ຜູ້ນຳຈີນ-ລັດເຊຍ ກ່າວພ້ອມຮ່ວມມືກັນຢ່າງເດັດດ່ຽວ ປົກປ້ອງໄຊຊະນະຈາກສົງຄາມໂລກ ຄັ້ງທີ 2

ລາຍງານ 5 ກັນຍາ 2020,​ ອີງຕາມການລາຍງານຂອງສຳນັກຂ່າວຊົນຫົວ ເມື່ອວັນທີ 3 ກັນຍາ ທີ່ຜ່ານມາ ທ່ານ ສີ ຈິ້ນຜິງ ປະທານປະເທດຈີນກ່າວວ່າຕົນພ້ອມທີ່ຈະປະຕິບັດງານຮ່ວມກັບທ່ານ ວະລາດິເມຍ ປູຕິນ ປະທານປະເທດລັດເຊຍ ໃນການຮ່ວມມືກັບນານາຊາດເພື່ອປົກປ້ອງໄຊຊະນະຈາກສົງຄາມໂລກ ຄັ້ງທີ 2 ຢ່າງເດັດດ່ຽວ ຕະຫຼອດຮອດການປົກປ້ອງຄວາມເປັນທຳ ແລະ ຄວາມຍຸຕິທຳລະຫວ່າງປະເທດ.

ໃນການສົນທະນາກັບທ່ານ ປູຕິນ ເນື່ອງໃນໂອກາດການສະເຫຼີມສະຫຼອງວັນຄົບຮອບ 75 ປີແຫ່ງໄຊຊະນະໃນສົງຄາມໂລກ ຄັ້ງທີ 2 ທ່ານ ສີ ຈິ້ນຜິງ ເລົ່າວ່າໃນວັນດຽວກັນນີ້ເມື່ອ 75 ປີທີ່ຜ່ານມາ ໄຊຊະນະຈາກສົງຄາມຕໍ່ການຮຸກຮານຂອງຍີ່ປຸ່ນຂອງກອງທັບປະຊາຊົນຈີນ ແລະ ສົງຄາມສະຫະພາບໂຊວຽດ-ຍີ່ປຸ່ນ ຖືເປັນໄຊຊະນະຄັ້ງສຸດທ້າຍຂອງສົງຄາມຕໍ່ຕ້ານຟາດຊິດຂອງໂລກ.

ໃນຄົງຄາມຄັ້ງນັ້ນ ທີ່ແຜ່ລາມໄປທົ່ວອາຊີ, ເອີຣົບ, ອາຟຣິກາ ແລະ ໂອເຊອານີ ກອງທັບ ແລະ ປະຊາຊົນຫຼາຍກວ່າ 100 ລ້ານຄົນໃນທຸກປະເທດທີ່ກ່ຽວຂ້ອງຕ່າງໄດ້ຮັບບາດເຈັບ ຫຼື ເສຍຊີວິດ ຖືເປັນການສູນເສຍອັນແສນເຈັບປວດໃນປະຫວັດສາດຂອງມວນມະນຸດ.

ຈີນ ແລະ ລັດເຊຍ ເຊິ່ງເປັນສະໜາມຮົບຫຼັກໃນອາຊີ ແລະ ເອີຣົບ ໄດ້ເສຍສະຫຼະຄັ້ງຍິ່ງໃຫຍ່ ແລະ ສ້າງຜົນງານປະຫວັດສາດທີ່ບໍ່ອາດຫຼົງລືມໄດ້ໃຫ້ແກ່ໄຊຊະນະຂອງສົງຄາມຕໍ່ຕ້ານຟາດຊິດ.

ທ່ານ ສີ ຈິ້ນຜິງ ກ່າວວ່າປະຊາຊົນຈີນ ແລະ ລັດເຊຍຮ່ວມກັນຕໍ່ສູ້ຄຽງບ່າຄຽງໄຫຼ່ກັນ ແລະ ກໍ່ສ້າງຮາກຖານມິດຕະພາບອັນຍິ່ງໃຫຍ່ດ້ວຍສາຍເລືອດອັນບໍ່ມີວັນຕັດຂາດຈາກກັນໄດ້ ອັນໄດ້ກາຍເປັນຮາກຖານທີ່ໝັ້ນຄົງຕໍ່ການພັດທະນາສາຍພົວພັນສອງຝ່າຍໃນລະດັບສູງ.

ໃນຖານະສະມາຊິກຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ ຜູ້ນຳຈີນກ່າວຢ້ຳວ່າ ຈີນ ແລະ ລັດເຊຍຕ່າງກໍ່ແບກຮັບຄວາມຮັບຜິດຊອບທີ່ສຳຄັນ ອັນນຳໄປສູ່ສັນຕິພາບ ແລະ ການພັດທະນາຂອງໂລກ.

ນອກຈາກນີ້, ທ່ານ ສີ ຈິ້ນຜິງ ຍັງສະເໜີໃຫ້ທັງສອງຝ່າຍຮ່ວມມືກັບປະຊາຄົມໂລກໃນການສະໜັບສະໜູນ ແລະ ປະຕິບັດລັດທິຫຼາຍຝ່າຍຢ່າງເຂັ້ມແຂງ ລວມທັງສົ່ງເສີມການສ້າງປະຊາຄົມທີ່ມີອະນາຄົດຮ່ວມກັນຂອງມວນມະນຸດ ເພື່ອໃຫ້ຄົນຮຸ້ນຫຼັງໄດ້ໃຊ້ຊີວິດຢູ່ໃນໂລກທີ່ມີແຕ່ສັນຕິພາບຍືນຍົງ, ຄວາມປອດໄພລະດັບສາກົນ ແລະ ຄວາມຈະເລີນຮຸ່ງເຮືອງຮ່ວມກັນ.

ໃນດ້ານຂອງທ່ານ ປູຕິນ ກ່າວວ່າສົງຄາມໂລກ ຄັ້ງທີ 2 ຖືເປັນໂລກອະນາດຕະກຳທີ່ເຈັບປວດທີ່ສຸດໃນປະຫວັດສາດຂອງມວນມະນຸດ ໂດຍມີສະຫະພາບໂຊວຽດ ແລະ ຈີນເປັນເວທີຫຼັກໃນການຕໍ່ສູ້ກັບລັດທິຟາດຊິດ ແລະ ລັດທິທະຫານ ທີ່ໄດ້ເສຍສະຫຼະຢ່າງມະຫາສານເພື່ອໄຊຊະນະເໜືອໄພຮຸກຮານ.

ໃນໄລຍະສົງຄາມທີ່ຍາກລຳບາກນັ້ນ ທັງສອງປະເທດ ແລະ ສອງປະຊາຊົນໄດ້ຫຼໍ່ຫຼອມມິດຕະພາບໃນຖານະມິດສະຫາຍຮ່ວມຮົບ, ຜູ້ນຳລັດເຊຍຍັງກ່າວຕື່ມວ່າ ຈົນເຖິງທຸກວັນນີ້ ລັດເຊຍ ແລະ ຈີນຍັງຄົງຮັກສາຈິດໃຈແຫ່ງການຊ່ວຍເຫຼືອເຊິ່ງກັນ ແລະ ກັນຢ່າງຕໍ່ເນື່ອງ ແລະ ເພີ່ມລະດັບຂຶ້ນ ເຊິ່ງຊ່ວຍໃຫ້ການປະສານ ການຮ່ວມມືເປັນຮຸ້ນສ່ວນທາງຍຸດທະສາດລະຫວ່າງລັດເຊຍ-ຈີນ ບັນລຸການພັດທະນາເປັນຢ່າງດີ.

ທ່ານ ປູຕິນ ກ່າວວ່າເປັນຄວາມຮັບຜິດຊອບຮ່ວມກັນ ທີ່ທັງສອງປະເທດຈະປົກປ້ອງຄວາມຈິງກ່ຽວກັບປະຫວັດສາດສົງຄາມໂລກ ຄັ້ງທີ 2, ຄວາມພະຍາຍາມໃດໆທີ່ຕ້ອງການບິດເບືອນປະຫວັດສາດ ແລະ ລ້າງບາບແກ່ນາຊີ, ຜູ້ນິຍົມລັດທິທະຫານ ແລະ ຜູ້ສົມຮູ້ຮ່ວມຄິດຂອງຄົນພວກນັ້ນ ຈະຕ້ອງຖືກປະຕິເສດຢ່າງເດັດດ່ຽວ.

ຜູ້ນຳລັດເຊຍກ່າວຕື່ມວ່າ ລັດເຊຍຈະບໍ່ຍອມໃຫ້ຖືກຫຼົງລືມ ຫຼື ການໃສ່ຮ້າຍຜູ້ຍຸຕິສົງຄາມ ຫຼື ປະຕິເສດໝາກຜົນຂອງສົງຄາມໂລກ ຄັ້ງທີ 2, ພ້ອມຈະຮ່ວມມືຢ່າງແຂ່ງຂັນກັບຈີນແບບເພື່ອນມິດຕໍ່ໄປ ເພື່ອປົກປ້ອງບໍ່ໃຫ້ເກີດສົງຄາມ ແລະ ຄວາມຂັດແຍ່ງ ຕະຫຼອດຮອດປົກປ້ອງສະຖຽນລະພາບ ແລະ ຄວາມໝັ້ນຄົງຂອງໂລກ.

HTML tutorial