ຊີຣີປຶກສາຫາລືລັດເຊຍ ເພື່ອຫາແນວທາງຕໍ່ສູ້ກັບມາດຕະການຂວ້ຳບາດຂອງ ສ.ອາເມຣິກາ

ລາຍງານ 8 ກັນຍາ 2020, ທ່ານ ບາຊາ ອັນ-ອັສຊາດ ປະທານປະເທດຊີຣີໃຫ້ການຕ້ອນຮັບທ່ານ ເຊີເກ ລາວາລົບ ລັດຖະມົນຕີກະຊວງການຕ່າງປະເທດລັດເຊຍ ທີ່ທຳນຽບໃນນະຄອນດາມັດສະກັດ ເມື່ອວັນຈັນ (7 ກັນຍາ) ທີ່ຜ່ານມາ ໂດຍຖືເປັນການຢ້ຽມຢາມນະຄອນຫຼວງຂອງຊີຣີຄັ້ງທຳອິດໃນຮອບ 8 ປີຂອງທ່ານ ເຊີເກ ລາວາຣົບ.

ເຊິ່ງລັດເຊຍເປັນພັນທະມິດດທາງທະຫານສຳຄັນທີ່ສຸດຂອງຊີຣີ ນັບຕັ້ງແຕ່ເກີດສົງຄາມກາງເມືອງຂຶ້ນເມື່ອເດືອນມີນາ 2011 ໂດຍການທີ່ກອງທັບລັດເຊຍໃຫ້ການສະໜັບສະໜູນທາງທະຫານຢ່າງເປັນທາງການກັບຊີຣີ ມາຕັ້ງແຕ່ປີ 2015 ຈົນເຖິງປັດຈຸບັນ ມີສ່ວນສຳຄັນທີ່ຊ່ວຍໃຫ້ລັດຖະບານຊີຣີສາມາດຍຶດຄືນພື້ນທີ່ຈາກກອງກຳລັງຝ່າຍກະບົດ ແລະ ກຸ່ມຕິດອາວຸດໄດ້ເກືອບທັງໝົດ.

ຂະນະທີ່ທຳນຽບປະທານປະເທດຊີຣີ ອອກຖະແຫຼງການກ່ຽວກັບການພົບປະຫາລືຄັ້ງນີ້ວ່າ ເມື່ອສະຖານະການດ້ານຄວາມໝັ້ນຄົງມີສະຖຽນລະພາບດີຂຶ້ນເປັນລຳດັບ ທ່ານ ບາຊາ ອັນ-ອັສຊາດຈຶ່ງໄດ້ຍົກປະເດັນການຮ່ວມມືທາງເສດຖະກິດມາປຶກສາຫາລືກັບລັດຖະມົນຕີຕ່າງປະເທດລັດເຊຍ ເນື່ອງຈາກຕອນນີ້ລັດຖະບານຊີຣີກຳລັງປະເຊີນກັບແຮງກົດດັນຢ່າງໜັກໜ່ວງທາງເສດຖະກິດ.

ເຊິ່ງ ສ.ອາເມຣິກາ ໄດ້ອອກກົດໝາຍຊີຊາ (Caesar Act) ວ່າດ້ວຍການປົກປ້ອງພົນລະເມືອງຊີຣີ ທີ່ລັດຖະສະພາ ສ.ອາເມຣິກາ ຮັບຮອງເມື່ອປີທີ່ຜ່ານມາ ມີຜົນບັງຄັບໃຫ້ຢ່າງເປັນທາງການຕັ້ງແຕ່ກາງເດືອນມິຖຸນາ ທີ່ຜ່ານມາ ມີເນື້ອໃນສຳຄັນຄືການໃຊ້ມາດຕະການຂວ້ຳບາດທາງເສດຖະກິດຕໍ່ບໍລິສັດໃດກໍ່ຕາມຂອງ ສ.ອາເມຣິກາ ທີ່ຮ່ວມງານ ແລະ ມີການເຊື່ອມໂຍງທາງທຸລະກິດກັບປະທານປະເທດຊີຣີ ແລະ ບຸກຄົນໃກ້ຊິດກັບຜູ້ນຳຊີຣີ.

ດ້ານແຫຼ່ງຂ່າວຝ່າຍລັດເຊຍເປີດເຜີຍວ່າ ລັດຖະບານລັດເຊຍມຸ່ງໝັ້ນຍົກລະດັບການຮ່ວມມືດ້ານການຄ້າກັບຊີຣີ ໂດຍສະເພາະດ້ານພະລັງງານ ທີ່ລວມເຖິງໂຄງການກໍ່ສ້າງໂຮງໄຟຟ້າ ແລະ ບໍ່ແຮ່ ໂດຍ Storytransgaz ໜຶ່ງໃນລັດວິສາຫະກິດດ້ານພະລັງງານຂອງລັດເຊຍ ໄດ້ຮັບສຳປະທານທ່າເຮືອຕາຕຸສ ແຄມຝັ່ງທະເລເມດິເຕີເຣນຽນ 49 ປີ ຕັ້ງແຕ່ປີ 2019, ເຖິງຢ່າງໃດກໍ່ຕາມ ທ່າເຮືອແຫ່ງນີ້ເປັນສະຖານທີ່ຕັ້ງຂອງຖານທັບລັດເຊຍໃນບໍລິເວນນັ້ນມາກ່ອນແລ້ວ.

HTML tutorial