ເອກອັກຄະລັດຖະທູດ ສ.ອາເມຣິກາ ປະຈຳ ສປ.ຈີນ ລາອອກ

ລາຍງານ 14 ກັນຍາ 2020, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ລົງຂໍ້ຄວາມໃນ Twitter ວ່າ: ຂອບໃຈທ່ານ ເທີຣີ ແບຣນສະແຕດ ທີ່ປະຕິບັດໜ້າທີ່ເພື່ອປະຊາຊົນອາເມຣິກາ ເປັນເວລາກວ່າ 3 ປີ ໃນຖານະເອກອັກຄະລັດຖະທູດ ສ.ອາເມຣິກາ ປະຈຳ ສປ.ຈີນ ພ້ອມທັງກ່າວຊົມເຊີຍຄວາມຮູ້ຄວາມສາມາດກ່ຽວກັບຈີນຂອງທ່ານ ເທີຣີ ແບຣນສະແຕດ ວ່າມີຄວາມສຳຄັນຕໍ່ການປັບສົມດຸນ ແລະ ຈັດລະບຽບສາຍພົວພັນລະຫວ່າງ ສ.ອາເມຣິກາ ກັບ ຈີນໃຫ້ເປັນໄປດ້ວຍດີ.

ເຊິ່ງຍັງບໍ່ມີຝ່າຍໃດໃຫ້ຂໍ້ມູນຊັດເຈນກ່ຽວກັບເຫດຜົນ ທີ່ເຮັດໃຫ້ທ່ານ ເທີຣີ ແບຣນສະແຕດຕັດສິນໃຈລາອອກຈາກຕຳແໜ່ງ ທີ່ປະຕິບັດໜ້າທີ່ມາຕັ້ງແຕ່ເດືອນພຶດສະພາ 2017 ໂດຍຖືເປັນໜຶ່ງໃນເອກອັກຄະລັດຖະທູດຄົນທຳອິດທີ່ໄດ້ຮັບການສະເໜີຊື່ ແລະ ຜ່ານການຮັບຮອງຈາກສະພາສູງ ໃນສະໄໝລັດຖະບານພາຍໃຕ້ການນຳຂອງທ່ານປະທານປະເທດ ໂດໂນ ທຣຳ ທີ່ເຈາະຈົງໃຫ້ທ່ານ ເທີຣີ ແບຣນສະແຕດປະຈຳທີ່ ສປ.ຈີນ ຈາກການມີປະຫວັດເປັນໝູ່ເກົ່າແກ່ຂອງທ່ານ ສີ ຈິ້ນຜິງ ປະທານປະເທດຈີນ.

ເຖິງຢ່າງໃດກໍ່ຕາມ, ຕະຫຼອດໄລຍະເວລາທີ່ທ່ານ ເທີຣີ ແບຣນສະແຕດຢູ່ໃນຕຳແໜ່ງ ສາຍພົວພັນລະຫວ່າງ ສ.ອາເມຣິກາກັບຈີນຜັດເຄັ່ງຕຶງຂຶ້ນເກືອບທຸກດ້ານ, ຫຼ້າສຸດເມື່ອອາທິດທີ່ຜ່ານມາ ທ່ານ ໄມ ພອມແພວ ສະແດງຄວາມບໍ່ພໍໃຈຕໍ່ການທີ່ໜັງສືພິມປະຊາຊົນຈີນ ໜຶ່ງໃນກະບອກສຽງຂອງລັດຖະບານຈີນ ປະຕິເສດຕີພິມບົດຄວາມຂອງທ່ານ ເທີຣີ ແບຣນສະແຕດ ໂດຍກ່າວວ່າສື່ ສ.ອາເມຣິກາຍັງໃຫ້ເສລີກັບເອກອັກຄະລັດຖະທູດ ແລະ ນັກການທູດຈີນໃນການສະແດງຄວາມຄິດເຫັນຂອງຕົນເອງ.

ແຕ່ທ່ານ ຈ້າວ ລີ່ຈ້ຽນ ໂຄສົກກະຊວງການຕ່າງປະເທດຈີນ ກ່າວວ່າບົດຄວາມຂອງເອກອັກຄະລັດຖະທູດ ສ.ອາເມຣິກາ ບໍ່ສອດຄ່ອງກັບຄວາມເປັນຈິງ ແລະ ມີຈຸດປະສົງຂອງການຂຽນບົດຄວາມເພື່ອໃສ່ຮ້າຍປ້າຍສີລັດຖະບານຈີນ.

ເຊິ່ງການລາອອກຂອງທ່ານ ເທີຣີ ແບຣນສະແຕດ ເກີດຂຶ້ນປະມານ 1 ປີ ພາຍຫຼັງທີ່ທ່ານ ຈອນ ຮັນສະແມນ ຈູເນຍ ລາອອກຈາກຕຳແໜ່ງເອກອັກຄະລັດຖະທູດ ສ.ອາເມຣິກາ ປະຈຳລັດເຊຍ ພາຍຫຼັງປະຕິບັດໜ້າທີ່ໄດ້ 2 ປີ ໂດຍໃຫ້ເຫດຜົນວ່າ ຮູ້ສຶກເປັນກຽດຢ່າງຍິ່ງທີ່ໄດ້ຮັບຄວາມໄວ້ວາງໃຈຈາກລັດຖະບານ ສ.ອາເມຣິກາ ໃຫ້ປະຕິບັດໜ້າທີ່ເອກອັກຄະລັດຖະທູດປະຈຳປະເທດສຳຄັນ ເພື່ອແກ້ໄຂບັນຫາສາຍພົວພັນສອງຝ່າຍທີ່ຫຍຸ້ງຍາກ ແລະ ຕົກຕ່ຳທີ່ສຸດໃນປະຫວັດສາດ ແລະ ຕໍ່ມາມີການແຕ່ງຕັ້ງທ່ານ ຈອນ ຊາລິແວນ ອະດີດຮອງລັດຖະມົນຕີກະຊວງການຕ່າງປະເທດ ສ.ອາເມຣິກາໃຫ້ຮັບຕຳແໜ່ງແທນ ເມື່ອຕົ້ນປີນີ້.

HTML tutorial