ຈີນວ່າ ສ.ອາເມຣິກາປະຕິບັດເຊັ່ນໃດກັບນັກຂ່າວຈີນ, ກໍ່ຈະປະຕິບັດເຊັ່ນນັ້ນກັບນັກຂ່າວ ສ.ອາເມຣິກາ

ລາຍງານ 7 ກັນຍາ 2020, ທ່ານ ນາງ ຫົວ ຊຸນຢິງ ໂຄສົກກະຊວງການຕ່າງປະເທດຈີນ ກ່າວກໍ່ກັບກໍລະນີທີ່ນັກຂ່າວປະຈຳນະຄອນຫຼວງປັກກິ່ງຈາກຫຼາຍສຳນັກຂອງ ສ.ອາເມຣິກາ ໂດຍສະເພາະ CNN, Bloomberg ແລະ The Wall Street Journal ທີ່ຮ້ອງຮຽນວ່າລັດຖະບານຈີນຖ່ວງດຶຶງເວລາການຕໍ່ອາຍຸບັດປະຈຳຕົວນັກຂ່າວທີ່ກຳລັງຈະໝົດອາຍຸ ວ່າຈີນຍິນດີຈະສືບຕໍ່ໃຫ້ການຮ່ວມມືເປັນຢ່າງດີກັບສື່ມວນຊົນຂອງ ສ.ອາເມຣິກາ ຫາກນັກຂ່າວຂອງຈີນໃນ ສ.ອາເມຣິກາໄດ້ຮັບການປະຕິບັດໃນລະດັບດຽວກັນ.

ເຊິ່ງບັດປະຈຳຕົວ ແລະ ເອກະສານຢັ້ງຢືນສຳລັບນັກຂ່າວຕ່າງປະເທດ ທີ່ລັດຖະບານຈີນອອກໃຫ້ນັ້ນ ມີຄວາມກ່ຽວເນືອງກັນໂດຍບໍ່ສາມາດແຍກອອກຈາກກັນໄດ້ ກັບວີຊາສຳລັບສື່ມວນຊົນ ດັ່ງນັ້ນ, ການບໍ່ໄດ້ຮັບອະນຸມັດຫຼັກຖານໃໝ່ພາຍໃນເວລາທີ່ກຳນົດ ເທົ່າກັບເປັນການຖືກເນລະເທດໄປໃນຕົວ ແລະ ຕາມປົກກະຕິແລ້ວບັດນັກຂ່າວຕ່າງປະເທດໃນຈີນຕ້ອງຕໍ່ອາຍຸທຸກປີ.

ເຖິງແມ່ນວ່າໂຄສົກກະຊວງການຕ່າງປະເທດຈີນກ່າວເພີ່ມເຕີມວ່າ ການຕໍ່ອາຍຸບັດນັກຂ່າວຂອງສຳນັກຂ່າວ CNN ແລະ ສື່ມວນຊົນ ສ.ອາເມຣິກາອີກຈຳນວນໜຶ່ງກຳລັງຢູ່ໃນຂະບວນການ ແຕ່ປະຕິເສດໃຫ້ຂໍ້ມູນເພີ່ມເຕີມ.

ຂະນະທີ່ທ່ານ ຈ້າວ ລີຈ້ຽນ ໂຄສົກກະຊວງການຕ່າງປະເທດຈີນອີກທ່ານໜຶ່ງ ກ່າວວ່າລັດຖະບານຈີນອົດທົດອົດກັ້ນຕໍ່ກັບບັນຫານີ້ມາໂດຍຕະຫຼອດ ແຕ່ ສ.ອາເມຣິກາຄວນອອກວີຊາໃໝ່ໃຫ້ກັບນັກຂ່າວຂອງຈີນໂດຍໄວທີ່ສຸດ.

ເຊິ່ງນັບຕັ້ງແຕ່ຕົ້ນປີນີ້ຈີນເນລະເທດນັກຂ່າວຕ່າງປະເທດແລ້ວ 17 ຄົນ ສ່ວນໃຫຍ່ເປັນຄົນອາເມຣິກາ, ສ່ວນລັດຖະບານ ສ.ອາເມຣິນາເນລະເທດນັກຂ່າວຂອງຈີນແລ້ວ 60 ຄົນ ແລະ ສັ່ງໃຫ້ສຳນັກຂ່າວຂອງຈີນ 9 ແຫ່ງ ຂຶ້ນທະບຽນຢູ່ໃນລະດັບດຽວກັນກັບສຳນັກງານການທູດຕ່າງປະເທດ ໝາຍຄວາມວ່າຕ້ອງຂຶ້ນທະບຽນຂໍ້ມູນພື້ນຖານຂອງພະນັກງານທຸກຄົນ ລວມເຖິງຜູ້ຖືສັນຊາດ ສ.ອາເມຣິກາ ແລະ ຊັບສິນທີ່ມີຢູ່ທັງໝົດໃນອາເມຣິກາ.

HTML tutorial