ເວເນຊູເອລາຈັບສາຍລັບ CIA ຂອງ ສ.ອາເມຣິກາ ໃກ້ກັບໂຮງກັ່ນນ້ຳມັນ

ລາຍງານ 12 ກັນຍາ 2020, ທ່ານ ນິໂຄລັສ ມາດູໂຣ ປະທານປະເທດເວເນຊູເອລາ ຖະແຫຼງເມື່ອວັນສຸກ (11​ ກັນຍາ) ທີ່ຜ່ານມາ ວ່າເຈົ້າໜ້າທີ່ຝ່າຍຄວາມໝັ້ນຄົງຂອງເວເນຊູເອລາສາມາດຈັບກຸມສາຍລັບຄົນອາເມຣິກາ ໃກ້ກັບໂຮງກັ່ນນ້ຳມັນອາມວຍ (Amuay) ແລະ ກາດອນ (Cardon) ໃນລັດຟາລກອນ (Falcon) ທາງພາກເໜືອຂອງປະເທດ ເມື່ອວັນພະຫັດ (10 ກັນຍາ) ທີ່ຜ່ານມາ.

ເຊິ່ງທ່ານ ນິໂຄລັສ ມາດູໂຣໃຫ້ຂໍ້ມູນເບື້ອງຕົ້ນວ່າ ຜູ້ທີ່ຖືກຈັບກຸມໄດ້ເປັນອະດີດທະຫານໜ່ວຍຮົບພິເສດ ທີ່ເຄີຍປະຕິບັດພາລະກິດໃຫ້ກັບສຳນັກຂ່າວກອງກາງ (CIA) ໃນອິຣັກ ໂດຍຂອງກາງທີ່ເຈົ້າໜ້າທີ່ຍຶດໄດ້ມີທັງອາວຸດປືນ ແລະ ເງິນສົດຈຳນວນຫຼຍ ສ່ວນໃຫຍ່ເປັນສະກຸນເງິນໂດລາສະຫະລັດ ພ້ອມທັງຢືນຢັນວ່າຈະເປີດເຜີຍຫຼັກຖານເພີ່ມເຕີມຢ່າງແນ່ນອນ ພາຍໃນມໍ່ໆນີ້.

ຂະນະດຽວກັນ, ຜູ້ນຳເວເນຊູເອລາເຕືອນໃຫ້ບຸກຄະລາກອນປະຈຳໂຮງກັ່ນນ້ຳມັນທຸກແຫ່ງໃນປະເທດຍົກລະດັບມາດຕະການຮັກສາຄວາມປອດໄພ ເນື່ອງຈາກການຈັບກຸມພົນລະເມືອງອາເມຣິກາບຸກຄົນດັ່ງກ່າວນີ້ ເກີດຂຶ້ນພຽງວັນດຽວຫຼັງຈາກທີ່ເຈົ້າໜ້າທີ່ສາມາດປົດຊະນວນລະເບີດ ທີ່ມີຜູ້ນຳມາວາງໄວ້ໃກ້ກັບໂຮງກັ່ນນ້ຳມັນເອວ ປາລິໂຕ ໃນລັດກາຣາໂບໂບ ທີ່ຢູ່ບໍ່ຫ່າງຈາກນະຄອນຫຼວງກາຣາກັສ.

ໃນດ້ານຂອງກະຊວງການຕ່າງປະເທດ ສ.ອາເມຣິກາຍັງບໍ່ສະແດງຈຸດຢືນຢ່າງເປັນທາງການ, ເຖິງຢ່າງໃດກໍ່ຕາມ ຫາກການປະກາດຂອງຜູ້ນຳເວເນຊູເອລາເປັນຄວາມຈິງ ຖືວ່າເວເນຊູເອລາສາມາດຄວບຄຸມຕົວພົນລະເມືອງອາເມຣິກາ ທີ່ພະຍາຍາມກໍ່ຄວາມບໍ່ສະຫງົບພາຍໃນປະເທດໄດ້ເປັນຄົນທີ 3 ພາຍໃນໄລຍະເວລາປະມານ 4 ເດືອນ ຕໍ່ຈາກການຈັບກຸ່ມອະດີດເຈົ້າໜ້າທີ່ໜ່ວຍຮົບພິເສດກຣີນເບີເຣ 2 ຄົນ ແລະ ສານຕັດສິນໃຫ້ທັງສອງຄົນຮັບໂທດຕິດຄຸກ 20 ປີ ຂໍ້ຫາພະຍາຍາມລົ້ມລ້າງອຳນາດລັດ.