ພັກລັດຖະບານຍີ່ປຸ່ນເລືອກທ່ານ ໂຢຊິຮິເດະ ຊຶກະ ຂຶ້ນເປັນຜູ້ນຳຄົນໃໝ່

ລາຍງານ 14 ກັນຍາ 2020, ກອງປະຊຸມພັກເສລີປະຊາທິປະໄຕ (LDP) ເຊິ່ງເປັນພັກແກນນຳລັດຖະບານຂອງຍີ່ປຸ່ນ ໄດ້ມີການລົງຄະແນນສຽງພາຍໃນພັກ ໃນວັນຈັນນີ້ ເພື່ອເລືອກຕັ້ງຫົວໜ້າພັກຄົນໃໝ່ ແທນທ່ານ ຊິນໂຊ ອາເບະ ນາຍົກລັດຖະມົນຕີ ທີ່ລາອອກເມື່ອທ້າຍເດືອນທີ່ຜ່ານມາ ໂດຍມີຜູ້ສະເໜີຕົວ 3 ທ່ານຄື: ທ່ານ ໂຢຊິຮິເດະ ຊຶກະ ເລຂາທິການຄະນລັດຖະມົນຕີ, ທ່ານ ຟຸມິໂອະ ຄິຊິດະ ປະທານຍຸດທະສາດພັກ LDP ແລະ ທ່ານ ຊິເງຣຸ ອິຊິບະ ອະດີດລັດຖະມົນຕີກະຊວງປ້ອງກັນປະເທດ.

ຜົນການລົງຄະແນນປະກາດວ່າ ທ່ານ ໂຢຊິຮິເດະ ຊຶກະ ໄດ້ຮັບສຽງສະໜັບສະໜູນຫຼາຍທີ່ສຸດ 377 ຈາກ 535 ສຽງ, ໂດທ່ານ ຟຸມິໂອະ ຄິຊິດະ ໄດ້ສຽງສະໜັບສະໜູນ 89 ສຽງ ແລະ ທ່ານ ຊິເງຣຸ ອິຊິບະ ໄດ້ 68 ສຽງ, ເຊິ່ງໄຊຊະນະຂອງທ່ານ ໂຢຊິຮິເດະ ຊຶກະ ໃນການຊິງຕຳແໜ່ງຫົວໜ້າພັກ LDP ໄດ້ເປີດທາງໃຫ້ນັກການເມືອງອາວຸໂສ ອາຍຸ 71 ປີທ່ານນີ້ ເຊິ່ງຖືເປັນມືຂວາຂອງທ່ານ ຊິນໂຊ ອາເບະ ມາເກືອບ 10 ປີ ກຽມກ້າວຂຶ້ນສູ່ຕຳແໜ່ງນາຍົກລັດຖະມົນຕີຄົນໃໝ່ຂອງຍີ່ປຸ່ນ, ໂດຍສະພາປະຊາຊົນມີກຳນົດລົງມະຕິໃນວັນພຸດ 16 ກັນຍານີ້ ແລະ ພັນກ LDP ຄອງສຽງສ່ວນໃຫຍ່ເກີນເຄິ່ງໃນສະພາລ່າງ.

ທ່ານ ໂຢຊິຮິເດະ ຊຶກະ ໄດ້ກ່າວຂອບໃຈທ່ານ ຊິນໂຊ ອາເບະ ແລະ ສະມາຊິກພັກ LDP ທຸກຄົນ ໂດຍຢືນຢັນວ່າຈະສືບຕໍ່ນະໂຍບາຍປະຕິຮູບທັງໃນດ້ານເສດຖະກິດ, ການຕ່າງປະເທດ ແລະ ຄວາມໝັ້ນຄົງ, ຂະນະດຽວກັນ ວ່າທີ່ຜູ້ນຳຍີ່ປຸ່ນຄົນໃໝ່ກ່າວເຖິງຕົນເອງວ່າ ຕົນມາຈາກຄອບຄົວຊາວກະສິກອນ ໃນແຂວງອາກິຕະ ບໍ່ມີໃຜມີຄວາມຮູ້ເລື່ອງການເມືອງເປັນຈິງເປັນຈັງມາກ່ອນ ແຕ່ຕົນຕັດສິນໃຈເດີນເຂົ້າສູ່ເສັ້ນທາງສາຍນີ້ດ້ວຍຕົນເອງ ເລີ່ມຕົ້ນທຸກຢ່າງຈາກສູນຈົນເຖິງວັນນີ້ ແລະ ຕໍ່ຈາກນີ້ຕົນຈະທຸ້ມເທປະຕິບັດໜ້າທີ່ຢ່າງສຸດຄວາມສາມາດ ເພື່ອຜົນປະໂຫຍດຂອງປະຊາຊົນຍີ່ປຸ່ນເປັນສິ່ງສຳຄັນສູງສຸດ.

HTML tutorial