ຮອງລັດຖະມົນຕີຖະແຫຼ່ງຂ່າວ ຮຽກຮ້ອງສື່ໃຫ້ກ້າລຸກອອກຈາກການນຳສະເໜີແບບເກົ່າໆທີ່ໜ້າເບື່ອ

ລາຍງານ 13 ກັນຍາ 2020, ອີງຕາມການລາຍງານຂອງວິທະຍຸກະຈາຍສຽງແຫ່ງຊາດ ບັນດາຄະນະບັນນາທິການ ແລະ ສື່ມວນຊົນຈາກພາກສ່ວນຕ່າງໆ ເຂົ້າຮ່ວມການສຳມະນາກ່ຽວກັບທິດຊີ້ນຳຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ທີ່ໄດ້ກ່າວໃນພິທີໂຮມຊຸມນຸມສະເຫຼີມສະຫຼອງວັນສື່ມວນຊົນ ແລະ ການພິມຈຳໜ່າຍຄົບຮອບ 70 ປີ ເມື່ອວັນທີ 14 ສິງຫາ ທີ່ຜ່ານມາວ່າ: “ສື່ມວນຊົນຕ້ອງເປັນຜູ້ກ້າ ປາກອອກແສງ ຜູ້ຮູ້ແທງຈິດໃຈ ຜູ້ສະດຸ້ງໄວເມື່ອອ່ານ ຜູ້ຮູ້ຜ່ານອຸປະສັກ ຜູ້ທີ່ຮັກຄວາມຈິງ ຜູ້ທີ່ຍິງຖືກເປົ້າ” ຈັດຂຶ້ນໂດຍສະມາຄົມນັກຂ່າວແຫ່ງ ສປປ.ລາວ ເມື່ອວັນທີ 10 ກັນຍາ ທີ່ຜ່ານມາ, ທີ່ສຳນັກຂ່າວໜັງສືພິມພາສາຕ່າງປະເທດ, ນະຄອນຫຼວງວຽງຈັນ.

ຈຸດປະສົງຂອງການສຳມະນາຄັ້ງນີ້ ເພື່ອນຳເອົາທິດຊີ້ນຳດັ່ງກ່າວຂອງທ່ານນາຍົກລັດຖະມົນຕີ ເຍືອງໃສ່ການປະຕິບັດໜ້າທີ່ຕົວຈິງຂອງສື່ມວນຊົນລາວໃນປັດຈຸບັນ ເພື່ອໃຫ້ເຫັນຈຸດແຂງທີ່ຕ້ອງເສີມຂະຫຍາຍ ແລະ ຈຸດອ່ອນທີ່ຕ້ອງປັບປຸງແກ້ໄຂໃຫ້ດີຂຶ້ນ ເພື່ອຕອບສະໜອງຕາມຄວາມຕ້ອງການຂອງສັງຄົມໃນໄລຍະໃໝ່ ໂດຍສະເພາະໃນໄລຍະທີ່ມີການລະບາດຂອງພະຍາດໂຄວິດ-19 ໃນທົ່ວໂລກ ທີ່ຕ້ອງຮີບຮ້ອນປ່ຽນແປງ ແລະ ແກ້ໄຂແບບແຜນວິທີເຮັດວຽກໃຫ້ສອດຄ່ອງ ແລະ ທ່ວງທັນຕາມສະພາບການປ່ຽນແປງໃໝ່.

ພາບຈາກວິທະຍຸກະຈາຍສຽງແຫ່ງຊາດ: ບັນຍາກາດການສຳມະນາ

ໃນໂອກາດກ່າວເປີດການສຳມະນາໃນຄັ້ງນີ້ ທ່ານ ສະຫວັນຄອນ ຣາຊະມຸນຕີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ ເພື່ອຈັດຕັ້ງຜັນຂະຫຍາຍທິດຊີ້ນຳຂອງທ່ານນາຍົກລັດຖະມົນຕີ ສື່ມວນຊົນຕ້ອງປັບປຸງປ່ຽນແປງໂດຍລຸກໃໝ່ ນັ່ງໃໝ່ໃນການສະໜອງຂໍ້ມູນຂ່າວສານຜ່ານຜະລິດຕະພັນສື່ຂອງຕົນສູ່ສັງຄົມ ໂດຍໃຫ້ພະຍາຍາມອອກຈາກແບບແຜນການເຮັດຂ່າວແບບເກົ່າ ເພື່ອບໍ່ໃຫ້ເນື້ອໃນແຂງກະດ້າງ, ຮູບແບບແຫ້ງກະດ້າງ, ຂ່າວຊ້ຳໆຊາກໆແຕ່ອັນເກົ່າ ເຮັດໃຫ້ສັງຄົມບໍ່ຢາກຕິດຕາມຟັງ, ເບິ່ງ ແລະ ອ່ານ.

ພ້ອມກັນນີ້, ທ່ານ ສະຫວັນຄອນ ຍັງກ່າວວ່າ ສື່ຕ້ອງເປັນເຈົ້າການ ແລະ ສະດຸ້ງໄວໃນການຕອບໂຕ້ກັບບັນຫາສິ່ງຫຍໍ້ທໍ້ ແລະ ອັດຕັນການພັດທະນາຕ່າງໆ, ລວມທັງກົນອຸບາຍຫັນປ່ຽນໂດຍສັນຕິຂອງອິດທິປໍລະປັກ ແລະ ການໃສ່ຮ້າຍປ້າຍສີຂອງກຸ່ມຄົນບໍ່ຫວັງດີ ເພື່ອທຳລາຍຄວາມເຊື່ອຖືຕໍ່ການນຳພັກ-ລັດ.