ສ.ອາເມຣິກາ ບໍ່ພໍໃຈທີ່ຍົນຮົບລັດເຊຍ 2 ລຳ ບິນຂຶ້ນທຽບ ແລະ ຕັດໜ້າ B-52 ເໜືອທະເລດຳ

ລາຍງານ 30 ສິງຫາ 2020, ກອງທັບອາກາດ ສ.ອາເມຣິກາ ປະຈຳພາກພື້ນເອີຣົບ ແລະ ອາຟຣິກາ ອອກຖະແຫຼງການ ຕໍ່ກັບເຫດການຍົນຮົບ Su-27 ຂອງກອງທັບລັດເຊຍ 2 ລຳ ບິນຂຶ້ນທຽບຂ້າງ ແລະ ບິນຕັດໜ້າຍົນຖິ້ມລະເບີດທາງຍຸດທະສາດ B-52 ຂອງ ສ.ອາເມຣິກາ ທີ່ບິນຢູ່ເໜືອນ່ານຟ້າທະເລດຳ ແລະ ນ່ານນ້ຳສາກົນ ເມື່ອວັນສຸກ 28 ສິງຫາ ທີ່ຜ່ານມາ ຢ່າງບໍ່ປອດໄພ ແລະ ບໍ່ມີຄວາມເປັນມືອາຊີບ ຈົນອາດນຳໄປສູ່ອຸປະຕິເຫດຍົນຕຳກັນກາງອາກາດໄດ້ໂດຍບໍ່ຈຳເປັນ.

ການຖະແຫຼງຂອງທ່ານ ພົນເອກ ເຈບ ແຮຣິກຽນ (Jeff Harrigian) ຜູ້ບັນຊາການກອງທັບອາກາດ ສ.ອາເມຣິກາ ປະຈຳພາກພື້ນເອີຣົບຍັງລະບຸຕື່ມວ່າ ນັກບິນປະຈຳຍົນຮົບທັງສອງລຳຂອງລັດເຊຍ ໄດ້ບິນຕັດໜ້າຍົນຖິ້ມລະເບີດທາງຍຸດທະສາດ B-52 ຂອງ ສ.ອາເມຣິກາ ໃນໄລຍະສຽດສິວ ຫ່າງຈາກບໍລິເວນປາຍຫົວຍົນ B-52 ບໍ່ເຖິງ 30 ແມັດ ເຊິ່ງຍົນຮົບທັງສອງລຳຂອງລັດເຊຍ ກຳລັງປະຕິບັດພາລະກິດໃນນ່ານຟ້າສາກົນ ແລະ ໄດ້ກໍ່ໃຫ້ເກີດຄວາມສ່ຽງດ້ານຄວາມປອດໄພກັບຍົນລຳອື່ນ ເຊິ່ງ ສ.ອາເມຣິກາ ຫວັງວ່າລັດເຊຍຈະປະຕິບັດຕາມມາດຕະຖານຄວາມປອດໄພສາກົນ.

ເຊິ່ງເຫດການເກີດຂຶ້ນໃນຂະນະທີ່ຍົນຖິ້ມລະເບີດ B-52 ປະຕິບັດພາລະກິດບິນຜ່ານນ່ານຟ້າ ຂອງປະເທດສະມາຊິກອົງການສົນທິສັນຍາອາກລັງຕິກເໜືອ (NATO) 30 ປະເທດເມື່ອວັນສຸກ ທີ່ຜ່ານມາ ເພື່ອສະແດງຄວາມສາມັກຄີເປັນອັນໜຶ່ງອັນດຽວກັນຂອງ NATO, ໃນດ້ານລັດເຊຍ ຍັງບໍ່ມີປະຕິກິລິຍາຕອບໂຕ້ຢ່າງເປັນທາງການ ຕໍ່ກັບເຫດການດັ່ງກ່າວ.

HTML tutorial