ລັດເຊຍປະນາມ ສ.ອາເມຣິກາ ຂຶ້ນບັນຊີດຳສະຖາບັນວິໄຈ 3 ແຫ່ງຂອງລັດເຊຍວ່າຜະລິດອາວຸດເຄມີ

ລາຍງານ 30 ສິງຫາ 2020, ກະຊວງການຕ່າງປະເທດລັດເຊຍປະນາມການຕັດສິນໃຈຂອງ ສ.ອາເມຣິກາ ທີ່ຂຶ້ນບັນຊີດຳສະຖາບັນວິໄຈຂອງລັດເຊຍ 3 ແຫ່ງ ເຊິ່ງໜຶ່ງໃນນັ້ນກຳລັງທຳການວິໄຈວັກແຊັງຕ້ານໂຄວິດ-19 ຈາກທັງໝົດ 60 ແຫ່ງທົ່ວໂລກ ທີ່ກະຊວງການຄ້າ ສ.ອາເມຣິກາ ປະກາດຂຶ້ນບັນຊີດຳເມື່ອວັນທີ 26 ສິງຫາ ທີ່ຜ່ານມາ ດ້ວນຂໍ້ຫາຕ້ອງສົງໄສພັດທະນາອາວຸດເຄມີ.

ທ່ານ ນາງ ມາເຣຍ ຊາຄາໂຣວາ ໂຄສົກກະຊວງການຕ່າງປະເທດລັດເຊຍ ກ່າວວ່າການເຄື່ອນໄຫວຂອງ ສ.ອາເມຣິກາ ໃນຄັ້ງນີ້ບໍ່ຖືວ່າເປັນບາດກ້າວທີ່ຖືກຕ້ອງ ສຳລັບການຮ່ວມມືກັນໃນການຕໍ່ສູ້ກັບໂລກລະບາດ, ສ.ອາເມຣິກາ ບໍ່ມີຫຼັກຖານໃດມາພິສູດຂໍ້ກ່າວຫາ ເພາະລັດເຊຍຍຸຕິການພັດທະນາອາວຸດເຄມີ ແລະ ຊີວະພາບມາຕັ້ງແຕ່ປີ 1992 ແລະ ທຳລາຍສາງອາວຸດທັງໝົດໄປແລ້ວໃນປີ 2007.

ປັດຈຸບັນ, ສ.ອາເມຣິກາ ຍັງເປັນສະມາຊິກພຽງຊາດດຽວຂອງອະນຸສັນຍາເກືອດຫ້າມອາວຸດເຄມີ ທີ່ຍັງຄົງມີອາວຸດເຄມີໄວ້ໃນຄອບຄອງ ແລະ ອອກໃບອະນຸຍາດໃນການຜະລິດສິ່ງປະດິດຕ່າງໆ ທີ່ກ່ຽວຂ້ອງກັບການໃຊ້ສົງຄາມເຄມີເຕັມຮູບແບບ ລວມທັງກຸ່ມສານພິດທີ່ມີຜົນຕໍ່ລະບົບປະສາດອີກດ້ວຍ.

ປະຕິບັດການຂອງລັດເຊຍໃນແວດວົງຊີວະການແພດ ເປັນໄປຕາມແນວທາງສັນຕິ ແລະ ປະຕິບັດຕາມພັນທະພາຍໃຕ້ອະນຸສັນຍາເກືອດຫ້າມອາວຸດຊີວະພາບ ແລະ ສານພິດ (BTWC) ໂດຍອ້າງອີງຫຼັກຖານຈາກຂໍ້ມູນປະຈຳປີ ກ່ຽວກັບສິ່ງປຸກສ້າງ ແລະ ກິດຈະກຳທາງຊີວະພາບຂອງລັດເຊຍ ເຊິ່ງເປັນສ່ວນໜຶ່ງຂອງການສ້າງຄວາມເຊື່ອໝັ້ນໃນອະນຸສັນຍາດັ່ງກ່າວ.

ໃນເວລາດຽວັນ ມີຄຳຖາມຫຼາຍຢ່າງກ່ຽວກັບກິດຈະກຳທາງຊີວະການແພດຂອງ ສ.ອາເມເຣິກາທັງໃນ ແລະ ນອກປະເທດ ຍັງບໍ່ມີສິ່ງໃດມາຢືນຢັນວ່າກິດຈະກຳທີ່ດຳເນີນການໃນຫ້ອງທົດລອງຊີວະພາບຂອງ ສ.ອາເມຣິກາ ເປັນໄປຕາມອະນຸສັນຍາຢ່າງສົມບູນແບບ.

ໂຄສົກກະຊວງການຕ່າງປະເທດລັດເຊຍ ຍັງກ່າວເຖິງຜົນການສືບສວນສອບສວນກໍລະນີຜູ້ກໍ່ການຮ້າຍສົ່ງຊ່ອງຈົດໝາຍບັນຈຸສະປໍເຊື້ອແອນແທຣກ (Anthrax) ໂຈມຕີໄປຍັງ ສ.ອາເມຣິກາ ໃນປີ 2001 ເຊິ່ງເປີດເຜີຍວ່ານັກວິທະຍາສາດທີ່ສົ່ງຊອງເຊື້ອໂລກອອກໄປນັ້ນ ເຮັດວຽກໃນຫ້ອງປະຕິບັດການທາງຊີວະພາບຟອດເດທຣິກ (Fort Detrik) ເຊິ່ງເປັນສະຖາບັນຮັກສາຄວາມປອດໄພທາງຊີວະພາບລະດັບແຖວໜ້າຂອງກອງທັບ ສ.ອາເມຣິກາ.

ທ່ານ ນາງ ມາເຣຍ ຊາຄາໂຣວາ ກ່າວປິດທ້າຍວ່າ ແທນທີ່ຈະມາຂວ້ຳບາດກັນ ພວກເຮົາຂໍແນະນຳໃຫ້ຝ່າຍ ສ.ອາເມຣິກາ ນັ່ງລົງໂຕະເຈລະຈາເພື່ອປຶກສາຫາລືບັນຫາທີ່ຄົງຄ້າງທັງໝົດຮ່ວມກັນ.

HTML tutorial