ສະພາຍີ່ປຸ່ນຮັບຮອງເອົາທ່ານ ໂຢຊິຮິເດະ ຊຶກະ ເປັນນາຍົກລັດຖະມົນຕີຄົນໃໝ່ຢ່າງເປັນທາງການ

ລາຍງານ 16 ກັນຍາ 2020, ກອງປະຊຸມສະພາປະຊາຊົນຍີ່ປຸ່ນ ມີມະຕິໃນກອງປະຊຸມດ້ວຍຄະແນນສຽງ 314 ສຽງຈາກທັງໝົດ 462 ສຽງ ເລືອກທ່ານ ໂຢຊິຮິເດະ ຊຶກະ ຫົວໜ້າພັກເສລີປະຊາທິປະໄຕ (LDP) ໃຫ້ດຳລົງຕຳແໜ່ງນາຍົກລັດຖະມົນຕີຄົນໃໝ່ ຕໍ່ຈາກທ່ານ ຊິນໂຊ ອາເບະ ທີ່ລາອອກກ່ອນຄົບວາລະດ້ວຍເຫດຜົນດ້ານສຸຂະພາບ.

ທ່ານ ໂຢຊິຮິເດະ ຊຶກະ ອາຍຸ 71 ປີ ຖືເປັນນາຍົກລັດຖະມົນຕີຄົນໃໝ່ ໃນຮອບ 8 ປີຂອງຍີ່ປຸ່ນ, ເຖິງຢ່າງໃດກໍ່ຕາມ ການຂຶ້ນສູ່ຕຳແໜ່ງສູງສຸດທາງການເມືອງຂອງທ່ານ ໂຢຊິຮິເດະ ຊຶກະ ເກີດຂຶ້ນທ່າມກາງວິກິດຮອບດ້ານທັງພາຍໃນ ແລະ ຕ່າງປະເທດ ໂດຍສະເພາະວິກິດການແຜ່ລະບາດຂອງພະຍາດໂຄວິດ-19 ທີ່ສົ່ງຜົນໃຫ້ເສດຖະກິດຂອງງຍີ່ປຸ່ນຕົກຕ່ຳທີ່ສຸດນັບຕັ້ງແຕ່ສິ້ນສຸດສົງຄາມໂລກ ຄັ້ງທີ 2 ແລະ ບັນຫາສາຍພົວພັນລະຫວ່າງຍີ່ປຸ່ນກັບຕ່າງປະເທດ ໂດຍສະເພາະ ສປ.ຈີນ, ເກົາຫຼີໃຕ້ ແລະ ສ.ອາເມຣິກາ.

ເຖິງແມ່ນວ່າ ທ່ານ ໂຢຊິຮິເດະ ຊຶກະ ຍັງບໍ່ໄດ້ເປີດເຜີຍລາຍຊື່ຂອງຄະນະລັດຖະມົນຕີຂອງຕົນເອງຢ່າງເປັນທາງການ ແຕ່ສື່ທ້ອງຖິ່ນລາຍງານວ່າ ສ່ວນໃຫຍ່ຈະຍັງຄົງເປັນຄະນະເດີມ ດ້ວຍເຫດຜົນເພື່ອຄວາມຕໍ່ເນື່ອງ ແລະ ລ່ຽນໄຫຼຂອງການປະຕິບັດໜ້າທີ່ ເຊິ່ງຫາກເປັນໄປຕາມນັ້ນແທ້ໝາຍຄວາມວ່າ ທ່ານ ນາໂຣ ອາໂສະ ຈະຍັງຄົງຢູ່ໃນຕຳແໜງລັດຖະມົນຕີກະຊວງການເງິນ, ທ່ານ ທາໂຣ ໂຄໂນະ ລັດຖະມົນຕີກະຊວງປ້ອງກັນປະເທດ ແລະ ທ່ານ ໂທຊິມິດສື ໂມເຕງິ ໃນຕຳແໜ່ງລັດຖະມົນຕີກະຊວງການຕ່າງປະເທດ ຕະຫຼອດຮອດທ່ານ ຊິນຈິໂຣ ໂຄອິຊຸມິ ນັກການເມືອງໄວໜຸ່ມໄຟແຮງ ອາຍຸ 39 ປີ ໃນຕຳແໜ່ງລັດຖະມົນຕີກະຊວງສິ່ງແວດລ້ອມ, ເຖິງຢ່າງໃດກໍ່ຕາມ ອາຍຸສະເລ່ຍຂອງສະມາຊິກໃນຄະນະລັດຖະມົນຕີຍີ່ປຸ່ນຊຸດປັດຈຸບັນຢູ່ທີ 60 ປີ.

ພາບ: ທ່ານ ຊິນໂຊ ອາເບະ ອຳລາຕຳແໜ່ງ.

ໃນດ້ານຂອງທ່ານ ຊິນໂຊ ອາເບະ ໄດ້ຖະແຫຼງວ່າ ຕະຫຼອດໄລຍະເວລາ 4 ສະໄໝຂອງການຕຳລົງຕຳແໜ່ງຜູ້ນຳລັດຖະບານຍີ່ປຸ່ນ ມາຕັ້ງແຕ່ປີ 2012 ຈົນເຖິງວັນນີ້ ແລະ ອີກ 1 ປີລະຫວ່າງປີ 2006-2007 ຈົນສ້າງປະຫວັດສາດເປັນນາຍົກລັດຖະມົນຕີທີ່ດຳລົງຕຳແໜ່ງຍາວນານທີ່ສຸດໃນປະຫວັດສາດການເມືອງຂອງປະເທດ ຕົນມີຄວາມພາກພູມໃຈຢ່າງຍິ່ງທີ່ໄດ້ປະຕິບັດໜ້າທີ່ວຽກງານເພື່ອຊາດບ້ານເມືອງໃນທຸກວັນ.

ທ່ານ ຊິນໂຊ ອາບະ ກ່າວຂອບໃຈເຈົ້າໜ້າທີ່ທຸກຄົນທີ່ປະຕິບັດງານຮ່ວມກັນຕະຫຼອດໄລຍະເວລາທີ່ຜ່ານມາ ພ້ອມທັງຊົມເຊີຍຄວາມທຸ້ມເທຂອງທຸກຄົນໃນການຮ່ວມກັນປະເຊີນໜ້າກັບສິ່ງທ້າທາຍ ແລະ ຜ່ານຜ່າອຸປະສັກ ເພື່ອປົກປ້ອງຜົນປະໂຫຍດຂອງປະຊາຊົນຍີ່ປຸ່ນ ພ້ອມທັງຂອບໃຈທຸກຝ່າຍທີ່ມີຄວາມເຂົ້າໃຈຕໍ່ການຕັດສິນໃຈລາອອກກ່ອນກຳນົດ ເນື່ອງຈາກບັນຫາດ້ານສຸຂະພາບ ເຊິ່ງປັດຈຸບັນນີ້ມີອາກາດດີຂຶ້ນເປັນລຳດັບ ແລະ ຢືນຢັນຈະໃຫ້ການສະໜັບສະໜູນຢ່າງເຕັມທີ່ກັບລັດຖະບານຊຸດຕໍ່ໄປ ພາຍໃຕ້ການນຳຂອງທ່ານ ໂຢຊິຮິເດະ ຊຶກະ ທີ່ເປັນມືຂວາຂອງທ່ານ ຊິນໂຊ ອາເບະ ມາຍາວນານກວ່າ 1 ທົດສະວັດ.

HTML tutorial