ສ.ອາເມຣິກາຂຶ້ນບັນດຳໄອຍະການສູງສຸດສານອາຍາໂລກ ຂໍ້ຫາດຳເນີນຄະດີອາເມຣິກາ ແລະ ພັນທະມິດ

ລາຍງານ 3 ກັນຍາ 2020, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ຖະແຫຼງເມື່ອວັນພຸດ (2 ກັນຍາ) ທີ່ຜ່ານມາ ວ່າເນື່ອງຈາການທີ່ສານອາຍາລະຫວ່າງປະເທດ (ICC) ທີ່ມີສຳນັກງານໃຫຍ່ທີ່ນະຄອນເຮັກ ປະເທດໂຮນລັງ ຍັງພຸ້ງເປົ້າໂຈມຕີຄົນອາເມຣິກາ ຈຶ່ງນຳມາເຊິ່ງຜົນກະທົບອັນໜ້າເສົ້າ ທີ່ລັດຖະບານ ສ.ອາເມຣິກາຕ້ອງດຳເນີນການຕອບໂຕ້.

ເຊິ່ງທ່ານ ໄມ ພອມແພວ ປະກາດຊື່ທ່ານ ນາງ ຟາຕູ ເບນຊູດາ ໄອຍະການສູງສຸດຂອງ ICC ແລະ ທ່ານ ພາຄິໂຊ ໂມໂຊໂຊໂກ ເລຂາທິການສຳນັກງານໄອຍະການສູງສຸດຂອງ ICC ຄືບຸກຄົນທີ່ຕ້ອງເຂົ້າສູ່ບັນຊີດຳ ຕາມການໃຊ້ອຳນາດພິເສດຂອງຝ່າຍບໍລິຫານຂອງທ່ານ ໂດໂນ ທຣຳ ປະທານປະເທດ ສ.ອາເມຣິກາ ທີ່ລົງລາຍເຊັນເມື່ອວັນທີ 11 ມິຖຸນາ ທີ່ຜ່ານມາ ວ່າດ້ວຍການຂວ້ຳບາດການເດີນທາງ ແລະ ການອາຍັດຊັບສິນ ແລະ ອະສັງຫາລິມະຊັບຂອງບຸກຄົນໃດກໍ່ຕາມທີ່ເປັນເຈົ້າໜ້າທີ່ຂອງ ICC ແລ້ວມີສ່ວນກ່ຽວຂ້ອງກັບການສືບສວນສອບສວນ ຫຼື ຮ້ອງຟ້ອງດຳເນີນຄະດີເຈົ້າໜ້າທີ່ຂອງລັດຖະບານ ສ.ອາເມຣິກາ ແລະ ພັນທະມິດເຊັ່ນ: ອິດສະຣາແອນ ໃນຂໍ້ຫາອາຊະຍາກອນສົງຄາມໃນອາຟະການິດສະຖານ.

ຂະນະດຽວກັນ, ທ່ານ ໄມ ພອມແພວ ກ່າວອີກວ່າ ບຸກຄົນ ແລະ ໜ່ວຍງານແຫ່ງໃດກໍ່ຕາມ ທີ່ຍັງໃຫ້ການສະໜັບສະໜູນບຸກຄົນທັງສອງ ຖືວ່າຢູ່ໃນພາວະສ່ຽງ ອາດຖືກຂຶ້ນບັນຊີດຳເປັນລຳດັບຕໍ່ໄປ.

ດ້ານ ICC ອອກຖະແຫຼງການປະນາມມາດຕະການດັ່ງກ່າວຂອງ ສ.ອາເມຣິກາ ວ່າເປັນການໃຊ້ອຳນາດຝ່າຍດຽວ ເພື່ອຂົ່ມຂູ່ສານຍຸຕິທຳລະຫວ່າງປະເທດ, ທຳລາຍຫຼັກນິຕິທຳ ແລະ ທຳມະນູນນະຄອນຫຼວງໂຣມ ເຊິ່ງເປັນຂໍ້ຕົກລົງລະຫວ່າງປະເທດໃນການສ້າງຕັ້ງ ICC ເມື່ອປີ 2002.

HTML tutorial