ນາຍົກລັດເຊຍຢ້ຽມຢາມເບລາຣຸດຊີ ປຶກສາຫາລືແນວທາງປ້ອງກັນໄພຮຸກຮານຈາກຕາເວັນຕົກ

ລາຍງານ 5 ກັນຍາ 2020, ທ່ານ ອະເລັກຊານເດີ ລູຄາເຊນໂກ ປະທານປະເທດເບລາຣຸດຊີ ໃຫ້ການຕ້ອນຮັບທ່ານ ມິຄາອິວ ມິຊຸສຕິນ ນາຍົກລັດຖະມົນຕີລັດເຊຍ ໃນໂອກາດເດີນທາງຢ້ຽມຢາມນະຄອນຫຼວງມິນ ເມື່ອວັນພະຫັດ ທີ່ຜ່ານມາ ທ່າມກາງບັນຫາທາງການເມືອງຂອງເບລາຣຸດຊີ ທີ່ກຳລັງປະເຊີນກັບການປະທ້ວງຕໍ່ຕ້ານລັດຖະບານທີ່ແກ່ຍາວມາຕັ້ງແຕ່ວັນທີ 9 ສິງຫາ ທີ່ຜ່ານມາ ເຊິ່ງເປັນວັນເລືອກຕັ້ງປະທານປະເທດ ເປັນເຫດມາຈາກໄຊຊະນະຢ່າງຖ້ວມທົ້ນຂອງທ່ານ ອະເລັກຊານເດີ ລູຄາເຊນໂກ.

ພາບ: ທ່ານ ມິຄາອິວ ມີຊຸສຕິນ ນາຍົກລັດຖະມົນຕີລັດເຊຍ (ຊ້າຍ) ແລະ ທ່ານ ອະເລັກຊານເດີ ລູຄາເຊນໂກ ປະທານປະເທດເລບາຣຸດຊີ, 3 ສິງຫາ 2020.

ເຊິ່ງທ່ານ ມິຄາອິວ ມິຊຸສຕິນ ທີ່ຖືເປັນເຈົ້າໜ້າທີ່ລະດັບສູງສຸດຂອງລັດຖະບານລັດເຊຍ ທີ່ເດີນທາງມາຍັງເບລາຣຸດຊີໃນໄລຍະເວລານີ້ ບໍ່ໄດ້ເວົ້າໂດຍກົງເຖິງບັນຫາຄວາມວຸ້ນວາຍທາງການເມືອງທີ່ຍັງຄົງເກີດຂຶ້ນ ແຕ່ກ່າວວ່າລັດເຊຍສະໜັບສະໜູນເຕັມທີ່ ຕໍ່ການປະຕິບັດງານຂອງລັດຖະບານເບລາຣຸດຊີ ເພື່ອຮັກສາໄວ້ເຊິ່ງເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ, ຂະນະດຽວກັນປະຫວັດສາດຫຼາຍດ້ານ ຕະຫຼອດຮອດວັດທະນະທຳ ແລະ ພາສາທີ່ບົ່ງບອກເຖິງຄວາມໃກ້ຊິດສະໜິດແໜ້ນລະຫວ່າງທັງສອງປະເທດໄດ້ເປັນຢ່າງດີ ໂດຍລັດຖະບານລັດເຊຍຢືນຢັນການໃຫ້ການຊ່ວຍເຫຼືອດ້ານວັກແຊັງປ້ອງກັນໂຄວິດ-19 ໃຫ້ກັບລັດຖະບານເບລາຣຸດດຊີອີກດ້ວຍ.

ໃນດ້ານຂອງທ່ານ ອະເລັກຊານເດີ ລູຄາເຊນໂກ ກ່າວກ່ຽວກັບການກຽມເດີນທາງຢ້ຽມຢາມນະຄອນຫຼວງມົດສະກູ ໃນອີກບໍ່ດົນນີ້ ຕາມຄຳເຊີນຂອງທ່ານ ວະລາດິເມຍ ປູຕິນ ປະທານລັດເຊຍ ວ່າຕົນຕ້ອງການປຶກສາຫາລືແບບພົນໜ້າກັບຜູ້ນຳລັດເຊຍຢ່າງລະອຽດ ແລະ ຮອບຄອບໃນຫຼາຍປະເດັນ ທີ່ລ້ວນກ່ຽວຂ້ອງກັບສາຍພົວພັນສອງຝ່າຍ ແລະ ເນັ້ນວ່າຕອນນີ້ຕົນໄດ້ສັ່ງໃຫ້ກອງທັບເຄັ່ງຕຶງກຳລັງຮັກສາຄວາມປອດໄພຕາມແນວຊາຍແດນຝັ່ງຕະເວັນຕົກແລ້ວ.

ພາບ: ທ່ານ ມິຄາອິວ ມີຊຸສຕິນ ນາຍົກລັດຖະມົນຕີລັດເຊຍ (ຊ້າຍ) ແລະ ທ່ານ ອະເລັກຊານເດີ ລູຄາເຊນໂກ ປະທານປະເທດເລບາຣຸດຊີ, 3 ສິງຫາ 2020.

ພາບ: ບັນຍາກາດພົບປະສອງຝ່າຍລັດເຊຍ-ເບລາຣຸດຊີ,​ 3 ສິງຫາ 2020.

HTML tutorial