ສານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ເນື່ອງໃນໂອກາດໄຂສົກຮຽນໃໝ່ 2020-2021

ລາຍງານ 31 ສິງຫາ 2020, ກົມປະຊາສຳພັນ, ຫ້ອງວ່າການສຳນັກງານນາຍົກລັດຖະມົນຕີໄດ້ເຜີຍແຜ່ ສານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ເນື່ອງໃນໂອກາດໄຂສົກຮຽນໃໝ່ 2020-2021 ມີເນື້ອໃນດັງນີ້:

ເນື່ອງໃນໂອກາດໄຂສົກສົກຮຽນໃໝ່ 1 ກັນຍາ ແລະ ວັນເປີດໂທລະພາບການສຶກສາ ຢ່າງເປັນທາງການ, ຂ້າພະເຈົ້ົ້າ ຂໍຕາງໜ້າກົມການເມືອງສູນກາງພັກ ແລະ ລັດຖະບານ ຂໍສົ່ງຄວາມຢ້ຽມຢາມຖາມຂ່າວ, ອັນອົບອຸ່ນ, ຄວາມຮັກແພງອັນຈິງໃຈ ມາຍັງຜູ້ບໍລິຫານການສຶກສາທຸກຂັ້ນ, ຄູອາຈານ ແລະ ນັກຮຽນ-ນັກສຶກສາທຸກຊັ້ນ, ທຸກສາຍ ທຸກລະດັບ ທຸກຂົງເຂດໃນຂອບເຂດທົ່ວປະເທດມານະໂອກາດນີ້.

ດັ່ງທີ່ພວກເຮົາເຂົ້າໃຈກັນເປັນຢ່າງດີ ແລະ ເລິກເຊິ່ງນຳກັນແລ້ວວ່າ ການສຶກສາແມ່ນການສ້າງຊັບພະຍາກອນມະນຸດ, ຊັບພະຍາກອນບຸກຄົນ, ເປັນກໍາລັງແຮງ, ເປັນປັດໄຈສໍາຄັນຍິ່ງ ທີ່ມີລັກສະນະຕັດສິນກວ່າໝູ່ໃນການພັດທະນາປະເທດຊາດຂອງທຸກຍຸກທຸກສະໄໝ.

ຍ້ອນເຫັນຄວາມສຳຄັນຍິ່ງຂອງວຽກງານການສຶກສາ, ພັກເຮົາຍາມໃດກໍ່ໃຫ້ທິດທາງ, ນະໂຍບາຍທີ່ໜັກແໜ້ນຕະຫຼອດມາວ່າ: ການສຶກສາຕ້ອງໄປກ່ອນກ້າວໜຶ່ງ. ຕະຫຼອດໄລຍະທີ່ຜ່ານມາ ລັດຖະບານທຸກຍຸກ ທຸກສະໄໝ ໄດ້ເອົາໃຈໃສ່ວຽກງານການພັດທະນາການສຶກສາ ຢ່າງບໍ່ຢຸດຢັ້ງ ແລະ ໄດ້ມີການພັດທະນາເປັນຮູບປະທຳຕະຫຼອດມາ ແລະ ຈະສືບຕໍ່ໃຫ້ຄວາມເອົາໃຈໃສ່ວຽກງານພັດທະນາການສຶກສາຂອງຊາດເຮົາຕໍ່ໄປ ເພື່ອສ້າງຄົນລາວ ໃຫ້ມີຄວາມຮູ້, ຄວາມສາມາດສູງຂຶ້ນ ແລະ ເພື່ອໃຫ້ກາຍເປັນກໍາລັງແຮງໃນການປົກປັກຮັກສາ ແລະ ສ້າງສາປະເທດຊາດ ໃຫ້ຈະເລີນກ້າວໜ້າສືບຕໍ່ໄປຢ່າງບໍ່ຢຸດຢັ້ງ. ດັ່ງນັ້ນ, ພາລະໜ້າທີ່ຂອງຜູ້ບໍລິຫານການສຶກສາ, ຄູອາຈານ ຈຶ່ງເປັນຜູ້ທີ່ມີຄວາມຮັບຜິດຊອບພິເສດຕໍ່ພາລະກິດການສຶກສາຂອງຊາດຂອງພວກເຮົາ ໃນປັດຈຸບັນ ແລະ ອະນາຄົດ.

ພີ່ນ້ອງປວງຊົນລາວທົ່ວປະເທດທີ່ຮັກແພງທັງຫຼາຍ!

ໃນສົກຮຽນຜ່ານມາ ປະເທດເຮົາໄດ້ຮັບຜົນກະທົບຢ່າງໜັກໜ່ວງຕໍ່ການຮຽນ, ການສອນ ຢູ່ໃນທົ່ວປະເທດ ເນື່ອງຈາກການລະບາດຂອງເຊື້ອພະຍາດອັກເສບປອດໂຄວິດ-19 ນອກນັ້ນ ກໍ່ໄດ້ສົ່ງຜົນກະທົບໃນວົງກວ້າງ, ໃນນັ້ນຂະແໜງການສຶກສາ ແລະ ກິລາກໍ່ໄດ້ຮັບຜົນກະທົບຢ່າງຫລີກລ້ຽງບໍ່ໄດ້. ໂຮງຮຽນໄດ້ມີການໂຈະການຮຽນ-ການສອນຊົ່ວຄາວເປັນເວລາກວ່າ 2 ເດືອນ ໃນຂອບເຂດທົ່ວປະເທດ, ໂຮງຮຽນຫຼາຍກວ່າພັນແຫ່ງໄດ້ຖືກນໍາໃຊ້ເປັນສູນກັກກັນຄົນລາວທີ່ມາຈາກຕ່າງປະເທດ.

ການລະບາດຂອງເຊື້ອພະຍາດໂຄວິດ-19 ນອກຈາກຈະສົ່ງຜົນກະທົບ ແລະ ສິ່ງທ້າທາຍໃນການຮຽນ-ການສອນຢ່າງໃຫຍ່ຫຼວງ, ແຕ່ຂະແໜງການສຶກສາ ກໍ່ໄດ້ມີຄວາມພະຍາຍາມຫັນເອົາວິກິດນີ້ ເພື່ອປັບປຸງການປ່ຽນແປງໃໝ່ໃນລະບົບການສຶກສາເປັນຕົ້ນ ໄດ້ນໍາໃຊ້ ສື່ການຮຽນ-ການສອນອອນລາຍເຂົ້າໃນການຖ່າຍທອດຄວາມຮູ້ຢ່າງແຜ່ຫຼາຍໃນຊ່ວງທີ່ໂຈະການຮຽນແບບປົກກະຕິ, ຜົນງານທີ່ພົ້ນເດັ່ນອັນໃໝ່ຂອງຂະແໜງການສຶກສາ ແລະ ກິລາ ໄດ້ມີການເປີດນໍາໃຊ້ຊ່ອງໂທລະພາບຜ່ານດາວທຽມ ຊ່ອງ 8 (LAO ESTV) ເປັນຊ່ອງໂທລະພາບການສຶກສາ ແລະ ກິລາເປັນຄັ້ງທຳອິດຂອງຊາດລາວເຮົາ ທີ່ມີການຖ່າຍທອດທຸກມື້ ແຕ່ 5:00 ໂມງເຊົ້າ ຈົນຮອດ 23:00 ໂມງ. ໃນໂອກາດນີ້ ຂ້າພະເຈົ້າຂໍສະແດງຄວາມຊົມເຊີຍຕໍ່ຄວາມເອົາໃຈໃສ່ຂອງຄະນະນໍາກະຊວງສຶກສາທິການ ແລະ ກິລາ ທຸກຂັ້ນ ແລະ ນັກວິຊາການຈາກພາກສ່ວນທີ່ກ່ຽວຂ້ອງໃນການພັດທະນາລະບົບການຮຽນຜ່ານໂທລະພາບດັ່ງກ່າວ ທີ່ຖືວ່າເປັນບາດກ້າວຂະຫຍາຍຕົວທີ່ສຳຄັນ ແລະ ເປັນປະໂຫຍດມະຫາສານຕໍ່ວົງການສຶກສາຂອງຊາດລາວເຮົາຕໍ່ໄປ.

ເພື່ອເຮັດໃຫ້ການໄຂສົກຮຽນໃໝ່ ສົກປີ 2020-2021 ໄດ້ມີບັນຍາກາດທີ່ດີ ແລະ ທັນກັບເວລາຕາມປະຕິທິນປີການສຶກສາຂອງແຕ່ລະຊັ້ນ, ແຕ່ລະສາຍ. ສະນັ້ນ, ຂ້າພະເຈົ້າຂໍຮຽກຮ້ອງມາຍັງຄະນະພັກຄະນະນໍາ, ຜູ້ບໍລິຫານການສຶກສາ, ຄະນະພັດທະນາການສຶກສາທຸກຂັ້ນ ແລະ ທຸກພາກສ່ວນໃນສັງຄົມ ລວມທັງພາກເອກະຊົນ ຈົ່ງເປັນເຈົ້າການຮ່ວມກັນກະກຽມຄວາມພ້ອມ ແລະ ອໍານວຍຄວາມສະດວກຕາມເງື່ອນໄຂ ແລະ ຄວາມສາມາດຕົວຈິງຂອງຂະແໜງການ ແລະ ທ້ອງຖິ່ນ ໂດຍສະເພາະແມ່ນການຊັບຊ້ອນບັນຈຸຄູສອນ, ກະກຽມອາຄານສະຖານທີ່ຫ້ອງຮຽນ, ອຸປະກອນການສອນ-ການຮຽນ, ບ່ອນທີ່ພັກອາໄສຂອງຄູຢູ່ເຂດຫ່າງໄກສອກຫຼີກ ແລະ ດ້ານທີ່ຈໍາເປັນອື່ນໆ ເພື່ອຮັບໃຊ້ໃຫ້ແກ່ການເປີດສົກຮຽນ ແລະ ຮັບໃຊ້ແກ່ການສອນ-ການຮຽນຕະຫຼອດຮອດສົກຮຽນ ໃໝ່ໃຫ້ໄດ້ຮັບຜົນດີ.

ພ້ອມທັງໃຫ້ມີມາດຕະການປ້ອງກັນເຊື້ອພະຍາດໂຄວິດ-19 ໂດຍການໝັ່ນລ້າງມືດ້ວຍສະບູ່ ຫຼື ນໍ້າຢາຂ້າເຊື້ອ, ສະໜອງຜ້າອັດປາກອັດດັງ, ກວດວັດອຸນຫະພູມຢ່າງເປັນປະຈຳ ໃຫ້ກາຍເປັນຄວາມເຄີຍຊິນໃນການດຳລົງຊີວິດປະຈຳວັນ ຂອງປະຊາຊົນເຮົາໂດຍສະເພາະບັນດານັກຮຽນນັກສຶກສາ, ຊາວໜຸ່ມ, ເຍົາວະຊົນ ແລະ ອະນຸຊົນ ຂອງພວກເຮົາ.

ທ້າຍສຸດນີ້, ຕາງໜ້າໃຫ້ການນໍາພັກ ແລະ ລັດຖະບານ, ຂ້າພະເຈົ້າ ຂໍອວຍພອນໄຊອັນປະເສີດ ມາຍັງຜູ້ບໍລິຫານການສຶກສາ, ຄູ-ອາຈານ, ນັກຮຽນ-ນັກສຶກສາ, ພະນັກງານ-ລັດຖະກອນ, ທະຫານ, ຕໍາຫຼວດ ຕະຫຼອດຮອດປະຊາຊົນລາວບັນດາເຜົ່າໃນທົ່ວປະເທດຈົ່ງມີສຸຂະພາບເຂັ້ມແຂງມີຄວາມສຸກຄວາມຈະເລີນ ແລະ ມີຜົນສໍາເລັດໃນໜ້າທີ່ວຽກງານຂອງຕົນ.

ອວຍພອນໃຫ້ສົກຮຽນ 2020-2021 ຈົ່ງໄດ້ຮັບຜົນສໍາເລັດອັນຈົບງາມ.

HTML tutorial