ສ.ອາເມຣິກາເຄື່ອນກຳລັງພົນ ແລະ ອາວຸດເຂົ້າລິດຕົວນີ ຊ້ອມຮົບຢູ່ຊາຍແດນທີ່ຕິດກັບເບລາຣຸດຊີ

ລາຍງານ 6 ກັນຍາ 2020, ກະຊວງປ້ອງກັນປະເທດລິດຕົວນີອອກຖະແຫຼງການເມື່ອວັນເສົາ (5 ກັນຍາ) ທີ່ຜ່ານມາ ວ່າທະຫານອາເມຣິກາຫຼາຍຮ້ອຍຄົນ ພ້ອມອາວຸດຍຸດໂທປະກອນ ທີ່ມີທັງລົດຕັງ Abrams ຫຼາຍກວ່າ 20 ຄັນ ເດີນທາງຂ້າມເຂດແດນຈາກໂປໂລຍ ເພື່ອກຽມຄວາມພ້ອມສຳລັບການເຝິກຊ້ອມຮົບຮ່ວມກັນ ໂດຍພາລະກິດດັ່ງກ່າວຈະດຳເນີນໄປຈົນເຖິງເດືອນພະຈິກ 2020.

ເຖິງແມ່ນວ່າລັດຖະບານລິດຕົວນີຢືນຢັນວ່າແຜນການດັ່ງກ່າວ ໄດ້ມີການກຳນົດແຜນການໄວ້ດົນແລ້ວ ແລະ ບໍ່ກ່ຽວຂ້ອງກັບສະຖານະການໃດກໍ່ຕາມໃນພູມມິພາກ, ເຖິງຢ່າງໃດກໍ່ຕາມ ການຊ້ອມຮົບຈະເກີດຂຶ້ນໃກ້ກັບຊາຍແດນເບື້ອງຕາເວັນອອກຂອງລິດຕົວນີ ທີ່ຕິດກັບເບລາຣຸດຊີ ທີ່ເກີດການປະທ້ວງແກ່ຍາວມາຕັ້ງແຕ່ວັນທີ 9 ສິງຫາ ທີ່ຜ່ານມາ ເພື່ອຂັບໄລ່ລັດຖະບານພາຍໃຕ້ການນຳຂອງທ່ານປະທານປະເທດ ອະເລັກຊານເດີ ລູຄາເຊນໂກ.

ເຊິ່ງການເຄື່ອນໄຫວຂ້າມເຂດແດນລະຫວ່າງໂປໂລຍ ກັບ ລິດຕົວນີຂອງກອງທັບ ສ.ອາເມຣິກາ ເກີດຂຶ້ນໃນເວລາດຽວກັນກັບທີ່ທ່ານພົນເອກ ເຊີເກ ຊອຍກູ ລັດຖະມົນຕີກະຊວງປ້ອງກັນປະເທດລັດເຊຍ ກ່າວວ່າກອງກຳລັງຂອງອົງການສົນທິສັນຍາອາກລັງຕິກເໜືອ. (NATO) ເຄື່ອນກຳລັງພົນເຂົ້າມາປະຈຳການຢູ່ຫຼາຍປະເທດໃນເອີຣົບຕາເວັນອອກກວ່າ 10,000 ຄົນແລ້ວ ສ່ວນໃຫຍ່ເປັນທະຫານອາເມຣິກາ ແລະ ມີທິດທາງຈະເສີມກຳລັງເພີ່ມອີກໃນໄລຍະເວລາມໍ່ໆນີ້.

HTML tutorial