ສ.ອາເມຣິກາ ຮຽກຮ້ອງໃຫ້ອາຊຽນຮ່ວມແຮງກັນສູ້ກັບອິດທິພົນຂອງຈີນໃນທະເລຈີນໃຕ້

ລາຍງານ 10 ກັນຍາ 2020, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວຕໍ່ກອງປະຊຸມລັດຖະມົນຕີຕ່າງປະເທດຂອງສະມາຊິກອາຊຽນ ໃນວັນພະຫັດນີ້ (10​ ກັນຍາ) ທີ່ປີນີ້ຈັດຜ່ານປະບົບປະຊຸມທາງໄກແບບອອນລາຍ ຮຽກຮ້ອງໃຫ້ອາຊຽນລົງມືປະຕິບັດ ຫຼາຍກວ່າການອອກຖະແຫຼງການ ໂດຍສະເພາະເລື່ອງຂໍ້ຂັດແຍ່ງໃນທະເລຈີນໃຕ້.

ເຊິ່ງທ່ານ ໄມ ພອມແພວ ກ່າວວ່າອາຊຽນບໍ່ຄວນປ່ອຍປະໃຫ້ຈີນເປັນຝ່າຍຊະນະຢ່າງງ່າຍດາຍ ຫາກສະມາຊິກອາຊຽນທັງ 10 ປະເທດມີຄວາມເປັນເອກະພາບກັນຢ່າງເຂັ້ມແຂງໃນເລື່ອງນີ້ ສ.ອາເມຣິກາພ້ອມຊ່ວຍເຫຼືອຢ່າງເຕັມທີ່ ແລ້ວກ່າວຕໍ່ອີກວ່າ ລັດຖະບານຈີນບໍ່ເຄົາລົບຄຸນຄ່າຂອງປະຊາທິປະໄຕ, ເອກະລາດ ແລະ ພື້ນແຜ່ນດິນອັນຄົບຖ້ວນ ທີ່ປາກົດຊັດເຈນໃນຫຼັກການພື້ນຖານຂອງກົດບັດອາຊຽນ.

ຂະນະດຽວກັນ, ທ່ານ ໄມ ພອມແພວ ກ່າວເຖິງການຂວ້ຳບາດລັດວິສາຫະກິດຂອງຈີນ 24 ແຫ່ງ ເມື່ອທ້າຍເດືອນທີ່ຜ່ານມາ ວ່າ ສ.ອາເມຣິກາໄດ້ເນັ້ນສະເພາະເຈາະຈົງ ບໍລິສັດທີ່ສະໜັບສະໜູນນະໂຍບາຍຂະຫຍາຍອານາເຂດ ແລະ ອິດທິພົນທາງທະຫານຂອງລັດຖະບານຈີນໃນທະເລຈີນໃຕ້ ໃນບໍລິເວນພື້ນທີ່ທັບຊ້ອນກັບອານາເຂດຂອງສະມາຊິກອາຊຽນ ແລະ ຮຽກຮ້ອງໃຫ້ລັດຖະບານໃນອາຊຽນທີ່ມີການຮ່ວມມືກັບບໍລິສັດເຫຼົ່ານັ້ນຄວນທົບທວນຂໍ້ຕົກລົງ.

ໃນດ້ານທ່ານ ຟາມ ບິນ ມິນ ຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດຫວຽດນາມ ໃນຖານະປະທານກອງປະຊຸມກ່າວໂດຍບໍ່ໄດ້ເຈາະຈົງຝ່າຍໃດ ວ່າອາຊຽນມີຄວາມເປັນຫ່ວງຕໍ່ກິດຈະກຳທາງທະຫານໃນທະເລຈີນໃຕ້ ເຊິ່ງມີແຕ່ຈະບັນທອນຄວາມເຊື່ອໝັ້ນ ແລະ ຄວາມໄວ້ວາງໃຈໃນລະດັບການຮ່ວມມືຂອງສອງຝ່າຍ.

HTML tutorial