຂງຂຶ້ນ.

ສຳລັບປາກົດການນີ້ ນັກວິຊາການໄດ້ມີການສຶກສາມາສ່ວນໜຶ່ງແລ້ວ ສາມາດສຶກສາຄົ້ນຄວ້າໃຫ້ເລິກເຊິ່ງຍິ່ງຂຶ້ນຕໍ່ໄປ ພ້ອມສະເໝີຄວາມຄິດເຫັນທີ່ສອດຄ່ອງກັບຄວາມເປັນຈິງ ແລະ ເປັນປະໂຫຍດ.

ນັບຕັ້ງແຕ່ເກີດວິກິດການການເງິນລະຫວ່າງປະເທດ ເມື່ອປີ 2008 ເປັນຕົ້ນມາ ເສດຖະກິດຈີນກຳລັງເກີດການປ່ຽນແປງທີ່ມີການໝຸນວຽນພາຍໃນປະເທດເປັນຫຼັກ ການເກີນດຸນການຊຳລະກັບຕ່າງປະເທດໃນມີອັດຕາສ່ວນໃນ GDP ຫຼຸດລົງຈາກ 9.9% ໃນປີ 2007 ມາເຫຼືອບໍ່ເຖິງ 1% ໃນປັດຈຸບັນ ແລະ ມີໄລຍະ 7 ປີທີຄວາມຕ້ອງການພາຍໃນປະເທດມີອັດຕາສ່ວນໃນການອຸ້ມຊູການພັດທະນາເສດຖະກິດຫຼາຍເຖິງ 100%.

ໃນໄລຍະຕໍ່ໜ້າ ຈະມີລັກສະນະເດັ່ນຂຶ້ນ ທີ່ຕະຫຼາດພາຍໃນປະເທດເປັນປັດໄຈຫຼັກໃນການໝຸນວຽນຂອງເສດຖະກິດແຫ່ງຊາດ, ຄວາມຕ້ອງການພາຍໃນດ້ານການເຕີບໃຫຍ່ທາງເສດຖະກິດ ຈະປາກົດອອກມາໃຫ້ເຫັນຢ່າງຕໍ່ເນື່ອງ ພວກເຮົາຕ້ອງຍຶດແນວທາງໃນທາງຍຸດທະສາດການປະຕິຮູບໂຄງສ້າງຝັ່ງອຸປະທານ, ຂະຫຍາຍຄວາມຕ້ອງການພາຍໃນ, ທຳການຜະລິດ, ການກະຈາຍລາຍໄດ້, ການໝຸນວຽນ ແລະ ການບໍລິໂພກເພິງພາຕະຫຼາດພາຍໃນປະເທດຫຼາຍຂຶ້ນ ໃຫ້ລະບົບອຸປະທານສອດຄ່ອງກັບຄວາມຕ້ອງການພາຍໃນປະເທດຫຼາຍຂຶ້ນ ສ້າງຄວາມສົມດຸນລະດັບສູງລະຫວ່າງຄວາມຕ້ອງການ ແລະ ອຸປະທານທີ່ສົ່ງເສີມເຊິ່ງກັນ ແລະ ກັນ.

ແນ່ນອນວ່າ ສະຖານະການໃໝ່ແຫ່ງການພັດທະນາບໍ່ແມ່ນການໝຸນວຽກພາຍໃນປະເທດແບບປິດ ແຕ່ເປັນການໝຸນວຽກທັງພາຍໃນປະເທດ ແລະ ຕ່າງປະເທດ ຈີນມີຖານະທີ່ສູງຂຶ້ນໃນເສດຖະກິດໂລກຢ່າງຕໍ່ເນື່ອງ ແລະ ມີຄວາມກ່ຽວພັນໃກ້ຊິດຫຼາຍຂຶ້ນກັບເສດຖະກິດໂລກ ພ້ອມຈະເປີດຕະຫຼາດໃຫ້ແກ່ຕ່າງປະເທດຫຼາຍຂຶ້ນ ຈະກາຍເປັນແຫຼ່ງສຳຄັນໃນການດຶງດູດສິນຄ້າ ແລະ ປັດໄຈການຜະລິດສຳຄັນຈາກຕ່າງປະເທດ.

ປະການທີ 3 ໃຊ້ຫົວຄິດປະດິດສ້າງທາງວິທະຍາສາດ ແລະ ເຕັກໂນໂລຊີເພື່ອກະຕຸ້ນໃຫ້ເກີດແຮງຊຸກດັນການພັດທະນາໃໝ່, ການບັນລຸການພັດທະນາທີ່ໄດ້ຄຸນນະພາບ ຄວນຕ້ອງເຕີບໃຫຍ່ພາຍໃຕ້ການຊຸກດັນດ້ວຍແນວຄິດທີ່ສ້າງສັນ ຍິ່ງໄປກວ່ານັ້ນພວກເຮົາຄວນສຸມກຳລັງຍົກລະດັບຄວາມສາມາດດ້ານຫົວຄິດປະສິດສ້າງດ້ວຍຕົນເອງໃຫ້ສູງຂຶ້ນ ເລັ່ງຄົ້ນຫາຊ່ອງທາງບຸກເບີກເຕັກໂນໂລຊີທີ່ເປັນໝາກຫົວໃຈສຳຄັນໃຫ້ໄວທີ່ສຸດ ນີ້ເປັນເລື່ອງສຳຄັນທີ່ຕິດພັນກັບການພັດທະນາລວມຂອງປະເທດ ທັງເປັນກຸນແຈສຳຄັນໃນການຊຸກດັນການໝຸນວຽນໃຫຍ່ພາຍໃນປະເທດເປັນຫຼັກ.

ພວກເຮົາຄວນສະແດງຄວາມເໜືອກວ່າໃນລັກສະນະເດັ່ນຂອງລະບົບສັງຄົມນິຍົມຂອງປະເທດ ທີ່ສາມາດລະດົມກຳລັງເພື່ອປະຕິບັດພາລະກິດໃຫຍ່ ເດີນໜ້າເຕັມກຳລັງເພື່ອສ້າງເຕັກໂລໂຍຊີທີ່ເປັນຫົວໃຈສຳຄັນ ຄວນເພິ່ງພາຕະຫຼາດທີ່ມີຂະໜາດໃຫຍ່ ແລະ ລະບົບອຸດສາຫະກຳທີ່ຄົບຖ້ວນຂອງປະເທດ ສ້າງຄວາມໄດ້ປຽບພິເສດທີ່ເປັນປະໂຫຍດຕໍ່ການປະຍຸກໃຊ້ເຕັກໂນໂລຊີໃໝ່ຢ່າງໄວວາ, ຂະໜາດໃຫຍ່ ແລະ ການຍົກລະດັບໃຫ້ສູງຂຶ້ນຕໍ່ເນື່ອງແບບຮຸ້ນຕໍ່ຮຸ້ນ.

ເລັ່ງປ່ຽນຜົນງານວິທະຍາສາດເຕັກໂນໂລຊີໃຫ້ເປັນກຳລັງການຜະລິດທີ່ໃຊ້ໄດ້ຈິງ ຍົກລະດັບຕ່ອງໂຊ້ທຸລະກິດໃຫ້ສູງຂຶ້ນ ຮັກສາຄວາມໝັ້ນຄົງຂອງຕ່ອງໂຊ້ທຸລະກິດ ໃຫ້ພາກວິສາຫະກິດສະແດງບົດບາດເປັນຜູ້ທີ່ມີສ່ວນກ່ຽວຂ້ອງສຳຄັນໃນການສ້າງເຕັກໂລໂຊຊີ ໃຫ້ພາກວິສາຫະກິດເປັນກອງທັບທີ່ມີຊີວິດຊີວາໃນການຮວບຮວມປັດໄຈແຫ່ງຫົວຄິດປະດິດສ້າງ ແລະ ການປັບໃຊ້ຜົນງານວິທະຍາສາດເຕັກໂນໂລຊີ ສ້າງລະບົບຫົວຄິດປະດິດສ້າງທີ່ຫຼອມລວມເອົາວິທະຍາສາດເຕັກໂນໂລຊີ, ການສຶກສາ, ທຸລະກິດ ແລະ ການເງິນຢ່າງແໜ້ນແຟ້ນ.

ການວິໄຈຂັ້ນພື້ນຖານປຽບດັ່ງແຫຼ່ງນ້ຳມັນຂອງຫົວຄິດປະດິດສ້າງ ພວກເຮົາຄວນເພີ່ມງົບປະມານໃຫ້ຫຼາຍກວ່າເກົ່າ ສົ່ງເສີມການຍຶດໝັ້ນອັນຍາວນານ ແລະ ການຄົ້ນຫາດ້ວຍຄວາມກ້າຫານ ສ້າງຮາກຖານໃຫ້ເຂັ້ມແຂງເພື່ອສ້າງປະເທດໃຫ້ເຂັ້ມແຂງທາງວິທະຍາສາດ ແລະ ເຕັກໂນໂລຊີ, ຄວນສຸມກຳລັງເຝິກອົບຮົມ ແລະ ນຳເຂົ້າບຸກຄະລາກອນ ແລະ ທີມງານວິໄຈທາງວິທະຍາສາດຊັ້ນໜຶ່ງຂອງໂລກ ດຳເນີນການປະຕິຮູບໜ່ວຍງານການວິໄຈທາງວິທະຍາສາດໃຫ້ຫຼາຍຂຶ້ນ.

ລະດົມຄວາມກະຕືລືລົ້ນຂອງຜູ້ວິໄຈທາງວິທະຍາສາດໃນຂອບເຂດທົ່ວປະເທດໃຫ້ຫຼາຍທີ່ສຸດ ຍົກລະດັບປະສິດທິພາບການຜະລິດທາງວິທະຍາສາດເຕັກໂນໂລຊີໃຫ້ສູງຂຶ້ນ ແລະ ຄວນຍຶດໝັ້ນກັບຫົວຄິດປະດິດສ້າງແບບເປີດເສລີ ດຳເນີນການແລກປ່ຽນຮ່ວມມືທາງວິທະຍາສາດເຕັກໂນໂລຊີລະຫວ່າງປະເທດໃຫ້ຫຼາຍຂຶ້ນ.

ປະການທີ 4 ໃຊ້ການລົງເລິກການປະຕິຮູບ ເພື່ອກະຕຸ້ນພະລັງຊີວິດທາງການພັດທະນາໃໝ່ ການປະຕິຮູບກຸນແກສຳຄັນໃນການປົດປ່ອຍ ແລະ ການພັດທະນາກຳລັງການຜະລິດຂອງສັງຄົມ ເປັນແຮງຊຸກດັນຫຼັກໃນການນຳພາພັດທະນາປະເທດ ປະເທດເຮົາດຳເນີນການປະຕິຮູບມາເປັນເວລາກວ່າ 40 ປີແລ້ວ ໄດ້ຮັບຜົນສຳເລັດອັນໃຫຍ່ຫຼວງເປັນທີ່ຍອມຮັບຂອງທົ່ວໂລກ ສັງຄົມຈະພັດທະນາຢ່າງຕໍ່ເນື່ອງ ລະບົບກົນໄກໃນການປັບຄວາມສຳພັນທາງສັງຄົມ ແລະ ກິດຈະກຳທາງສັງຄົມກໍ່ຈະປັບໃຫ້ສົມບູນຂຶ້ນຢ່າງຕໍ່ເນື່ອງໄປນຳ ຈຶ່ງຈະສາມາດສອດຄ່ອງກັບຄວາມຕ້ອງການໃນການປົດປ່ອຍ ແລະ ການພັດດທະນາກຳລັງການຜະລິດຂອງສັງຄົມຢ່າງຕໍ່ເນື່ອງໄດ້.

ເມື່ອປະເທດເຮົາກ້າວສູ່ໄລຍະການພັດທະນາໃໝ່ ການປະຕິຮູບກໍ່ປະເຊີນກັບພາລະກິດໃໝ່ເຊັ່ນກັນ ຄວນໃຊ້ຄວາມກ້າຫານໃຫ້ຫຼາຍກວ່າເກົ່າ ມາດຕະການທີ່ເພີ່ມຂຶ້ນ ມາທຳລາຍອຸປະສັກຕ່າງໆທີ່ເກີດຈາກລະບົບກົນໄກໃນລະດັບເລິກ ຍຶດໝັ້ນ ແລະ ປັບປຸງລະບົບສັງຄົມນິຍົມທີ່ມີເອກກະລັກຂອງຈີນໃຫ້ສົມບູນຂຶ້ນ ເດີນໜ້າສ້າງຄວາມທັນສະໄໝລະບົບການບໍລິຫານປະເທດ ແລະ ຄວາມສາມາດດ້ານການບໍລິຫານ.

ພວກເຮົາຄວນສ້າງສັນດ້ວຍຄວາມຖືກຕ້ອງເປັນທຳ ສ້າງສັນດ້ວຍການບຸກເບີກ ຫາທາງພັດທະນາຕົນເອງໃນອະນາຄົດຢ່າງກ້າຫານ ຄວນຍຶດໝັ້ນ ແລະ ປັບປຸງລະບົບເສດຖະກິດພື້ນຖານຂອງສັງຄົມນິຍົມໃຫ້ສົມບູນຂຶ້ນ ໃຫ້ພາກການຕະຫຼາດສະແດງບົດບາດຊີ້ຂາດໃນການຈັດສັນຊັບພະຍາກອນ, ສະແດງບົດບາດຂອງພາກລັດໃຫ້ດີຍິງຂຶ້ນ, ສ້າງລະບົບ ແລະ ບັນຍາກາດທີ່ໝັ້ນຄົງຍືນຍົງ ແລະ ຄາດການໄດ້, ຄວນຄຸ້ມຄອງກຳມະສິດໃນຊັບສິນ ແລະ ສິດທິຊັບສິນທາງປັນຍາໃຫ້ຫຼາຍຂຶ້ນ, ສ້າງລະບົບການຕະຫຼາດທີ່ໄດ້ມາດຕະຖານ, ປັບລະບົບການແຂ່ງຂັນດ້ວຍຄວາມເປັນທຳຫຼາຍຂຶ້ນ, ກະຕຸ້ນສ່ວນສຳຄັນຂອງພາກການຕະຫຼາດໃຫ້ມີພະລັງການພັດທະນາຂຶ້ນຕື່ມ ໃຫ້ທຸກພາກສ່ວນສ້າງປະໂຫຍດຕໍ່ການພັດທະນາກຳລັງການຜະລິດຂອງສັງຄົມໝຸນວຽນຢ່າງຄ່ອງຕົວເຕັມຮ້ອຍ.

ປະການທີ 5 ໃຊ້ການເປີດເສລີຕໍ່ຕ່າງປະເທດໃນລະດັບສູງ ເພື່ອສ້າງຄວາມເໜືອກວ່າໃໝ່ດ້ານການຮ່ວມມື ແລະ ການແຂ່ງຂັນລະຫວ່າງປະເທດ ປັດຈຸບັນປະຊາຄົມໂລກມີຄວາມເປັນຫ່ວງບໍ່ໜ້ອຍຕໍ່ອະນາຄົດກະແສໂລກແຫ່ງການເຊື່ອມຈອດທາງເສດຖະກິດ ພວກເຮົາເຫັນວ່າ ການເຊື່ອມຈອດ ແລະ ການໄປມາຫາສູ່ທາງເສດຖະກິດລະຫວ່າງປະເທດ ຍັງເປັນຄວາມຕ້ອງການຕາມຫຼັກຄວາມເປັນຈິງໃນການພັດທະນາເສດຖະກິດໂລກ.

ແຮງຊຸກດັນສຳຄັນທຳອິດໃນການພັດທະນາເສດຖະກິດຢ່າງໄວວາຕໍ່ເນື່ອງຂອງປະເທດເຮົາ ກໍ່ຄືການເປີດເສລີກັບຕ່າງປະເທດ ເຊິ່ງເປັນນະໂຍບາຍຂັ້ນພື້ນຖານຂອງປະເທດ ເຮົາຄວນຍົກລະດັບການເປີດເສລີຕໍ່ຕ່າງປະເທດໃຫ້ສູງຂຶ້ນຮອບດ້ານ ສ້າງລະບົບເສດຖະກິດໃໝ່ແບບເປີດເສລີໃນລະດັບສູງ, ສ້າງຄວາມເໜືອກວ່າໃໝ່ດ້ານການຮ່ວມມື ແລະ ການແຂ່ງຂັນລະຫວ່າງປະເທດ, ຄວນມີສ່ວນຮ່ວມໃນການປະຕິຮູບລະບົບບໍລິຫານເສດຖະກິດໂລກຢ່າງຈິງຈັງ ເດີນໜ້າເສີມສ້າງລະບົບບໍລິຫານເສດຖະກິດສາກົນໃຫ້ເຂັ້ມແຂງທ່ຽງທຳ ແລະ ສົມເຫດສົມຜົນຫຼາຍຂຶ້ນ.

ປັດຈຸບັນໃສ່ໃຈ 2 ປະເດັນລະຫວ່າງການເດີນໜ້າເປີດເສລີກັບຕ່າງປະເທດຄື: 1) ທຸກປະເທດ, ພູມມິພາກ ແລະ ວິສາຫະກິດທີ່ຕ້ອງການການຮ່ວມມືກັບເຮົາ ເຊິ່ງລວມເຖິງລະດັບລັດ, ທາງການທ້ອງຖິ່ນ ແລະ ວິສາຫະກິດຂອງ ສ.ອາເມຣິກາ ເຮົາລ້ວນຄວນດຳເນີນການຮ່ວມມືກັນຢ່າງຈິງຈັງ ສ້າງຮູບແບບການຮ່ວມມື ແລະ ການເປີດເສລີທຸກລະດັບຫຼາຍຊັ້ນ ແລະ ຫຼາຍຢ່າງ ແລະ 2) ຍິ່ງເປີດເສລີກໍ່ຍິງຄວນໃຫ້ຄວາມສຳຄັນກັບຄວາມໝັ້ນຄົງ ຄວນດຳເນີນການພັດທະນາ ໄປຄ່ຽງຄູ່ກັບຄວາມໝັ້ນຄົງໃຫ້ສົມດຸນກັນ ເນັ້ນເສີມສ້າງຂີດຄວາມສາມາດຂອງຕົນ ຕັ້ງແຕ່ການແຂ່ງຂັນ, ການບໍລິຫານຈັດການການເປີດເສລີ ໄປຈົນເຖິງການປ້ອງກັນ ແລະ ຄຸ້ມຄອງຄວາມສ່ຽງ ເຝິກຝົນຮ່າງກາຍໃຫ້ເຂັ້ມແຂງ.

ປະການທີ່ 6 ໃຊ້ການຮ່ວມສ້າງຮ່ວມບໍລິຫານ ແລະ ຮ່ວມກັນເຂົ້າເຖິງກັນ ເພື່ອຕໍ່ຍອດໄລຍະໃໝ່ຂອງການພັດທະນາສັງຄົມ ຄວາມຈິງໄດ້ພິສູດໃຫ້ເຫັນວ່າ ບັນຫາທີ່ເກີດຂຶ້ນຫຼັງການພັດທະນາກໍ່ບໍ່ໜ້ອຍໄປກວ່າໄລຍະທີ່ບໍ່ພັດທະນາ ໂຄງສ້າງສັງຄົມຂອງພວກເຮົາກຳລັງເກີດການປ່ຽນແປງ ອິນເຕີເນັດປ່ຽນວິຖີການໄປມາຫາສູ່ກັນຂອງມະນຸດຢ່າງເລິກເຊິງ, ແນວຄິດ ແລະ ຈິດສຳນຶກ ລວມທັງພຶຶດຕິກຳທາງສັງຄົມໄດ້ເກີດການປ່ຽນແປງໄປນຳ.

ສຳລັບ ແຜນພັດທະນາເສດຖະກິດສົງຄົມ 5 ປີ ສະບັບທີ 14 ນັ້ນຈະໃຫ້ຄວາມສຳຄັນວ່າ ເຮັດແບບໃດຈຶ່ງຈະປັບຕົວໃຫ້ເຂົ້າກັບການປ່ຽນແປງຄັ້ງໃຫຍ່ໄດ້ ທັງໃນດ້ານໂຄງສ້າງສັງຄົມ, ຄວາມສຳພັນ ແລະ ພຶດຕິກຳທາງສັງຄົມ, ຈິດສຳນຶກ ລວມທັງການປ່ຽນແປງຕ່າງໆ ຕ້ອງສ້າງຕຳແໜ່ງງານໃຫ້ຫຼາຍຂຶ້ນ ແລະ ໄດ້ຄຸນນະພາບຫຼາຍຂຶ້ນ, ປັບປຸງບົບປະກັນສັງຄົມທີ່ຄວບຄຸມທົ່ວເຖິງຢ່າງຍືນຍົງ, ເສີມສ້າງລະບົບສາທາລະນະສຸກ ແລະ ການຄວບຄຸມໂລກແຜ່ລະບາດ ໃຫ້ປະຊາຊົນພັດທະນາຢ່າງສົມດຸນໃນໄລຍະຍາວ, ເພີ່ມການບໍລິການສັງຄົມໃຫ້ຫຼາຍຂຶ້ນ ທຳລາຍຄວາມຂັດແຍ່ງ ແລະ ຮັກສາສະຖຽນລະພາບທາງສັງຄົມ ເຊິ່ງລ້ວນຕ້ອງສຶກສາ ແລະ ວາງແຜນຢ່າງຈິງຈັງ.

ສັງຄົມທີ່ມີຄວາມທັນສະໄໝ ຄວນອຸດົມໄປດ້ວຍພະລັງຊີວິດ ທັງມີລະບຽບທີ່ດີ ປະກົດການພະລັງຊີວິດ ແລະ ລະບຽບທີ່ເປັນເອກະພາບ ທີ່ບໍ່ສາມາດແຍກອອກຈາກກັນໄດ້ ຄວນປັບປຸງລະບົບການບໍລິການສັງຄົມທີ່ຮ່ວມສ້າງຮ່ວມບໍລິຫານ ແລະ ຮ່ວມກັນເຂົ້າເຖິງໃຫ້ສົມບູນຂຶ້, ໃຫ້ການບໍລິຫານໂດຍລັດ ກັບການປັບໂດຍສັງຄົມ ແລະ ການປົກຄອງຕົນເອງໂດຍພົນລະເມືອງ ມີການຕອບສະໜອງໂດຍກົງຕໍ່ກັນ ສ້າປະຊາຄົມບໍລິການສັງຄົມທີ່ທຸກຄົນມີຄວາມຮັບຜິດຊອບ ແລະ ທຸກຄົນເຂົ້າເຖິງປະໂຫຍດຮ່ວມກັນຖ້ວນໜ້າ, ຄວນເພີ່ມ ແລະ ເສີມສ້າງການບໍລິຫານສັງຄົມລະດັບຂັ້ນພື້ນຖານ ໃຫ້ຈຸລັງສັງຄົມທຸກຈຸລັງເປັນຈຸລັງທີ່ດີ ແລະ ມີຄວາມຄຶກຄື້ນ, ຄວາມຂັດແຍ່ງຄວນຖືກທຳລາຍຕັ້ງໃນລະດັບພື້ນຖານຂອງສັງຄົມ, ຄວາມສາມັກຄີ ແລະ ຄວາມໝັ້ນຄົງຄວນສ້າງໃຫ້ລະດັບພື້ນຖານຂອງສັງຄົມ,​ ຄວນມຸ່ງໝັ້ນຮັກສາຄວາມເປັນທຳ ຄວາມທ່ຽງທຳໃນສັງຄົມໃຫ້ຫຼາຍຂຶ້ນກວ່າເກົ່າ ສົ່ງເສີມການພັດທະນາຮອບດ້ານຂອງມະນຸດ ແລະ ຄວາມກ້າວໜ້າຮອບດ້ານຂອງສັງຄົມ.

ທີ່ກ່າວມາຂ້າງຕົ້ນນີ້ ຂ້າພະເຈົ້າໄດ້ໂອ້ລົມເລື່ອງສຳຄັນໆໄປຫຼາຍເລື່ອງ ລວມເຖິງເລື່ອງອື່ນໆ ທີ່ກ່ຽວຂ້ອງກັບການພັດທະນາເສດຖະກິດສັງຄົມໃນໄລຍະກາງ ແລະ ໄລຍະຍາວ ຫວັງວ່າທຸກທ່ານຈະໄດ້ທົບທວນຢ່າງເລິກເຊິ່ງ ສ້າງຜົນງານວິໄຈທີ່ກ້າວໜ້າອີກລະດັບ.

ໃນວັນທີ 23 ພະຈິກ 2015 ຂະນະເປັນປະທານກອງປະຊຸມກຳມະການກົມການເມືອງສູນກາງພັກຄອມມູນິດຈີນ ຊຸດທີ 18 ເພື່ອຮັບຟັງການບັນຍາຍພິເສດ ແລະ ແລກປ່ຽນຄວາມຄິດເຫັນຄັ້ງທີ 28 ນັ້ນ ຂ້າພະເຈົ້າໄດ້ກ່າວຄຳປາໄສກ່ຽວກັບການສຶກສາຄົ້ນຄວ້າທິດສະດີເສດຖະສາດການເມືອງລັດທິມາກໂດຍສະເພາະ ແລະ ເມື່ອໄວໆນີ້ ວາລະສານ “ແສງແຫ່ງທຳ” ໄດ້ຕີພິມເຜີຍແຜ່ຄຳປາໄສຂອງຂ້າພະເຈົ້າ.

ທ່ານ ຟຣີດຣິສ ເອງເກວ (Friedrich Engels) ເຄີຍກ່າວວ່າ ທິດສະດີທັງໝົດຂອງພັກການເມືອງຊົນຊັ້ນກຳມະຊີບນັ້ນ ມາຈາກການສຶກສາຄົ້ນຄວ້າເສດຖະສາດການເມືອງ, ສ່ວນທ່ານ ວະລາດິເມຍ ເລນິນ ຖືເອົາເສດຖະກິດການເມືອງເປັນການປະຍຸກໃຊ້ ແລະ ການພິສູດທີ່ລະອຽດ ຄົບຖ້ວນ ແລະ ເລິກເຊິ່ງທີ່ສຸດຂອງທິດສະດີລັດທິມາກ ພວກເຮົາຕ້ອງໃຊ້ວິທີຂອງເສດຖະສາດການເມືອງລັດທິມາກ ສ້າງຄວາມເຂົ້າໃຈກົດແຫ່ງການພັດທະນາທາງເສດຖະກິດຂອງປະເທດເຮົາໃຫ້ເລິກເຊິ່ງຍິ່ງຂຶ້ນ ຍົກລະດັບຄວາມສາມາດດ້ານການນຳພາພັດທະນາເສດຖະກິດຂອງປະເທດເຮົາ.

ທິດສະດີຈາກພາກປະຕິບັດ ແລະ ຖືກໃຊ້ມາຊີ້ນຳການປະຕິບັດ ນັບຕັ້ງແຕ່ດຳເນີນການປະຕິຮູບ ແລະ ເປີດປະເທດເປັນຕົ້ນມາ ພວກເຮົາໄດ້ປະມວນຜົນການປະຕິບັດໃໝ່ຢ່າງຄຶກຄື້ນທັນການ ຊຸກດັນການຄິດຄົ້ນທິດສະຢ່າງຕໍ່ເນື່ອງ ໄດ້ສະເໜີຄວາມເຫັນສຳຄັນເປັນຈຳນວນຫຼາຍຕໍ່ບັນຫາສຳຄັນໆເຊັ່ນ: ແນວຄິດການພັດທະນາ, ລະບົບກຳມະສິດ, ລະບົບການແບ່ງປັນ, ພາລະບົດບາດພາກລັດ, ການຄຸ້ມຄອງມະຫາພາກ, ໂຄງສ້າງອຸດສາຫະກຳ, ໂຄງສ້າງການບໍລິການຈັດການວິສາຫະກິດ, ລະບົບຫຼັກປະກັນຊີວິດປະຊາຊົນ ແລະ ການບໍລິການຈັດການທາງສັງຄົມເປັນຕົ້ນ.

ຍົກຕົວຢ່າງເຊັ່ນ: ທິດສະດີກ່ຽວກັບແກ່ນແທ້ຂອງສັງຄົມນິຍົມ, ທິດສະດີກ່ຽວກັບລະບົບເສດຖະກິດພື້ນຖານຂອງສັງຄົມນິຍົມເບື້ອງຕົ້ນ, ທິດສະດີກ່ຽວກັບນະວັດຕະກຳ, ການສານກົມກ່ຽວ ສີຂຽວ ເປີດກວ້າງ ແລະ ແບ່ງປັນ, ທິດສະດີກ່ຽວກັບການພັດທະນາເສດຖະກິດແບບຕະຫຼາດສັງຄົມນິຍົມ ໃຫ້ຕະຫຼາດມີບົດບາດຊີ້ຂາດການຈັດສັນຊັບພະຍາກອນ ແລະ ຂະຫຍາຍບົດບາດຂອງພາກລັດໃຫ້ດີຍິ່ງຂຶ້ນ, ທິດສະດີກ່ຽວກັບເສດຖະກິດຈີນເຂົ້າສູ່ພາວະປົກກະຕິໃໝ່ ຍົກລະດັບການປະຕິຮູບໂຄງສ້າງຕ່ອງໂຊ້ອຸປະທານ ຊຸກດັນໃຫ້ເສດຖະກິດໄດ້ຮັບການພັດທະນາຢ່າງມີຄຸນນະພາບສູງ.

ທິດສະດີກ່ຽວກັບການຊຸກດັນການພັດທະນາພ້ອມກັນທາງດ້ານອຸດສາຫະກຳແບບໃໝ່ ເຕັກໂນໂລຊີຂໍ້ມູນຂ່າວສານ ການພັດທະນາເມືອງໃໝ່ ແລະ ການຜະລິດກະສິກຳທີ່ທັນສະໄໝ ໃຫ້ພາກຕ່າງໆພັດທະນາຢ່າງປະສານກົມກ່ຽວ, ທິດສະດີກ່ຽວກັບທີ່ດິນມອບເໝົາຂອງຊາວນາໃນລັກສະນະທຳມະສິດ ສິດທິການຖືຄອງ ແລະ ສິດທິການນຳໃຊ້, ທິດສະດີກ່ຽວກັບການໃຊ້ປະໂຫຍດຈາກຕະຫຼາດ ແລະ ຊັບພະຍາກອນທັງພາຍໃນປະເທດ ແລະ ຕ່າງປະເທດໃຫ້ດີ.

ທິດສະດີກ່ຽວກັບການເລັ່ງໃຫ້ເກີດໂຄງສ້າງການພັດທະນາໃໝ່ ທີ່ຖືການໝຸນວຽນໃຫຍ່ພາຍໃນປະເທດເປັນຫຼັກ ການໝຸນວຽນພາຍໃນປະເທດ ແລະ ຕ່າງປະເທດມີການເກືອກູນເຊິ່ງກັນ ແລະ ກັນ, ທິດສະດີກ່ຽວກັບການສົ່ງເສີມຄວາມຖືກຕ້ອງເປັນທຳທາງສັງຄົມ ບັນລຸຄວາມຮັ່ງມີຮ່ວມກັນຂອງປະຊາຊົນທັງມວນຢ່າງເປັນຂັ້ນເປັນຕອນ, ທິດສະດີຄວາມໝັ້ນຄົງດ້ານການພັດທະນາ ເປັນຕົ້ນ.

ຜົນງານທິດສະດີດັ່ງກ່າວນີ້ ບໍ່ພຽງແຕ່ໄດ້ຊີ້ນຳປະຕິບັດການພັດທະນາເສດຖະກິດຂອງປະເທດເຮົາຢ່າງເຂັ້ມແຂງເທົ່ານັ້ນ ຍັງໄດ້ຍົກລະດັບທິດສະດີເສດຖະສາດການເມືອງລັດທິມາກອີກດ້ວຍ.

ປະເດັນຮ່ວມສະໄໝເປັນພະລັງຊຸກດັນການຄິດຄົ້ນທິດສະດີທ່ານ ກາກ ມາກ, ທ່ານ ຟຣີດຣິສ ເອງເກວ ແລະ ທ່ານ ວະເລມີເມຍ ເລນິນ ຕ່າງກໍ່ຊຸກດັນການຄິດຄົ້ນທິດສະດີໃໝ່ດ້ວຍການຄົ້ນຄິດ ແລະ ຕອບຄຳຖາມກ່ຽວກັບປະເດັນຮ່ວມສະໄໝທັງນັ້ນ.

ປັດຈຸບັນ ທ່າມກາງທະເລໃຫຍ່ແຫ່ງເສດຖະກິດໂລກທີ່ກຳລັງມີຄື້ນໃຫຍ່ຜັນຜວນ ການທີ່ຈະຄວບຄຸມເສດຖະກິດປະເທດເຮົາ ເຊິ່ງປຽບດັ່ງເຮືອໃຫຍ່ໃນທະເລໄດ້ຫຼືບໍ່ນັັ້ນ ຖືເປັນການທົດສອບສຳຄັນຕໍ່ພວກເຮົາ ຕໍ່ໜ້າສະຖານການເສດຖະກິດທັງໃນ ແລະ ຕ່າງປະເທດທີ່ມີຄວາມສະໜັບຊັບຊ້ອນ ຕໍ່ໜ້າປະກົດການທາງເສດຖະກິດອັນຫຼາກຫຼາຍ, ການຮຽນຮູ້ເຂົ້າໃຈວິທີ ແລະ ຫຼັການພື້ນຖານຂອງທິດສະດີເສດຖະສາດການເມືອງລັດທິມາກນັ້ນ ຈະມີສ່ວນຊ່ວຍໃຫ້ພວກເຮົາສາມາດມີວິທີວິເຄາະເສດຖະກິດທີ່ຖືກຫຼັກວິທະຍາສາດ ເຂົ້າໃຈຂະບວນການເຄື່ອນໄຫວທາງເສດຖະກິດ, ປະຕິບັດຕາມຫຼັກແຫ່ງການພັດທະນາເສດຖະກິດ ຍົກລະດັບຂີດຄວາມສາມາດໃນການພັດທະນາເສດຖະກິດແບບຕະຫຼາດສັງຄົມນິຍົມ ຕອບຄຳຖາມດ້ານທິດສະດີ ແລະ ພາກປະຕິບັດກ່ຽວກັບການພັດທະນາເສດຖະກິດຂອງປະເທດເຮົາໄດ້ຢ່າງຖືກຕ້ອງ.

ການລົງມືປະຕິບັດໃນຍຸກໃໝ່ດ້ານການປະຕິຮູບ, ເປີດປະເທດ ແລະ ການສ້າງສັງຄົມນິຍົມທີ່ທັນສະໄໝນັ້ນ ເປັນຊັບພະຍາກອນອັນອຸດົມສົມບູນໃນການສຶກສາຄິດຄົ້ນນະໂຍບາຍ ແລະ ທິດສະດີ, ນັກທິດສະດີດ້ານເສດຖະກິດ ແລະ ສັງຄົມຂອງປະເທດເຮົາມີໂອກາດສ້າງຜົນຫຼາຍເປັນຈຳນວນຫຼາຍ ໃນທີ່ນີ້ ຂ້າພະເຈົ້າຂໍ້ສະເໜີຄວາມຫວັງບາງປະການຕໍ່ທຸກທ່ານດັ່ງຕໍ່ໄປນີ້:

1) ຍຶດໝັ້ນເຂື່ອນໄຂຂອງປະເທດເຮົາເປັນທີ່ຕັ້ງ ຈາກພາກປະຕິບັດຂອງຈີນ ໄປສູ່ພາກປະຕິບັດຂອງຈີນ ຂຽນວິທະຍານິພົນຜືນແຜ່ນເກີດ ເຮັດໃຫ້ທິດສະດີ ແລະ ນະໂຍບາຍສອດຄ່ອງກັບສະພາບຄວາມເປັນຈິງຂອງຈີນ, ມີເອກະລັກຂອງຈີນ, ພັດທະນາເສດຖະສາດການເມືອງ ແລະ ສັງຄົມສາດແຫ່ງສັງຄົມນິຍົມທີ່ມີເອກະລັກຂອງຈີນຢ່າງຕໍ່ເນື່ອງ.

2) ທຳການສຳຫຼວດ ແລະ ສຶກສາຄົ້ນຄວ້າຢ່າງເລິກເຊິ່ງ, ກວດສອບສະພາບທີ່ແທ້ຈິງ, ໃຊ້ວິທີການທີ່ເປັນຮູບປະທຳ, ສະທ້ອນສະພາບຄວາມເປັນຈິງຢ່າງເຕັມທີ່ ເຮັດໃຫ້ການຄິດຄົ້ນນະໂຍບາຍ ແລະ ທິດສະດີມີທີ່ມາທີ່ໄປ ແລະ ສົມເຫດສົມຜົນ.

3) ຍຶດຫຼັກແຫ່ງການພັດທະນາ, ຍຶດໝັ້ນຈຸດຢືນ ທັດສະນະ ແລະ ວິທີການລັດທິມາກ ຄົ້ນພົບແກ່ນແທ້ຈາກປາກົດການ, ຄົ້ນຫາທ່າອ່ຽງໄລຍະຍາວຈາກການຜັນຜວນໃນໄລຍະສັ້ນ ເຮັດໃຫ້ການຄິດຄົ້ນນະໂຍບາຍ ແລະ ທິດສະດີສະທ້ອນຄວາມທັນສະໄໝ ແລະ ຖືກຫຼັກວິທະຍາສາດຢ່າງເຕັມທີ່.

4) ມີວິໄສທັດລະດັບສາກົນ, ສຶກສາຄົ້ນຄວ້າບັນຫາທີ່ມະນຸດຊາດປະເຊີນຮ່ວມກັນ ຈາກການຕິດຕໍ່ໄປມາຫາສູ່ກັນລະຫວ່າງຈີນກັບໂລກ ອຸທິດສະຕິປັນຍາ ແລະ ສູດຈີນເພື່ອສ້າງປະຊາຄົມໂລກທີ່ມີອະນາຄົດຮ່ວມກັນ.

HTML tutorial