ອິນເດຍສັ່ງປິດກັ້ນແອັບໂທລະສັບທີ່ຜະລິດ ແລະ ຈຳໜ່າຍໂດຍຈີນ ເພີ່ມອີກ 118 ແອັບ

ລາຍງານ 3 ກັນຍາ 2020,​ກະຊວງອິເລັກໂຕຣນິກ ແລະ ເຕັກໂນໂລຊີຂໍ້ມູນຂ່າວສານອິນເດຍ ອອກຖະແຫຼງການເມື່ອວັນພຸດ (2​ ກັນຍາ) ທີ່ຜ່ານມາ ເລື່ອງການຂຶ້ນບັນຊີດຳແອັບພິເຄຊັນທີ່ຄິດຄົ້ນ,​ ພັດທະນາ ແລະ ຈັດຈຳໜ່າຍໂດຍຜູ້ປະກອບການໃນ ສປ.ຈີນ ອີກ 118 ລາຍການ ເປັນຄັ້ງທີ 3 ຕໍ່ຈາກການປິດກັ້ນແອັບ 59 ລາຍການເມື່ອປາຍເດືອນມິຖຸນາ ແລະ 47 ລາຍການເມື່ອເດືອນກໍລະກົດ ທີ່ຜ່ານມາ ໂດຍແອັບຊື່ດັ່ງເຊັ່ນ: WeChat, TikTok, Weibo, Baidu ຖືກປິດກັ້ນເປັນກຸ່ມທຳອິດ.

ເຖິງແມ່ນວ່າຍັງບໍ່ມີການລະບຸຊັດເຈນ ວ່າມາດຕະການຈະມີຜົນເມື່ອໃດ, ເຖິງຢ່າງໃດກໍ່ຕາມ ລັດຖະບາຍອິນເດຍຍັງຄົງໃຫ້ເຫດຜົນເຊັ່ນເດີມ ວ່າເນື່ອງຈາກແອັບເຫຼົ່ານັ້ນເປັນເຕັກໂນໂລຊີ ທີ່ສ້າງຄວາມເສຍຫາຍໃຫ້ກັບອະທິປະໄຕ ແລະ ພື້ນແຜ່ນດິນອັນຄົບຖ້ວນຂອງອິນເດຍ, ວຽກງານປ້ອງກັນປະເທດຂອງອິນເດຍ, ຄວາມໝັ້ນຄົງແຫ່ງລັດ ແລະ ຄວາມສະຫງົບຮຽບຮ້ອຍຂອງປະຊາຊົນໃນສັງຄົມ.

ສຳລັບແອັບກຸ່ມຫຼ້າສຸດທີ່ຖືກປິດກັ້ນ ສ່ວນໃຫຍ່ຈັດຈຳໜ່າຍໂດຍບໍລິສັດ TenCent ລວມເຖິງເກມ PUBG ຫຼື PUB ທີ່ບົດລາຍງານຂອງກະຊວງອິເລັກໂຕນິກ ແລະ ເຕັກໂນໂລຊີຂໍ້ມູນຂ່າວສານອິນເດຍລະບຸວ່າ ເຖິງແມ່ນວ່າຜູ້ພັດທະນາຫຼັກເປັນຄົນເກົາຫຼີໃຕ້ ແຕ່ TenCent ເຮັດໜ້າທີ່ຈັດຈຳໜ່າຍອັນທີ່ໃຊ້ຫຼິ້ນເທິງໂທລະສັບ, ໃນດ້ານຂອງກະຊວງການຕ່າງປະເທດຈີນ ແລະ ສຳນັກງານຂອງໃຫຍ່ຂອງ TenCent ໃນນະຄອນຫຼວງປັກກິ່ງຍັງບໍ່ມີປະຕິກິລິຍາຕອບໂຕ້ຢ່າງເປັນທາງການ.

ການເຄື່ອນໄຫວດັ່ງກ່າວຂອງອິນເດຍ ສະແດງໃຫ້ເຫັນວ່າ ບັນຍາກາດຕາມເຂດຊາຍແດນທີ່ມີຄວາມຂັດແຍ່ງກັບຈີນ ເທິງສາຍພູຫິມາໄລ ບໍລິເວນພູກັນວານ ທາງພາກຕາເວັນອອກຂອງເຂດລາດັກ ໃນພູມມິພາກແຄັສເມຍຂອງອິນເດຍ ຫຼື ເຂດອັກໄສຊິນ ທາງພາກຕາເວັນຕົກສຽງໃຕ້ຂອງຈີນ ຍັງຄົງເຄັ່ງຕຶງ ໂດຍທະຫານຈີນ ແລະ ອິນເດຍປະທະກັນຢູ່ບໍລິເວນດັ່ງກ່າວ ເມື່ອວັນທີ 15 ມິຖຸນາ ທີ່ຜ່ານມາ ເຮັດໃຫ້ທະຫານອິນເດຍເສຍຊີວິດ 20 ຄົນ, ສ່ວນຈີນຍັງບໍ່ເປີດເຜີຍຂໍ້ມູນຕໍ່ກັບການສູນເສຍຂອງຝ່າຍຕົນເອງ.

ນອກຈາກນີ້, ນັບຕັ້ງແຕ່ກາງເດືອນທີ່ຜ່ານມາ ມີລາຍງານການກະທົບກະທັ້ງກັນອີກຫຼາຍຄັ້ງລະຫວ່າງທະຫານຂອງທັງສອງອປະເທດ ເຊິ່ງລັດຖະບານຈີນໜັກແໜ້ນປະຕິເສດ, ດ້ານອິນເດຍຮຽກຮ້ອງໃຫ້ທະຫານຈີນຖອຍກັບໄປຍັງຕຳແໜ່ງທີ່ຕັ້ງເດີມ ເມື່ອເດືອນພຶດສະພາປີນີ້.

HTML tutorial