ລັດເຊຍພ້ອມຊ່ວຍເຫຼືອເບລາຣຸດຊີໃນທຸກດ້ານ ຈາກບັນຫາວິກິດການເມືອງພາຍໃນ

ລາຍງານ 15 ກັນຍາ 2020, ທ່ານ ວະລາມິເມຍ ປູຕິນ ປະທານປະເທດລັດເຊຍ ໃຫ້ການຕ້ອນຮັບທ່ານ ອະເລັກຊານເດີ ລູຄາເຊນໂກ ປະທານປະເທດເບລາຣຸດຊີ ທີ່ທຳນຽບໃນເມືອງໂຊຊິ ແຄມຝັ່ງທະເລດຳ ທາງພາກຕາເວັນຕົກສຽງໃຕ້ຂອງລັດເຊຍ ເມື່ອວັນຈັນ ທີ່ຜ່ານມາ ທ່າມກາງສະຖານະການທາງການເມືອງໃນເບລາຣຸດຊີທີ່ເຄັ່ງຕຶງມາກວ່າ 1 ເດືອນ ໂດຍການປະທ້ວງແກ່ຍາວມາຕັ້ງແຕ່ຮູ້ຜົນການເລືອກຕັ້ງເມື່ອວັນທີ 9 ສິງຫາ ທີ່ຜ່ານມາ ທີ່ທ່ານ ອະເລັກຊານເດີ ລູຄາເຊນໂກຊະນະການເລືອກຕັ້ງ ຂຶ້ນຄອງອຳນາດຕໍ່ເປັນສະໄໝທີ 6 ຫຼື ອີກ 5 ປີ.

ພາບ: ທ່ານ ອະເລັກຊານເດີ ລູຄາເຊນໂກ ປະທານປະເທດເບລາຣຸດຊີ (ຊ້າຍ) ແລະ ທ່ານ ວະລາດິເມຍ ປູຕິນ ປະທານປະເທດລັດເຊຍ, 14 ກັນຍາ 2020.

ສຳລັບເນື້ອໃນສຳຄັນຂອງການປຶກສາຫາລືທີ່ມີການເປີດເຜີຍ ຄືລັດຖະບານລັດເຊຍກຽມປ່ອຍເງິນກູ້ໃຫ້ແກ່ເບລາຣຸດຊີ 1,500 ລ້ານໂດລາສະຫະລັດ ຕາມກອບການຮ່ວມມື ສະຫະພາບລັດເຊຍ-ເບລາຣຸດຊີ ທີ່ໄດ້ສະຖາປະນາສາຍພົວພັນຮ່ວມກັນ ເມື່ອປີ 1996 ແລະ ລັດເຊຍຢືນຢັນວ່າເບລາຣຸດຊີຈະເປັນໜຶ່ງໃນປະເທດທຳອິດ ທີ່ໄດ້ຮັບວັກແຊັງປ້ອງກັນພະຍາດໂຄວິດ-19 ຈາກລັດຖະບານລັດເຊຍ.

ຂະນະດຽວກັນ, ທ່ານ ປູຕິນ ມີຈຸດຢືນສະໜັບສະໜູນອະນາຄົດທາງການເມືອງຂອງທ່ານ ອະເລັກຊານເດີ ລູຄາເຊນໂກ ພ້ອມກ່າວສະແດງຄວາມຊົມເຊີຍແນວຄິດຂອງຜູ້ນຳເບລາຣຸດຊີ ທີ່ຕ້ອງການປະຕິຮູບລັດຖະທຳມະນູນ ເພື່ອປະນີປະນອມກັບຝ່າຍຕໍ່ຕ້ານ, ເຖິງຢ່າງໃດກໍ່ຕາມ ຜູ້ນຳລັດເຊຍກ່າວວ່າ ທະຫານໂດດຈ້ອງຈຳນວນໜຶ່ງ ທີ່ກອງທັບລັດເຊຍສົ່ງໄປຮ່ວມເຝິກຊ້ອມກັບກອງທັບເບລາຣຸດຊີຈະຖອນກຳລັງກັບທັນທີ່ເມື່ອສຳເລັດພາລະກິດ.

ຕໍ່ມາທ່ານ ເດີມິຕຣີ ເປສຄັອບ ໂຄສົກທຳນຽບປະທານປະເທດລັດເຊຍ ກ່າວເພີ່ມເຕີມວ່າ ການພົບປະຫາລືໃຊ້ເວລາປະມານ 4 ຊົ່ວໂມງ, ໂດຍລັດຖະບານລັດເຊຍຍອມຮັບທ່ານ ອະເລັກຊານເດີ ລູຄາເຊນໂກ ໃນຖານະຜູ້ນຳອັນຊອບທຳຂອງເບລາຣຸດຊີ ແລະ ຍິນດີໃຫ້ການຊ່ວຍເຫຼືອທັງໃນການດ້ານເມືອງ, ເສດຖະກິດ ແລະ ຄວາມໝັ້ນຄົງ ຕາມຂໍ້ຕົກລົງສອງຝ່າຍ ແຕ່ລັດເຊຍບໍ່ມີແຜນປະຈຳການທະຫານໃນເບລາຣຸດຊີ, ໃນດ້ານຂອງ ສ.ອາເມຣິກາ ແລະ ສະຫະພາບເອີຣົບ ຍັງບໍ່ສະແດງປະຕິກິລິຍາຢ່າງເປັນທາງການຕໍ່ການພົບປະລະຫວ່າງຜູ້ນຳລັດເຊຍ ແລະ ເບລາຣຸດຊີໃນຄັ້ງນີ້.

HTML tutorial