ລັດຖະມົນຕີກະຊວງການຕ່າງປະເທດ ແລະ ການຄ້າຮົງກາຣີ ຢ້ຽມຢາມ ສປປ.ລາວ ຢ່າງເປັນທາງການ

ລາຍງານ 11 ກັນຍາ 2020, ອີງຕາມການລາຍງານຂອງກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ​ໄດ້​ໃຫ້​ກຽດ​ຕ້ອນຮັບ ​ແລະ ພົບ​ປະ​ປຶກສາຫາລື​ຢ່າງ​ເປັນ​ທາງ​ການ ກັບ ທ່ານ ປີເຕີ ຊີຢາໂຕ ລັດຖະມົນຕີກະຊວງການຕ່າງປະເທດ ແລະ ການຄ້າຮົງກາຣີ.

ທັງສອງຝ່າຍໄດ້ຕີລາຄາສູງຕໍ່ການ​ຮ່ວມມືທີ່ມີໝາກຜົນຕົວຈິງ ໂດຍຜ່ານໂຄງການກູ້ຢືມມີເງື່ອນໄຂບໍ່ມີດອກເບ້ຍ ຈາກລັດຖະບານຮົງກາຣີ ເພື່ອນຳໃຊ້ເຂົ້າໃນການພັດທະນາເສດຖະກິດ ແລະ ສັງຄົມຂອງລາວ ໃນຂະແໜງ​ກະສິກຳ, ການບໍລິຫານຄຸ້ມຄອງຊັບພະຍາກອນນໍ້າ, ວຽກງານຍົກລະດັບການຄຸ້ມຄອງພົນລະເມືອງ, ລວມທັງການອອກບັດປະຈໍາຕົວທີ່ທັນສະໄໝ ​ແລະ ອື່ນໆ​.

ນອກຈາກນັ້ນ, ສອງຝ່າຍຍັງໄດ້​ປຶກສາ​ຫາລື ກ່ຽວກັບທິດທາງເສີມ​ຂະຫຍາ​ຍການຮ່ວມມືລະຫວ່າງສອງກະຊວງການຕ່າງປະເທດ ໃນດ້ານການ​ສຶກສາ,​​ ການເງິນ ແລະ ສາທາລະນະສຸກ

ໃນໂອກາດດຽວກັນນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຮູ້ບຸນຄຸນຂອງລັດຖະບານ ແລະ ປະຊາຊົນລາວ ຕໍ່ການຊ່ວຍເຫຼືອອັນລໍ້າຄ່າຂອງຮົງກາຣີ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງປະເທດ, ໂດຍສະເພາະ ແມ່ນໂຄງການເງິນກູ້ປອດດອກເບ້ຍ, ການແກ້ໄຂຜົນກະທົບຂອງອຸທົກກະໄພອັນຮ້າຍແຮງ ຢູ່ ສປປ.ລາວ ໃນປີທີ່ຜ່ານມາ ກໍ່ຄື ການຕໍ່ຕ້ານໂຄວິດ-19.

ພາຍຫລັງສິ້ນສຸດການປຶກສາຫາລື, ຕາງໜ້າຄະນະຜູ້ແທນທັງສອງຝ່າຍ ກໍ່ໄດ້ຮ່ວມລົງນາມໃນເອກະສານການຮ່ວມມືລະຫວ່າງ ລາວ-ຮົງກາຣີ 2 ສະບັບຄື: ການຮ່ວມມື ດ້ານການສຶກສາ ແລະ ສະຖິຕິ.

ໃນໄລຍະເຄື່ອນໄຫວຢ້ຽມຢາມ ສປປ.ລາວ, ທ່ານ ປີເຕີ ຊີຢາໂຕ ຍັງໄດ້​ເຂົ້າ​ພົບທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ປອ. ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ​ ເຮັດວຽກກັບພາກສ່ວນຕ່າງໆຂອງລາວ ເພື່ອປຶກສາຫາລືທິດທາງການເສີມຂະຫຍາຍການຮ່ວມມືດ້ານຕ່າງໆ ທີ່ທັງສອງຝ່າຍມີຄວາມສົນໃຈ. ນອກຈາກນັ້ນ, ທ່ານລັດຖະມົນຕີ ກໍ່ຍັງໄດ້ຢ້ຽມຢາມໂຄງການ/ເຂົ້າຮ່ວມພີທີເປີດ ສູນວິໄຈ ແລະ ຜະລິດວັກແຊັງສຳລັບສັດ ຢູ່ໜອງແຕ່ງ ເຊິ່ງເປັນໂຄງການໜຶ່ງທີ່ໄດ້ນຳໃຊ້ເງິນກູ້ຢືມມີເງື່ອນໄຂບໍ່ມີດອກເບ້ຍ ໃນໄລຍະ 2 ຈາກລັດຖະບານຮົງກາຣີ.

ພ້ອມກັນນັ້ນ, ຄະນະຜູ້ແທນທັງສອງຝ່າຍ ກໍ່ໄດ້ເຂົ້າຮ່ວມພິທີມອບ-ຮັບອຸປະກອນເຄື່ອງຊ່ວຍຫາຍໃຈ ທີ່ລັດຖະບານຮົງກາຣີ ໄດ້ນຳມາມອບເປັນຂອງຂວັນ ໃຫ້ແກ່ລັດຖະບານລາວ ເພື່ອເປັນການປະກອບສ່ວນໃນວຽກງານປ້ອງກັນ, ສະກັດກັ້ນ ແລະ ຄວບຄຸມໂຄວິດ-19.

ນອກຈາກນັ້ນ, ທ່ານລັດຖະມົນຕີ ກໍ່ຍັງໄດ້ເຂົ້າຮ່ວມພິທີ ເປີດຫ້ອງການຕາງໜ້າສະຖານທູດຮົງກາຣີ ທີ່ບາງກອກ ປະຈຳນະຄອນຫລວງວຽງຈັນ, ເຊິ່ງເປັນສັນຍາລັກ ແຫ່ງການເຕີບໃຫຍ່ຂະຫຍາຍຕົວຂອງການພົວພັນສອງຝ່າຍກ້າວຂຶ້ນສູ່ລະດັບໃໝ່, ອັນ​ເປັນການຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືທີ່ມີມູນເຊື້ອອັນຍາວນານ ລະຫວ່າງ ສປປ.ລາວ ແລະ ຮົງກາຣີ ໃຫ້ເຂັ້ມແຂງ ແລະ ຈະເລີນງອກງາມຍິ່ງໆຂຶ້ນໃນອະນາຄົດ.

HTML tutorial