ລັດເຊຍນຳຈີນ ແລະ ອິນເດຍ ສູ່ໂຕະເຈລະຈາບັນຫາຂໍ້ຂັດແຍ່ງຊາຍແດນທີ່ຍັງຢູ່ໃນລະດັບເຄັ່ງຕຶງ

ລາຍງານ 5 ກັນຍາ 2020,​ທ່ານພົນເອກ ເຊີເກ ຊອຍກູ ລັດຖະມົນຕີກະຊວງປ້ອງກັນປະເທດລັດເຊຍ ເປັນເຈົ້າພາບຈັດຕັ້ງການເຈລະຈາລະຫວ່າງທ່ານພົນເອກ ເວີ່ຍ ເຟິງເຫີ ລັດຖະມົນຕີກະຊວງປ້ອງກັນປະເທດຈີນ ກັບທ່ານ ຣາຊະນາດ ສິງ ລັດຖະມົນຕີກະຊວງປ້ອງກັນປະເທດອິນເດຍ ທີ່ນະຄອນຫຼວງມົດສະກູ ຕໍ່ກັບບັນຫາຂໍ້ຂັດແຍ່ງທາງຊາຍແດນລະຫວ່າງຈີນກັບອິນເດຍ ໂດຍສະເພາະໃນພູມມິພາກລາດັກ ທາງພາກຕາເວັນອອກສຽງເໜືອຂອງອິນເດຍ ເຊິ່ງຕິດກັບເຂດອັກໄສຊິນ ທາງພາກຕາເວັນຕົກສຽງໃຕ້ຂອງຈີນ.

ເຖິງແມ່ນວ່າການປະຊຸມດັ່ງກ່າວເກີດຂຶ້ນນອກຮອບການປະຊຸມອົງການການຮ່ວມມືຊຽງໄຮ (SCO) ເຊິ່ງລັດເຊຍເຮັດໜ້າທີ່ເປັນປະທານປະຈຳປີນີ້ ແຕ່ຖືໄດ້ວ່າເປັນການພົບໜ້າກັນຄັ້ງທຳອິດລະຫວ່າງເຈົ້າໜ້າທີ່ລະດັບສູງດ້ານນະໂຍບາຍຄວາມໝັ້ນຄົງຂອງຈີນ ແລະ ອິນເດຍ ນັບຕັ້ງແຕ່ທະຫານຂອງທັງສອງປະເທດປະທະກັນຢູ່ບໍລິເວນຂໍ້ຂັດແຍ່ງດັ່ງກ່າວ ເມື່ອກາງເດືອນມິຖຸນາ ທີ່ຜ່ານມາ ສົ່ງຜົນໃຫ້ທະຫານອິນເດຍເສຍຊີວິດ 20 ຄົນ ແຕ່ຈີນປະຕິເສດເປີດເຜີຍຂໍ້ມູນການສູນເສຍຂອງຕົນເອງ.

ເຖິງຢ່າງໃດກໍ່ຕາມ, ຕ່າງຝ່າຍຕ່າງຍັງຮັກສາທ່າທີພາຍຫຼັງສຳເລັດການປຶກສາຫາລື ໂດຍທ່ານ ຣາຊະນາດ ສິງກ່າວວ່າ ສະຖຽນລະພາບດ້ານຄວາມໝັ້ນຄົງໃນພູມມິພາກຈະຍືນຍົງ ຫຼື ບໍ່ ແລະ ຫຼາຍໜ້ອຍພຽງໃດ ຂຶ້ນຢູ່ກັບຄວາມເຊື່ອໝັ້ນຂອງທັງສອງຝ່າຍ ເຊິ່ງຕ່າງກໍ່ມີຄວາມສາມາດພຽງພໍທີ່ຈະຫຼຸດຜ່ອນບັນຍາກາດອັນເຄັ່ງຕຶງ, ດ້ານຈີນເຜີຍແຜ່ເປັນຖະແຫຼງການ ມີເນື້ອໃນສຳຄັນວ່າ ພ້ອມປົກປ້ອງອະທິປະໄຕ ແລະ ຮຽກຮ້ອງໃຫ້ອິນເດຍຍົກລະດັບການຄຸ້ມຄອງທະຫານໃນແນວໜ້າ.

ເຊິ່ງອິນເດຍ. ແລະ ຈີນເປັນໜຶ່ງໃນປະເທດທີ່ມີຊາຍແດນຮ່ວມກັນເປັນໄລຍະທາງຍາວທີ່ສຸດໃນໂລກ ໂດຍວັດແທກໄດ້ປະມານ 4,000 ກິໂລແມັດ ສ່ວນໃຫຍ່ເປັນເຂດທີ່ມີການອ້າງກຳມະສິດທັບຊ້ອນ ແລະ ເປັນທີ່ຮັບຮູ້ຂອງສອງຝ່າຍ ວ່າຊາຍແດນບໍລິເວນນີ້ເປັນເສັ້ນແບ່ງຄວບຄຸມຕາມສະພາບຄວາມເປັນຈິງ (Line of Actual Control) ຫຼື LAC ເພື່ອຍຸດຕິສົງຄາມເມື່ອປີ 1962 ທີ່ຈີນ ກັບ ອິນເດຍສູ້ຮົບກັນເພື່ອຍາດແຍ່ງພື້ນທີ່ບາງສ່ວນຂອງສາຍພູຫິມາໄລ ກ່ອນຈະມີການກຳນົດເສັ້ນແບ່ງຢ່າງເປັນທາງການ ເມື່ອປີ 1993.

ເຊິ່ງອິນເດຍກ່າວວ່າ ການທີ່ຈີນຍຶດຄອງເນື້ອທີ່ 38,000 ຕາກາງກິໂລແມັດໃນເຂດອັກໄສຊິນ ຖືເປັນການລະເມີດອະທິປະໄຕຂອງພູມມິພາກລາດັກ ແຕ່ການທີ່ລັດຖະບານອິນເດຍປະກາດຍົກເລີກສະຖານະພິເສດຂອງພູມມິພາກແຄັສເມຍ ເມື່ອເດືອນສິງຫາ ປີທີ່ຜ່ານມາ ແລະ ນຳໄປສູ່ການສ້າງຕັ້ງເຂດລາດັກເປັນເຂດປົກຄອງພິເສດ ກໍ່ໄດ້ຮຽກສຽງວິຈານຢ່າງໜັກຈາກລັດຖະບານຈີນເຊັ່ນກັນ.

HTML tutorial