ສ.ອາເມຣິກາ ປະເມີນກອງທັບຈີນ ວ່າໃນທົດສະວັດໜ້າຈະມີຫົວຮົບນິວເຄຼຍເພີ່ມຂຶ້ນອີກກວ່າ 200 ຫົວ

ລາຍງານ 2 ກັນຍາ 2020, ກະຊວງປ້ອງກັນປະເທດ ສ.ອາເມຣິກາເຜີຍແຜ່ບົດລາຍງານປະຈຳປີ ວ່າດ້ວຍອຳນາດທາງທະຫານຂອງຈີນ ມີເນື້ອໃນສຳຄັນຕອນໜຶ່ງເປັນການປະເມີນຂີດຄວາມສາມາດດ້ານໂຄງການພັດທະນາອາວຸດນິວເຄຼຍຂອງກອງທັບປົດປ່ອຍປະຊາຊົນຈີນ ຄາດວ່າຈຳນວນຫົວຮົບນິວເຄຼຍໃນຄັງສາງຂອງກອງປົດປ່ອຍປະຊາຊົນຈີນ ມີບໍ່ເກີນ 200 ຫົວຮົບ ຖືເປັນຄັ້ງທຳອິດຢ່າງເປັນທາງການທີ່ກະຊວງປ້ອງກັນປະເທດ ສ.ອາເມຣິກາ ໃຫ້ຄວາມເຫັນຕໍ່ບັນຫາດັ່ງກ່າວ.

ເຖິງຢ່າງໃດກໍ່ຕາມ ບົດລາຍງານລະບຸວ່າ ໂຄງການດ້ານອາວຸດນິວເຄຼຍຂອງຈີນ ມີການພັດທະນາຢ່າງໄວວາ ໂດຍ ສ.ອາເມຣິກາຄາດວ່າ ພາຍໃນທົດສະວັດຕໍ່ໄປ ກອງທັບປົດປ່ອຍປະຊາຊົນຈີນຈະສາມາດຍົກລະດັບອາວຸດນິວເຄຼຍຂອງຕົນເອງໃຫ້ມີປະສິດທິພາບຍິ່ງຂຶ້ນ ທັງໃນດ້ານຄວາມທັນສະໄໝ ແລະ ຄວາມຫຼາກຫຼາຍໃນການນຳໃຊ້ທັງທາງບົດ, ທາງທະເລ ແລະ ທາງອາວຸດ ໝາຍຄວາມວ່າຈຳນວນຫົວຮົບນິວເຄຼຍຂອງຈີນຈະເພີ່ມເປັນຫຼາຍກວ່າ 200 ຫົວຮົບ ພຽງພໍທີ່ຈະຕິດຕັ້ງໄປກັບຂີປະນາວຸດຂ້າມທະວີບ (ICBM) ເຊິ່ງກະຊວງປ້ອງກັນປະເທດ ສ.ອາເມຣິກາ ເຊື່ອວ່າມີລັດສະໜີການໂຈມຕີເຖິງແຜ່ນດິນໃຫຍ່ ສ.ອາເມຣິກາ.

ຂະນະທີ່ລັດຖະບານຈີນ ຍັງບໍ່ມີປະຕິກິລິຍາຢ່າງເປັນທາງການຕໍ່ການເຜີຍແຜ່ບົດລາຍງານດັ່ງກ່າວຂອງ ສ.ອາເມຣິກາ, ເມື່ອຫວນຄືນໄປເມື່ອເດືອນກໍລະກົດ ທີ່ຜ່ານມາ ຈີນກ່າວວ່າ ມີຈຸດຢືນຊັດເຈນກ່ຽວກັບປະເດັນຂໍ້ຕົກລົງນິວເຄຼຍໃໝ່ ທີ່ ສ.ອາເມຣິກາຕ້ອງການໃຫ້ເປັນແບບສາມຝ່າຍຄື: ລັດເຊຍ, ສ.ອາເມຣິກາ ແລະ ຈີນເຂົ້າຮ່ວມ ວ່າຈະເກີດຂຶ້ນກໍ່ຕໍ່ເມື່ອ ສ.ອາເມຣິກາຫຼຸດຈຳນວນອາວຸດນິວເຄຼຍໃຫ້ສອດຄ່ອງກັບປະລິມານທີ່ລັດຖະບານຈີນມີຢູ່.

HTML tutorial